15 il qabaq Moskvaya gələn moldovalı qadın Radka deyir: «Yanvarın 15-dək miqrasiya xidmətləri bizə iş üçün icazə vermək istəmirdilər. Amma, bu tarixdən etibarən bizdə lazımi sənədlər olmalıdır! Hətta biz-bazarlarda alver edənlər iş üçün icazə ala bilsək, burada yalnız aprelin 1-dək işləyə biləcəyik».
«Amma, ruslar işləmək istəmir!» – deyə bazarda iki kiçik ticarət köşkünün sahibi olan 36 yaşlı Əli bildirir: «Mən onları işə götürməyə artıq cəhd etmişəm. Biri pulu özü ilə aparıb getdi, ikincisi işə sərxoş gəlməsinə baxmayaraq, yüksək əmək haqqı tələb edirdi».
Azərbaycandan olan Əli və onun bazarda qalan başqa bir çox həmkarları artıq çoxdan Rusiya vətəndaşlığı alıblar. Ancaq, onlar «əcnəbi» qalan işçiləri və qohumlarının taleyindən narahatdırlar: «Rusiya pasportu almaq üçün çoxlu sayda sənəd toplamaq və ən azı 3 min dollar lazımdır» – deyə moldovalı satıcı Radka qüssə çəkir: «İndiyədək nə mən, nə də Moskvada bənna işləyən ərimin sənədi yoxdur. Ərimi artıq iki dəfə saxlayıblar. Birinci dəfə onun bütün əmək haqqını əlindən alıblar, ikinci dəfə isə mobil telefonunu vermək məcburiyyətində qalıb. Bundan sonra başımıza nə gələcəyini deyə bilmirəm».
Bir çox əcnəbi jurnalistlər, o cümlədən «France internationale» radiosunun Moskvadakı müxbiri Jan Frederik Somon da deyəsən, miqrasiya haqqında yeni Rusiya qanunlarının qurbanı olub. Daxili İşlər Nazirliyi və miqrasiya xidmətinin ziddiyyətli tələbləri üzündən müxbir müddəti yanvarın 16-da başa çatan vizasını vaxtında uzada bilməyib.
