ABŞ Prezidenti Donald Trump ölkənin hüquq-mühafizə agentlərinə qarşı yeni tənqid dalğası başladıb. Belə ki, onun keçmiş milli təhlükəsizlik müşaviri General Michael Flynn-in vəkilləri Federal Təhqiqat Bürosunun (FTB) daxili sənədlərini yayıblar. Onlar Flynn-in məhkumluğunun ləğvini istəyirlər.
2016-cı ildə Trump-ın seçki qərargahıyla Rusiya arasında mümkün əlbirliyin təhqiqatı başlananda Flynn ilk hədəflərdən idi. O, milli təhlükəsizlik müşaviri vəzifəsində cəmi 24 saat qala bildi, 2017-ci ilin fevralında Trump tərəfindən işdən çıxarıldı.
Flynn-in Rusiyanın Birləşmiş Ştatlardakı səfiri ilə ünsiyyəti haqda Vitse-prezident Mike Pence-yə yalan danışdığı üzə çıxmışdı. 2017-ci ilin dekabrında Flynn FTB-yə Rusiya səfiri ilə söhbətləri haqda yalan danışdığını boynuna aldı.
Amma Trump deyir ki, Flynn-in vəkillərinin açıqladığı sənədlərə əsasən o, keçmiş müşavirinin məhkəmədən bəraət alacağına inanır.
“Mən hakim deyiləm”
Bu baş verməzsə, Trump prezident səlahiyyətindən istifadə edərək Flynn-i əfv edəcəyinə eyham vurub.
“Gördüklərimə əsasən mənə elə gəlir ki, Michael Flynn təmizə çıxacaq. Mən hakim deyiləm, səlahiyyətim başqadır... Məncə, o bəraət alacaq”, – Trump aprelin 30-da Vaşinqtonda jurnalistlərə deyib.
Trump əvvəllər də Flynn-i əfv etməyi düşündüyünü deyirdi.
Aprelin 29-da və 30-da Trump Flynn haqda bir neçə dəstəkləyici tvit yazıb və keçmiş müşaviri barədə FTB-nin apardığı istintaqı pisləyib.
“Müharibə qəhrəmanı General Michael Flynn-in başına gələnlər Birləşmiş Ştatlar vətəndaşının başına heç vaxt gəlməməlidir”, – Trump tvitində yazıb.
Pence isə aprelin 30-da deyib ki, Flynn-in ona yalanı “bilərəkdən danışmadığına” “inanmağa meyllidir”.
Aprelin 30-da keçmiş müşavirin vəkilləri FTB-ni və ABŞ Ədliyyə Departamentini istintaq zamanı pozuntuya yol verməkdə suçlayıb.
Onlar möhürü qaldırılmış sənədlərə əsasən iddia ediblər ki, FTB Flynn-ə “qəsdən torba tikməyə” çalışıb. FTB 2016-cı il prezident seçkisinə Rusiyanın müdaxiləsini araşdırırdı.
