Moskvada məhkəmə üç övladını etiraz yürüşünə apardığına görə cütlüyü valideynlik hüququndan məhrum etməyib.
Nikulinski məhkəməsi sentyabrın 2-də prokurorluğun vəsatətinə mənfi cavab verib. Prokurorluq tələb edirdi ki, Pyotr və Yelena Khomsky-lər üç qızlarını avqustda nümayişə apardıqları üçün valideynlik hüququndan məhrum edilsinlər.
Dövlət telekanalları 3 avqust yürüşünə qatılmış cütlüyü üç aylıq, 3 və 10 yaşlı qızları ilə birlikdə göstərmişdi. Qızlardan ikisi uşaq arabasında idi.
Pyotr Khomsky süjetlərdə “peşəkar təxribatçı”, Kremlin tənqidçisi Aleksei Navalny-nin “mühafizəçisi” kimi təqdim olunub.
Khomsky yürüşə bilərəkdən getdiyini, ancaq heç bir plakat qaldırmadığını, şüar səsləndirmədiyini söyləyib.
Bundan öncə oxşar addım sıravi moskvalıların və insan haqları təşkilatlarının sərt tənqidinə səbəb olmuşdu.
Avqustun 6-da Moskva şəhər prokurorluğu Dmitry və Olga Prokazovlar cütlüyünün valideynlik hüququndan məhrum edilməsi haqda vəsatət qaldırmışdı. Onlar 27 iyul aksiyasına bir yaşlı oğullarını aparmaqda, uşağı təhlükəyə atmaqda, valideynlik vəzifələrini pozmaqda suçlanırdılar.
Müstəntiqlərin deməsinə görə, Prokazovlar oğullarını 27 iyul yürüşünə aparıb orada fəal Sergei Fominə veriblər ki, o, həbsdən yayınmaqdan ötrü uşaq əlində polis kordonundan keçə bilsin.
Cütlük isə deyirdi ki, Fomin Olga Prokazova-nın xalası oğlu və uşağın xaç atasıdır, yürüş zamanı uşağın qeydinə qalıb.
“Kütləvi iğtişaşda” iştirakda suçlanan Fomin barəsində həbs qətimkan tədbiri seçilib.
Son həftələr Moskvada keçirilən yürüşlərdə minlərlə etirazçı saxlanıb. Onlarla etirazçı icazəsiz yürüşün təşkili və onda iştiraka görə cərimələnib, yaxud həbsə məhkum edilib.
Etirazlar müxalifət və müstəqil namizədlərin Moskvada Duma seçkisinə buraxılmamasına qarşı keçirilib.
