2050-ci ilədək Yer üzündə təxminən 9 milyard 700 milyonadək adam yaşayacaq. Ancaq əhalinin artım tempi xeyli azalacaq və bir çox ölkələr əhalinin qocalması problemiylə üzləşəcək. BMT əhali artımına dair yeni hesabatını açıqlayıb.
Hesabata görə, Hindistan əhalinin sayına görə Çini ötəcək və dünyanın ən çox əhali yaşayan ölkəsinə çevriləcək.
Hazırda dünyada 7,7 milyard nəfər yaşayır. Əsrin sonunadək bu rəqəmin 11 milyard nəfərə çatacağı proqnozlaşdırılır.
Pew araşdırma mərkəzi bu hesabata söykənərək belə bir qənaətə gəlib ki, 22-ci əsrin əvvəlində əhali artımı praktik olaraq dayanacaq. Artım tempinin ən kəskin düşüşü 2050-2100-cü illər arası yaşanacaq. Proqnozlara görə, bu müddətdə planetdə əhali cəmi 1 milyard 300 milyon nəfər artacaq.
Dünyada doğum səviyyəsi azalır
BMT qeyd edir ki, 2027-ci ilədək Hindistanın əhalisi Çini keçəcək. Afrikada Saharadan cənubda əhali sayı isə iki dəfə yüksələcək. Ən yüksək əhali artımı 9 ölkədə gözlənir – Hindistan, Nigeriya, Tanzaniya, İndoneziya, Misir və Birləşmiş Ştatlardan. Ancaq hesabatda o da qeyd olunur ki, bu ölkələrdə əhali artımı dünyada doğum səviyyəsinin azalması fonunda baş verəcək.
1990-cı ildə hər anaya ortalama 3,2 uşaq düşürdü. 2019-cu ildə bu göstərici 2,5-ə düşüb, 2050-ci ilədəksə 2,2 uşağa düşəcəyi gözlənir.
Artıq bir sıra ölkələrdə əhali sayı azalmaqdadır. 2010-cu ildən bəri 27 ölkədə, yaxud ərazidə əhali sayında azı bir faizlik düşüş qeydə alınıb. 2050-ci ilədək 55 ölkədə əhalinin azı bir faiz azalacağı gözlənir. Bu ölkələrdən yarısında isə azı 10 faizlik azalma proqnozlaşdırılır.
2050-ci ilədək Yer üzündə hər altı adamdan birinin yaşı 65-dən yuxarı olacaq. 2018-ci ildə hər 11 nəfərdən birinin yaşı 65-dən çox olub. 2050-ci ilədək Avropa və Şimali Amerika əhalisinin dörddə biri 65-dən yaşlı olacaq. Bunun sosial təminata, pensiya və səhiyyə sisteminə dövlət xərclərini əməlli artıracağı gözlənir.
Bəzi hallarda əhalinin azalmasına emiqrasiya ciddi təsir göstərir. Müəyyən regionlarda əhalinin dəyişməsində isə miqrasiya axınının ciddi rolu var.
Banqladeş, Nepal və Filippin kimi ölkələrdən əhali miqrant kimi işləməyə gedir. Myanma, Suriya və Venesueladan isə zorakılıqda, silahlı münaqişədən qaçırlar.
Əhalinin azaldığı Belarus, Estoniya və Almaniya kimi ölkələrdə isə mühacirlərin boşluğu dolduracağı gözlənir.
