«Biz Qazaxıstanın Bakı-Tbilisi-Ərzurum qaz kəmərinə qoşulması imkanlarını müzakirə etmişik»- bunu Qazaxıstan prezidenti Nursultan Nazarbayevlə keçirdiyi görüşdən sonra Azərbaycanın Xarici İşlər naziri Elmar Məmmədyarov deyib. Onun sözlərinə görə, söhbət Qazaxıstan qazının Azərbaycan ərazisindən keçərək dünya bazarlarına çıxarılmasından gedib: «Astana bu layihəyə maraq göstərir».
Cənab Məmmədyarov deyib ki, hazırda ekspertlər mövcud layihənin tariflərini, gömrük öhdəliklərini, texniki parametrlərini öyrənirlər.
Qazaxıstan ildə 27 mlrd. kubmetr qaz hasil edir, 2010-2015-ci illərdə bu həcm 40-50 mlrd. kubmetrə qədər artacaq.
Avropa Birliyi Xəzər regionun qazında maraqlıdır və bütün vasitələrlə Orta Asiyadan Azərbaycana Transxəzər qaz kəmərinin tikintisini dəstəkləyir.
