ABŞ prezidentliyinə Demokratlardan iddialılar seçki kampaniyasının ilk teledebatını keçiriblər. Amerikalıların seçkiyə getməsinə 16 ay qalır.
26 iyun debatına 10 demokrat qatılıb. Onlar Donald Trump-ın ikinci müddətə prezident seçilməsini önləmək istəyirlər.
Ümumilikdə isə Demokrat partiyasından Trump-a rəqib olmaq istəyənlər 20 nəfərdir. Namizədlərin çoxluğu səbəbindən teledebatlar iki gecə keçirilir.
İranla sazişdə qalmağın tərəfdarlarıdır
İlk debatda ABŞ-ın daxili məsələləri müzakirə olunub: iqtisadiyyat, iş yerləri, səhiyyə və immiqrasiya. İranla gərginliyə də qısaca toxunulub. Namizədləri çoxu deyiblər ki, 2015-ci il nüvə sazişində qalmağın tərəfdarıdırlar. Trump ötən il ABŞ-ın sənəddən çıxdığını elan edib.
2020-ci ilin noyabr seçkisi kampaniyasının ABŞ-ın seçki tarixində ən bahalı və ağrılı seçkilərdən biri olacağı gözlənir. Bu, Trump-ın siyasəti, iki ildən çox hakimiyyətdə olduğu dövrdə reytinqinin azalmasıyla əlaqədardır.
Demokratlar içində ən çox tanınan iddialılar Prezident Barack Obama-nın vitse-prezidenti olmuş Joe Biden və 2016-cı ildə prezidentliyə namizədliyini vermiş senator Bernie Sanders-dir.
Namizədlər içində tanınmışlardan senator, Harvard professor Elizabeth Warren, Kaliforniyanın baş vəkili olmuş, senator Kamala Harris var.
Demokratlardan namizədliyə iddialıların sayı 2020-ci ilin fevralından azalmağa başlayacaq. Ştatlar praymeriz seçkiləri keçirəcək, nominasiya tədbirləri gerçəkləşəcək.
Partiyanın yekun namizədi 2020-ci ilin yayında, noyabr seçkisindən bir neçə ay öncə bilinəcək.
İndilik, Respublikaçılardan Trump-ın bircə rəqibi var, o da keçmiş ştat qubernatorudur.
