Martın 5-dən «Azadlıq» radiosunda iki yeni veriliş efirə çıxdı. Onlardan biri - «Can Bakı» verilişində dinləyicilər həftə içi hər gün Bakının dolanışığı, siyasi və mədəni yaşamı, düşüncə və əyləncə həyatından xəbər tutacaq.
Günün ən çox danışılan hadisələrindən isə dinləyicilər hər iş gününün sonunda «Doktor Ziya ilə işdən sonra» verilişində xəbər tuta biləcəklər.
Martın 5-də efirə çıxan «Doktor Ziya ilə işdən sonra» verilişinin qonaqlarından biri Amerika Birləşmiş Ştatlarının Azərbaycandakı səfiri Enn Dörs olub. Xanım Dörs «Azadlıq» radiosunun hər iki verilişini maraqla qarşıladığını bildirib: «Siz Azərbaycanda azad mətbuatın inkişafına çox böyük töhfə verirsiniz. İstənilən güclü demokratiyanın özəyi budur. Mən sizin işinizi alqışlayıram və sizin verilişlərinizə hər səhər işə gedəndə və işdən qayıdanda qulaq asaram. Bu həm də mənə Azərbaycan dilini öyrənməyə kömək edər».
«Azadlıq» radiosunun yayım üzrə direktoru Mişel Dübak da hər iki verilişin auditoriya üçün faydalı olduğunu düşünür: «Baxmayaraq ki, mən Azərbaycan dilini başa düşmürəm, amma, verilişlərin mövzularını bilirdim. Məncə verilişlərin bu cür genişlənməsi auditoriya üçün çox faydalı olacaq».
