ABŞ Prezidenti Donald Trump Tehrana təzyiqi artırıb, Dövlət Departamentinə göstəriş verib ki, İran rəsmiləri və ailə üzvlərinin Birləşmiş Ştatlara immiqrant, yaxud qeyri-immiqrant kimi daxil olmasına qadağa qoyulsun.
Ağ evin sentyabrın 25-də verdiyi açıqlamada Trump İran hökumətini “Yaxın Şərqdə və kənarda sülhə və sabitliyə təhdid yaratmaq”da suçlayıb.
“Qərar vermişəm ki, İranın aparıcı hökumət rəsmilərinin və yaxın ailə üzvlərinin Birləşmiş Ştatlara immiqrant, yaxud qeyri-immiqrant kimi girişini məhdudlaşdırmaq və dayandırmaq Birləşmiş Ştatların maraqlarına uyğundur”, – Trump bildirir.
Məsələyə İran rəsmiləri hələlik, şərh verməyib.
Trump ötən ilin mayında İranla 2015-ci il nüvə sazişindən çıxaraq Tehrana sanksiyaları bərpa edəndən sonra iki ölkə arasında gərginlik artıb.
İranın 80 diplomatı Nyu Yorkdadır
Son addımdan bir neçə saat öncə İran Prezidenti Hassan Rohani BMT-nin Baş Məclisində çıxışında deyib ki, Tehran sanksiyalar altında qaldıqca nüvə proqramı üzrə danışıqlar aparmayacaq və Birləşmiş Ştatları “amansız iqtisadi terror”da suçlayıb.
Bu arada İranın 80-dən artıq diplomatı BMT-nin toplantısında iştirak etməkdən ötrü Nyu Yorkdadır.
“The New York Times” qəzetinin yazmasına görə, səyahət qadağasının onlara aid olacağı gözlənilmir. BMT-nin razılaşmasına görə, Birləşmiş Ştatlar xarici liderlərə BMT-nin qərargahına getməyə viza verir və onların Nyu Yorkda hərəkətini məhdudlaşdıra bilər.
Dövlət Departamentinin sözçüsü “Reuters”ə deyib: “İran hökuməti dünyanın terrorçuluğa sponsorluq edən əsas ölkəsidir. Rejim neft və gəmiçilik infrastrukturuna hücumlarla Fars Körfəzi regionunda sabitsizlik yaradıb. İran rejiminin aparıcı rəsmiləri və onların ailə üzvlərinə Birləşmiş Ştatlara səyahəti davam etdirməyə icazə vermək bizim maraqlarımıza ziddi, İranın hərəkətlərinə göz yummaq olar”. Sözçü Tehranın Yəməndə husi üsyançılara, İraq və Suriyada şiə yaraqlılara dəstəyini misal çəkib.
Trump-ın sərəncamında qadağaya bəzi istisnalar da nəzərdə tutulub, onların ABŞ-ın qanuni daimi rezidentlərə aid edilməyəcəyi bildirilir. Sığınacaq almış, ABŞ-a qəbul olunmuş qaçqınlar da qadağadan kənar qalacaq.
Bundan öncə isə ABŞ Xəzinədarlıq Departamenti Çinin 11 vətəndaşı və qurumuna sanksiyalar tətbiq edib, onları bilərəkdən ABŞ sanksiyalarını pozaraq İrana neft transferində suçlayıb.
