Milli Təhlükəsizlik Nazirliyinin İctimaiyyətlə Əlaqələr Mərkəzinin rəhbəri Arif Babayev «Media forum» saytına açıqlamasında «Gündəlik Azərbaycan» və «Realnı Azerbaydjan» qəzetlərinin təsisçisi və baş redaktoru Eynulla Fətullayevin Bayıl həbsxanasından MTN-in təcridxanasına köçürüldüyünü təsdiqləyib.
Cənab Babayev xatırladıb ki, MTN-in İstintaq Baş İdarəsi tərəfindən Cinayət Məcəlləsinin 214-cü maddəsi ilə terrorçuluqla hədələmə faktı üzrə cinayət işi başlanıb: «Həmin cinayət işi üzrə hazırda istintaq və əməliyyat tədbirləri həyata keçirilir. Eynulla Fətullayevin MTN-in istintaq təcridxanasına köçürülməsi də bununla bağlıdır».
Eynulla Fətullayev aprelin 20-də böhtan atmada təqsirli bilinərək iki il altı ay azadlıqdan məhrum edilib.