Ukraynanın Xüsusi Antikorrupsiya Prokurorluğunun başçısı beş il bu vəzifədə çalışandan sonra istefa verdiyini deyir.
Nazar Kholodnytskiy avqustun 21-də Facebook-da yazıb ki, vəzifədən öz istəyilə gedib.
“Bu gün əminliklə deyə bilərəm ki, Xüsusi Antikorrupsiya Prokurorluğu və Milli Antikorrupsiya Bürosu öz missiyasını yerinə yetirəcək”, – Kholodnytskiy yazıb.
O əlavə edib ki, rəhbərlik etdiyi idarə “sistematik olaraq azadlığımıza qəsd, işimizin nəticələri ilə manipulyasiya etmək kimi siyasi cəhdlərlə üzləşib”.
Qalmaqallar
Kholodnytskiy-nin adı bir qalmaqalda hallanırdı, onun korrupsiyada şübhəli bilinən məmurlara mühakimədən yayınmağa kömək etdiyi iddia olunurdu.
2018-ci ilin iyulunda Ukraynanın müvafiq dövlət qurumu Baş Prokurorluğun Kholodnytskiy-ni işdən çıxarmaqla bağlı xahişini rədd elədi, ona töhmət verməklə kifayətləndi.
Ötən il Ukrayna prezidenti seçilmiş Volodymyr Zelenskiy onillər boyunca ölkədə kök salmış korrupsiyanı təmizləməyi vəd edib.
İyunda ölkə rəsmiləri deyirdilər ki, qaz şirkətinin başçısıyla bağlı cinayət təhqiqatını dayandırmaqdan ötrü onlara 6 milyon dollar rüşvət təklif olunub. ABŞ-ın keçmiş vitse-prezidenti Joe Biden-in oğlu həmin şirkətin idarə heyətinin üzvü olub.
Kholodnytskiy isə Biden-lərdən heç birinin həmin rüşvətvermə cəhdinə bağlı olmadığını bildirdi.
Burisma təbii qaz şirkəti ABŞ Prezidenti Donald Trump-ın impiçmenti ilə sonuclanmış qalmaqalın mərkəzində dururdu.