«14-24»də bu dəfə tələbənin aldığı təqaüd və onun xərclərindən danışılır. Bundan başqa, verilişin qonaqları da var. Tarif Şurasının enerjidaşıyıcıları və kommunal-təsərrüfat xərclərinin qiymətlərinin artırılması ilə bağlı qərarına etiraz əlaməti olaraq bir qrup gənc yanvarın 8-də www.susmayaq.biz saytını yaratdı. Lakin bir gün sonra Azərbaycandan bu sayta giriş qapadıldı. Necə oldu ki, www.susmayaq.biz saytı yarandı? Gənclər susmayıb nə demək istəyirdilər? Bu suallara www.susmayaq.biz saytında yazışan gənclərdən ikisi - Ramin Hacılı və Ülvi Həsənli cavab verir. Onlar www.susmayaq.biz saytının yenidən fəaliyyət göstərməsi üçün əllərindən gələni etdiklərini və bununla yanaşı, digər etiraz aksiyaları təşkil edəcəklərini və yeni saytlar yaradacaqlarını deyirlər.
Bakıdakı bir neçə ali məktəbin tələbələri isə aldıqları təqaüdün xərclərinin yarısını belə ödəmədiyindən şikayətlənirlər.