Birləşmiş Ştatlar qəbul edəcəyi qaçqın sayını kəskin azaldacaq. Bu planı yekun olaraq Prezident Donald Trump təsdiqləməlidir.
Bu təklif daha öncə dini və humanitar qrupların kəskin tənqidinə səbəb olub. Onlar planı qəddar adlandırıb, Trump administrasiyasını ölkədəki hər iki siyasi partiyasının qaçqın qəbuluna daimi dəstəyini rədd etməkdə suçlayıb.
Yeni plan qəbul olunarsa oktyabrın 1-dən qüvvəyə minəcək. Plana görə, 2020-ci ildən ölkəyə 18 mindən artıq qaçqın qəbul edilməyəcək. Ötən il bu rəqəm 30 min idi.
Dövlət katibi Mike Pompeo noyabrın 2-də yekun rəqəmləri açıqlayaraq deyib ki, qaçqınların yerləşdirilməsi “ABŞ-ın humanitar əsaslı immiqrasiya işlərinin yalnız bir aspektidir”.
Pompeo onu da deyib ki, Birləşmiş Ştatlar böhranların həllindən ötrü diplomatik iş aparır və qaçqınlara öz regionlarında humanitar yardımla təmin edir.
Trump-ın sələfi Barack Obama-nın prezidentliyinin son ilində ABŞ 85 min qaçqın qəbul eləmişdi.
“The Associated Press” yazır ki, ABŞ 1980-ci ildə qaçqın proqramını işə salandan ötənilki 30 min rəqəmi ən aşağı göstərici olub.
