Mayın 12-də Türkmənbaşı (keçmiş Krasnovodsk) şəhərində keçirilən görüşdə Vladimir Putin, Qurbanqulı Berdımuhammedov və Nursultan Nazarbayev niyyət bəyannaməsi imzalayıblar və hökumətlərinə tapşırıblar ki, 2007-ci il sentyabrın 1-dək sazişi hazırlayıb imzalasınlar.
Gözlənilir ki, türkmən qazını Qazaxıstan və Rusiya vasitəsilə Avropaya daşıyacaq yeni kəmərin inşasına artıq 2008-ci ildə başlanacaq.
Hazırda türkmən, özbək və qazax qazı əsasən 1967-ci ildə işə salınan Orta Asiya-Mərkəz kəməri ilə ixrac olunur. Onun illik gücü 50 milyard kubmetri ötmür, hərçənd Rusiya artıq bu il Türkmənistanla 25 illik saziş çərçivəsində 60 milyard, 2025-ci ildə isə 80 milyard kubmetr qaz almaq niyyətindədir.
Bununla belə, Türkmənistan prezidenti Qurbanqulı Berdımuhammedov deyib ki, Türkmənistanın Trans-Xəzər (Xəzərin dibi ilə) qaz kəməri layihəsində iştirakı da aktuallığını saxlayır.
«Bu layihə qalır. Bütün dünyada qaz nəqli marşrutlarının diversifikasiyası (müxtəlifliyi – red.) həyata keçirilir. Trans-Xəzər qaz kəmərinin inşasına gəlincə, o, müzakirəyə qoyula bilər» – deyə prezident Türkmənbaşıda jurnalistlərə bildirib.
Türkmənistan qazını həm də Çin və İrana nəql etməyi planlaşdırır. «Türkmənistanın qaz ehtiyatları kifayət edəcəkmi» sualına isə Berdımuhammedovun cavabı belə olub: «Narahat olmayın, qaz kifayət qədərdir».
Qazaxıstan prezidenti Nursultan Nazarbayev isə deyib ki, neft və qaz kəmərlərin çoxalması Qazaxıstana da əlverişlidir: «Burada heç bir siyasət yoxdur. Neft və qaz hasilatının artan həcmi bu cür diversifikasiyanı tələb edir».
