Keçid linkləri

2024, 28 Mart, Cümə axşamı, Bakı vaxtı 23:56

Nyu York ştatı yoluxmalara görə önə çıxır – Qərb mediası


Nyu Yorkda tibb işçisi
Nyu Yorkda tibb işçisi

Koronavirus yoluxmalarına görə Nyu York ştatı ABŞ-dan kənar ölkələri geridə qoyub. Aprelin 9-da ştatda virusa yoluxanların 159 min 937 nəfər olduğu bildirilib.

Müqayisə üçün, İspaniyada 152 min, İtaliyada isə 142 min yoluxan var. Pandemiyanın ilk olaraq başladığı Çində isə 83 minə yaxın yoluxma olduğu bildirilib.

Ümumilikdə Birləşmiş Ştatlarda 469 min 450 nəfər koronavirusa yoluxub və bu, dünyada ümumi yoluxmaların üçdə birini təşkil edir.

Cümə axşamı Nyu Yorkda 7 min ölüm halı qeydə alınıb.

Tələsməmək xəbərdarlığı

Ştatın qubernatoru Andrew Cuomo deyib ki, son günlər 200 yeni xəstənin xəstəxanaya yerləşdirilməsi “bu qarabasma başlanandan ən aşağı rəqəmdir”. Ötən həftə günə mindən çox xəstə qəbul olunurdu.

İntensiv terapiya şöbələrinə xəstə qəbulu da azalıb, bu şöbələrə 18 min 200-dən çox xəstə yerləşdirilib.

Ştatdakı ölüm hallarından üçdə ikisi Nyu York şəhərinin payına düşür, hətta real ölü sayının düzgün hesablanmaması sarıdan da narahatlıq var. Evlərində ölən Nyu yorkluların sayında kəskin artım da koronavirusla əlaqələndirilir.

Şəhər rəsmiləri koronavirus testindən keçməyərək həyatını itirənləri də rəsmi ölü sayına daxil edəcəyini bildirib.

Ölü sayının azalmasını göstərən proqnozlara baxmayaraq, səhiyyə rəsmiləri xəbərdarlıq edirlər ki, amerikalılar “sosial məsafə” qaydalarını yüngülləşdirsələr, infeksiyaların ikinci dalğası başlanar.

“Ən vacibi odur ki, ilkin ümid işartılarına baxmayaraq, adamlar 30 günlük karantindən çıxmağa tələsməsinlər”, – Ağ evin koronavirus üzrə işçi qrupunun koordinatoru Deborah Birx deyib.

“Adamlar küçələrə çıxıb yenidən sosial təmasa başlasalar, kəskin ikinci dalğanı görə bilərik”, – o, sözlərinə əlavə edib.

Qubernator narazıdır

“CNBC” isə yazır ki, qubernator Andrew Cuomo federal hökumətin koronovirus böhranını idarə etməsindən gileylənib.

“Federal məsuliyyət və hərəkətdən əminəmmi? Elə də əmin deyiləm”, – Cuomo gündəlik brifinqdə deyib.

Cuomo bundan qabaq deyirdi ki, federal hökumətin 2 trilyon dollarlıq iqtisadi xilas planı onun ştatına düşündüyündən də az fayda verəcək.

Qubernator Nyu Yorkdakı iqtisadi və humanitar böhranı 2001-ci ilin 11 sentyabr terroruyla müqayisə edib. O zaman Dünya Ticarət Mərkəzinin qoşa qüllələrinə hücum nəticəsində 3 minədək insan həlak olub.

“9/11 terroru dağıdıcı idi, faciəvi idi, indi isə bir çox Nyu yorklunu bu sakit qatil aparır”, – Cuomo söyləyib.

Demokrat qubernator Prezdent Donald Trump və digər federal rəsmilərlə sıx əməkdaşlıq edir. Onun böhran vaxtı prezidentlə münasibətləri əsasən yaxşıdır. Trump deyirdi ki, qubernatorların onun cəhdlərini “dəyərləndirməsini” istəyir.

Cuomo deyir ki, 2 trilyonluq paketdən onun ştatına cəmi-cümlətanı 1,3 milyard dollar ayrılıb. Nyu York 5-6 milyard dollar alacağını gözləyirdi. Cuomo hətta həmin vəsaiti qeyri-adekvat adlandırmışdı.

Qubernatorun sözlərinə görə, səhiyyə sisteminə 6 milyard dollarlıq yardım gözlədikləri halda, 1,3 milyard dollar ayrıldığını görüblər. “Bu yardım New York Medicaid proqramı üzvlərinin üçdə birini kənarda qoymuş oldu”, – o vurğulayıb.

“Federal hökumətin məsuliyyətli davranaraq köməyi dəyən qanunvericilik qəbul etməsini istəyirik”, – qubernator sözlərinə əlavə edib.

CNBC Ağ evdən Cuomo-nun dediklərinə şərh ala bilməyib.

XS
SM
MD
LG