İranın Ali dini lideri Ayətulla Əli Xamenei (Ali Khamenei) Birləşmiş Ərəb Əmirliklərinin (BƏƏ) İsraillə münasibətləri normallaşdırmaqla bağlı tarixi sazişini “çox duruş gətirməyəcək” “xəyanət” adlandırıb.
Xamenei sentyabrın 1-də çıxışında deyib ki, “islam dünyası və ərəb dövlətləri, region ölkələri və Fələstinə” qarşı “xəyanət” törədilib.
Yüksək səviyyəli birgə ABŞ-İsrail nümayəndə heyəti isə Əbu Dabiyə səfərini yekunlaşdırıb, İsraillə BƏƏ arasında ilk birbaşa uçuş həyata keçirilib.
İrana qarşı əməkdaşlıq
İsrail və BƏƏ avqustun 13-də tam diplomatik münasibətlər qurduqlarını bəyan ediblər. ABŞ-ın vasitəçiliyi ilə əldə olunmuş sazişdə İsrail Qərb sahildə tutduğu əraziləri ilhaq planlarını təxirə salır.
BƏƏ İsraillə tam diplomatik əlaqələr quran ilk Körfəz ərəb ölkəsi və üçüncü ərəb ölkəsidir. Əbu-Dabi bildirib ki, münasibətlərin normallaşması ilə İsraili ilhaq planlarını dayandırmağa məcbur edə bilər. Fələstinlilər Qərb sahildə sözügedən əraziləri gələcək dövlətlərinin tərkib hissəsi kimi görürlər.
Körfəz ölkələri BƏƏ-nin addımını alqışlasalar da, İran, Türkiyə və Fələstin rəsmiləri bunu pisləyib.
ABŞ Dövlət katibi Mike Pompeo avqustun 31-də deyib ki, BƏƏ-İsrail sazişinin mərkəzində İran dayanıb. Onun sözlərinə görə, Tehran “Yaxın Şərqdə sabitsizlik” yaradır.
“Əmirliklər və israillilər Yaxın Şərqdə bu nəhəng təhdidə qarşı əməkdaşlıq edə bilərlər”, – Pompeo vurğulayıb.
Ötən həftəsonu BƏƏ 1972-ci ildən qüvvədə olan, İsraili boykot edən qanunu ləğv edib. Ötən ayın əvvəlində isə iki ölkə ilk dəfə olaraq birbaşa telefon xidməti açıb.
