Cənab Lintnerin sözlərinə görə, Monitorinq Komitəsinin xüsusi mütəxəssislər qrupu hazırda Azərbaycanda siyasi məhbuslar məsələsi üzərində işləyir və vəziyyəti nəzarətdə saxlayırlar. Onlar komitəyə bundan sonra da bu barədə müraciət edən insanlara köməklik göstərməyə çalışacaqlar.
Komitə sədri bildirir ki, AŞ PA-nın Azərbaycan üzrə həmməruzəçiləri Andreas Herkel və Toni Lloyd Bakıda olarkən həbsxanalara da baş çəkiblər. Onların bu barədə hazırladıqları hesabat dekabrın 13-də AŞ PA Monitorinq Komitəsinin Parisdə keçirilən iclasında müzakirə ediləcək.
Azərbaycanın AŞ PA-dakı nümayəndə heyətinin üzvü, millət vəkili Gültəkin Hacıyeva isə bildirir ki, həmməruzəçilər Assambleyanın Paris toplantısında iştirak etməyəcəklər. Ona görə də bu məsələnin iclasda müzakirəsi gözlənilmir. Toplantıda Azərbaycanı nümayəndə heyətinin digər üzvü, deputat Aydın Abbasov təmsil edəcək.