Yanğın 1000 kv.metr ərazini əhatə edib
Dövlət Yanğından Mühafizə İdarəsinin Qərargah rəisi Əkbər Novruzov yanğınla bağlı açıqlama verib.
APA-nın xəbərinə görə, o deyib ki, yanğın bir saata yaxın davam edib: «23 texnika və 125 canlı qüvvə yanğının söndürülməsinə cəlb olunub. Yanğın 900-1000 kv.metr ərazini əhatə edib. Yanğın tam söndürülüb. Soyutma işləri aparılır. Yanğının səbəbi məlum deyil. Hazırda araşdırma aparılır».
Yanğın söndürülüb
«Sədərək» Ticarət Mərkəzində baş verən yanğının söndürüldüyü deyilir.
Bu barədə Fövqəladə Hallar Nazirliyindən (FHN) bildirilib.
Yanğınla əlaqədar araşdırma başladığı söylənir.
+++
Bu gün, fevralın 18-də səhər saatlarında Bakı şəhərinin Qaradağ rayonu, Lökbatan qəsəbəsində yerləşən «Sədərək» Ticarət Mərkəzində yanğın başlayıb.
Bu barədə Fövqəladə Hallar Nazirliyinin (FHN) yaydığı məlumatda bildirilir.
Məlumata görə, nazirliyin Dövlət Yanğından Mühafizə Xidmətinin və Xüsusi Riskli Xilasetmə Xidmətinin müvafiq qüvvələri hadisə yerinə cəlb olunub.
Hadisə yerindən verilən son məlumatlara görə, yanğın bir xeyli məhdudlaşdırılıb. Hazırda yanğının tam söndürülməsi üçün işlərin davam etdiyi bildirilir.
Hələlik, hadisənin nədən baş verdiyi açıqlanmır.
