Украина эчке эшләр министры киңәшчкесе Антон Геращенко әсирлеккә төшкән Русия хәрбиләре исемлеген чыгарды (тулы исемлек булмаска мөмкин). Ул аларның әниләрен Польша чиге аша килеп улларын алып китәргә чакыра. Иң яшь әсиргә 19 яшь.
Украинада әсирлеккә төшкән яки һәлак булган Русия хәрбиләре фотоларын һәм видеоларын "Ищи своих" телеграм каналы чыгарып бара.
БМОның Кеше хокуклары шурасы, Украинадагы сугышта Русия хәрбиләре кылган булырга мөмкин сугыш җинаятьләрен тикшерү өчен халыкара комиссия оештыра.
Шурадагы күпчелек илләр Русия гамәлләрен хөкем итү һәм комиссия оештыру турындагы резолюцияне хуплады, Русия белән Эритрея генә каршы чыкты. Шурада барлыгы 47 ил бар. Русия вәкиле әйтүенчә, резолюцияне хуплаучылар “Украинадагы хәлләр өчен Русияне гаепләүдә бөтен ысулларны" куллана.
Комиссиянең эше ничек оештырылачагы әлегә аңлашылмый. Монда тулырак.
НАТО Украинага үз хәрбиләрен һәм сугыш очкычларын җибәрмәячәк. Бу турыда җомга Брюссельдә НАТО илләренең тышкы эшләр министрлары киңәшмәсеннән соң оешманың генераль секретаре Йенс Столтенберг белдерде. Аның әйтүенчә, НАТО Русия белән сугышырга теләми, ә аның Украинадагы сугышка турыдан-туры тыкшынуы андый низаг мөмкинлеген арттыра. Шул ук вакытта НАТО Русияне Украинадагы сугышны туктатырга чакыра һәм Русия сугышны Украина чикләреннән читкә чыгарырга маташса, НАТО үз-үзен яклаячак дип белдерә.
БМОның Кеше хокуклары идарәсе Украида сугыш башланганнан бирле тыныч халыктан 331 кешенең һәлак булуын, 675 кешенең яралануын белдерде. Чынлыкта бу саннар күпкә зуррак булырга мөмкин дилә. Бу хакта Reuters хәбәр итә.