Cənab Hüseynov onu da əlavə edir ki, heyvanların Bakı zooparkına gətirilməsi elə də asan iş deyil: «Buna müvafiq dövlət orqanlarının - İqtisadi İnkişaf, Ekologiya və Təbii Sərvətlər nazirliklərinin, Baytarlıq Xidmətinin razılığı, Zoologiya İnstitutunun isə rəyi lazımdı. Bu qurumların razılığını aldıqdan sonra yaya qədər saydığımız heyvanları zooparkımıza gətirəcəyik».
Zooparkın sahəsini genişləndirməsi üçün ona dövlət tərəfindən əlavə torpaq verilib. Hasarlanması başa çatan bu sahədə hələlik heç bir heyvan saxlanılmır, amma tezliklə onun yeni sakinləri gətiriləcək: «Həmin sahədə yalnız otyeyən heyvanlar saxlamaq istəyirik. Çünki ora sıx meşəlikdir. Bunun üçün də istəyirik ki, ətraf mühitə zərər vurulmasın».
Cənab Hüseynov onu da deyir ki, bəzən zooparka evdə əhliləşdirilmiş heyvanları gətirirlər. Onları qəbul edib zoopark şəraitinə uyğunlaşdırmaq isə heç də həmişə mümkün olmur. O, həm də həmin heyvanları saxlayanları xəbərdar edir ki, ehtiyatlı olsunlar. Çünki bu cür heyvanlar gec-tez vəhşi təbiətə məxsus olduqlarını göstərirlər.