«Azərbaycanda bundan sonra da xeyli tikintilər aparılacaq»-bunu prezident İlham Əliyev yeni yol qovşağının açılışında fəhlələrlə söhbətində deyib. Martın 19-da Tbilisi prospekti ilə Həsən bəy Zərdabi küçəsinin kəsişməsində, «20 yanvar» dairəsində inşa edilmiş müxtəlif səviyyəli yol qovşaqlarının açılış mərasimi olub.
«Azərkörpü» tərəfindən inşa edilən yol ötürücünün uzunluğu 1,12 km-dir. Tbilisi prospektində inşa edilən tunelin uzunluğu isə 332 m, hündürlüyü 5,5 m-dir. Ümumilikdə, körpü və tunelin tikintisinə 31,5 mln. manat xərclənib.
Bundan əvvəl Ə. Salamzadə küçəsi ilə Tbilisi prospektinin və Z. Bünyadov prospekti ilə Atatürk prospektinin kəsişdiyi yerdə inşa olunan yol ötürücüləri istifadəyə verilib. Nəqliyyat Nazirliyindən bildirirlər ki, ilin sonuna qədər daha 5 yol ötürücüsü və 11 keçidi istifadəyə verilməsi gözlənilir.
Prezident həmçinin Daxili İşlər Nazirliyinin Mərkəzi Respublika Hospitalının yeni binasının təməlqoyma mərasimində iştirak edib.