Martın 29-da Silahlı Qüvvələr tarixində ilk dəfə olaraq Azərbaycan aldığı hərbi texnikanın təqdimatını keçirib. ANS xəbər verir ki, Hərbi Hava Qüvvələrinin H.Z.Tağıyev qəsəbəsində yerləşən bazasında «MİQ-29» markalı döyüş təyyarələri, o cümlədən HHQ-nin zərbə vertolyotlarının nümayiş uçuşu keçirilib. Azərbaycanın hava sərhədlərini qorumaq və hava döyüşündə tam üstünlüyü ələ almaq məqsədi ilə Azərbaycan Ukrayna istehsalı olan 4-cü nəsil «MİQ-29» təyyarələrini alıb.
Unikal manevr və silah arsenalına malik bu qırıcılar hava döyüşündə, Ermənistanda olan «MİQ-23» və ilkin variant «MİQ-29» təyyarələrindən, eləcə də əksər göstəricilərinə görə, NATO-nun arsenalında olan «F-16» və «Tornado»lardan daha üstündür.
Bu təyyarələrin maksimal sürəti 2400 kilometr saatdadır. Təyyarə maksimum 18 min kilometr yüksəkliyə qalxmaq və 2100 kilometr məsafəni qət edə bilir. Təyyarələr UR-60 və R-27 tipli raketlərlə təchiz edilib. MİQ-29 230-240 kilometrdən hava hədəflərini məhv etmək qabiliyyətinə malikdir.