Azərbaycan jurnalistlərinin IV qurultayı dekabrın 23-də keçiriləcək. Bu barədə «Turan»a Mətbuat Şurasının sədri Əflatun Amaşov bildirib. Onun sözlərinə görə, qurultayda Mətbuat Şurası sədrinin, Mərkəzi Nəzarət Təftiş Komissiyasının hesabatları dinləniləcək və cari məsələlərə baxılacaq: «Biz istəyirik ki, qurultayda mətbuatın qlobal problemləri müzakirə olunsun. KİV-lərin iqtisadi durumunun yaxşılaşdırılması, reklam bazarının genişləndirilməsi ilə bağlı təkliflər irəli sürülsün. Eyni zamanda, qurultay iştirakçılarının mətbuat və söz azadlığının daha da genişləndirilməsi, bu sahədəki problemlərin həlli yolları ilə bağlı müraciətlər də qəbul edəcəyini güman etmək olar».
Cənab Amaşov bildirib ki, gündəlik qəzetlər, informasiya agentlikləri, jurnalist təşkilatları 2 nəfər, həftəlik qəzet və jurnallar isə bir nəfər olmaqla qurultaya nümayəndə göndərə bilər: «Artıq yüzdən çox KİV nümayəndəsini təqdim edib».
