Keçid linkləri

Təcili xəbərlər
2020, 07 İyul, çərşənbə axşamı, Bakı vaxtı 17:22

Khashoggi-nin ailəsi qatilləri bağışlayır


Jamal Khashoggi

“Washington Post” qəzetinin köşə yazarı Jamal Khashoggi-nin ailəsi onun səudiyyəli qatillərini bağışladığını açıqlayıb. Hökumətin beş agenti jurnalistin qətlində təqsirli bilinərək ölümə məhkum edilmişdi.

“Biz, şəhid Jamal Khashoggi-nin oğulları elan edirik ki, atamızı öldürən şəxsləri bağışlayırıq, mükafatımızı Uca Allahdan gözləyirik”, – jurnalistin oğullarından biri Salah Khashoggi Twitter-də yazıb.

Salah Khashoggi Səudiyyə Ərəbistanında yaşayır, qətlə görə kral məhkəməsindən maliyyə təzminatı alıb. O yazıb ki, qatillər müqəddəs Ramazan ayının sonuna düşən əhya gecələrində əfv olunub.

Milyonluq evlər, yüzminlərlə dollar...

“Associated Press” bu açıqlamanın gözlənən olduğunu yazır, çünki məhkəmənin çıxardığı qərarda hökmün dəyişdirilməsi üçün əlyeri qoyulurdu, qətlin bilərəkdən törədilmədiyi deyilirdi. Bu hökm Səudiyyə hökumətinin jurnalistin qətlilə bağlı rəsmi izahıyla üst-üstə düşürdü.

Səudiyyənin “Arab News” media orqanı cümə günü yazıb ki, Khashoggi-nin oğullarının açıqlaması qatilləri edamdan qurtarsa da, heç də onların cəzasız qalacağı anlamına gəlmir.

“Frans Pres” qeyd edir ki, Salah bundan öncə ədliyyə sisteminə “tam inandığını” deyib, opponentlərini bu işdən sui-istifadədə suçlayıb.

“The Washington Post” ötən il yazırdı ki, Salah daxil olmaqla, Khashoggi-nin övladlarına bir neçə milyon dollarlıq evlər verilib, hər ay hökumət onlara yüzminlərlə dollar ödəyir.

Salah isə bu məlumatları təkzib etmiş, Səudiyyə hökumətilə məsələnin pulla həllinin müzakirə olunmadığını demişdi.

Jurnalist 2017-ci ilin oktyabrında Səudiyyənin İstanbuldakı konsulluğunda öldürülüb, bədəni hissələrə parçalanıb. Bu qətli bütün dünya pisləyib, şübhələr Vəliəhd şahzadə Mohammed bin Salman-a yönəlib. İndiyədək jurnalistin cəsədi tapılmayıb.

Khashoggi niyə öldürüldü

Qətlinədək Khashoggi “Washington Post”dakı köşə yazılarında vəliəhd şahzadəni tənqid edən yazılar yazırdı. O, bir il idi mühacirətdə yaşayırdı, ölkəsinə qayıdacağı halda həbsdən ehtiyatlanırdı.

Krallıq beynəlxalq təzyiq nəticəsində etiraf elədi ki, Khashoggi səudiyyəli agentlər tərəfindən öldürülüb və əməliyyata şahzadənin iki köməkçisi nəzarət edib. Onlar sonradan vəzifədən kənarlaşdırıldılar.

Krallıq vəliəhd şahzadənin əməliyyatda əli olmadığını deyir. Tənqidçilərsə ABŞ kəşfiyyatının hesabatlarına istinad edirlər. Həmin sənədlərə görə, şahzadənin bilgisi olmadan belə bir əməliyyat həyata keçirilə bilməzdi.

Konqresin təzyiqinə, Senatın qətlə görə vəliəhd şahzadəni suçladığı qətnaməsinə baxmayaraq, Prezident Donald Trump ABŞ-ın Səudiyyə ilə münasibətlərini müdafiə edib.

Ölüm cəzasına məhkum edilmiş beş nəfərdən başqa, Səudiyyə məhkəməsi daha üç nəfəri cinayəti ört-basdır etməkdə təqsirli bilib, onları üst-üstə 24 il həbs cəzasına məhkum edib.

Qətlə görə 11 nəfər məhkəmə önünə çıxarılıb. Amma hökumət təqsirli bilinənlərin adlarını açıqlamayıb.

XS
SM
MD
LG