Keçid linkləri

Təcili xəbərlər
2020, 26 Sentyabr, şənbə, Bakı vaxtı 05:59

Ələt limanında böyük növbə


Ələt limanında yük maşınlarının növbəsi

Bakı Beynəlxalq Dəniz Ticarət Limanında (Ələt qəsəbəsində) yük maşınlarının böyük növbəsi yaranıb.

Bu barədə AzadlıqRadiosuna yük maşınlarının birinin sahibi Sadıq Vəliyev məlumat verib: "Rusiyadan kartof yükləmişik. Gəlmişik Ələt limanına. Kartof gəmi vasitəsi ilə Türkmənistana aparılmalıdır. Biz bura gələn kimi (koronavirus pandemiyası ilə bağlı) karantində qaldıq. Rusiya tərəfində də çətinliklərlə üzləşdik. Yükü vurdular, üç gündən sonra sənəd verdilər. Gəldik Dərbəndə, iki gün də bizi orada saxladılar. Bizə demişdilər ki, iki saata Azərbaycana keçəcəksiniz. Azərbaycan tərəfinə keçəndə dedilər ki, Ələt limanına gedin, orada yükləri boşaldarlar. Neçə gündür durmuşuq burada, yükü boşaltmırlar".

"Elə maşın var avqustun 24-də gəlib"

O deyib ki, gətirdikləri tranzit yükdür, gərək vaxtında boşaldıla: "Burda 200-ə yaxın maşın var. Elə maşın var avqustun 24-də gəlib. Mən özüm üç gündür burdayam. Mal yiyəsi deyir ki, fəhlə yoxdur. Hər dəfə bizə deyirlər ki, yük boşaldılacaq. Üst-başımız çirk içindədir".

Ələt limanında yük maşınlarının növbəsi
Ələt limanında yük maşınlarının növbəsi

Digər bir sürücü Səfərəli Rəsulov isə deyib ki, artıq ehtiyat pulları da tükənib: "Gündə yanacağa 50 manat pul ödəyirik, soyuducu maşınlardır. Duran yerdə də xərc istəyir. Bunun yeməyi var, gündə 70-80 manat xərcimiz çıxır. Heç nə istəmirik, onlardan. Gəlsinlər, yükü boşaltsınlar. Hərəsinin ailəsi var. Bütün xərcləri cibimizdən ödəyirik. Maşınlar yük altındadır, sıradan çıxırlar".

Yük sahibi - "Riyad" şirkətin nümayəndəsi Məzahir Məmmədov isə deyib ki, sürücülərə dəyən ziyan ödənilib:

"Pislik etməmişik"

"Hamı yol pulunu alıb. Məhsulu Türkmənistana aparacaq gəmi gecikir. Dövlət səviyyəsində daşınan yükdür. Yük gömrükdən keçib. Sürücü yükü təhvil verməlidir. Bəlkə yük çürüyüb, ona sürücü cavabdehlik daşıyır. Pislik etməmişik. Bu yükün daşınmasına Rusiyanın maşınlarını da cəlb edə bilərdik. Yükü özümüzkülərə verdik ki, çörək qazansınlar. Gecikmələr bizlik deyil. Vaxtaşırı olaraq texniki səbəbdən gecikmələr olur".

Məsələyə, hələlik, Ələtdə yerləşən Bakı Beynəlxalq Dəniz Ticarət Limanının rəsmilərindən münasibət almaq mümkün olmayıb.

XS
SM
MD
LG