«Birləşmiş Ştatlar 15 il qabaq Xocalıda baş verən faciəvi hadisələrdən təəssüflənir, mülki sakinlərə bu cür hücumları pisləyir. Biz həmin faciə qurbanlarının ailələrinə, dostlarına başsağlığı veririk»-bu fikirləri ABŞ Dövlət Departamentinin rəsmisi Şon Makkormak deyib. O, bildirib ki, gələcəkdə belə hadisələrin baş verməməsi üçün Dağlıq Qarabağ münaqişəsi mümkün qədər tez sülh yoluyla həll olunmalıdır: «Birləşmiş Ştatlar Azərbaycanın ərazi bütövlüyünü tanıyır, ATƏT-in Minsk qrupunun üzvü kimi münaqişənin həllinə yardım edir».
Diplomat Amerikadakı Azərbaycan Cəmiyyətinin dövlət katibi Kondoliza Raysa ünvanladığı məktubla bağlı sualı cavablandırarkən belə deyib.
1992-ci il fevralın 25-dən 26-na keçən gecə erməni hərbi birləşmələri Xankəndində yerləşən Rusiyanın 366-cı motoatıcı alayının dəstəyi ilə Xocalı şəhərini işğal edib. Şəhər işğal olunarkən 613 nəfər qətlə yetirilib. 1300 nəfərə yaxın mülki vətəndaş girov götürülüb. Onların 150 nəfərinin taleyi indi də məlum deyil.
