Son üç ayda baş verən 423 min yol hərəkəti pozuntusunun 65 faizini gənclər törədib. Bunu Bakı Şəhər Dövlət Yol Polisi İdarəsinin (BŞDYPİ) hərəkət təhlükəsizliyinin təbliğatı və ictimai qurumlarla əlaqələr şöbəsinin rəisi Ərəstun Məcidov deyir. Onun sözlərinə görə, Azərbaycanda yol qəza hadisələrinin sayı Ukrayna, Belarus, Gürcüstan və Rusiya ilə müqayisədə azdır. Azərbaycanda yol nəqliyyat hadisələrinə uğrayanların əsas hissəsi isə gənclərdir. Belə ki, 2006-cı ildə baş verən 3197 nəqliyyat hadisəsində həlak olan 1027 nəfərin 560-ı (55 faizi) gənclər olub.
Son üç ayda yol qəza hadisələrində 16 uşaq həlak olub, 58 nəfərsə xəsarət alıb. Həlak olanların 11-i, xəsarət alanların isə 39-u piyada olub. 11 piyadanın 7-si, 39 nəfərin isə 4-ü 7 yaşına qədər olan uşaqlar olub. Ərəstun Məcidov deyir ki, əksər hallarda kiçik yaşlı uşaqlar qəzaya valideynlərinin yanında uğrayıb.
