Keçid linkləri

2024, 29 Mart, Cümə, Bakı vaxtı 02:13

Moskvada “Meduza”nın müxbiri saxlanıb


Ivan Golunov
Ivan Golunov

Latviyada mənzillənən “Meduza” portalının araşdırmalar bölməsinin müxbiri Ivan Golunov Moskvada ​saxlanıb. Vəkili Dmitry Dzhulai​ BBC-yə danışıb ki, jurnalist metrostansiya yaxınlığında, mənbə ilə görüşə gedərkən saxlayıblar.

Golunov-u bir neçə əməliyyatçı əhatələyib, üstündə axtarış aparıblar və çantasında narkotik maddə tapıldığı bildirilir. Vəkili daha sonra jurnalistin mənzilində də narkotik maddə aşkarlanması barədə informasiya verildiyini deyib.

“Reuters” müstəntiqlə söhbət zamanı telefonun yaxınlığında olan jurnalistin sözlərini eşidib, Golunov onun üstünə iki paket naməlum maddə atıldığını deyib. Jurnalistin deməsinə görə, polis əməkdaşları onun telefonunu alıblar, 12 saat vəkili ilə danışmasına icazə verməyiblər.

Ivan Kolpakov
Ivan Kolpakov

Ekspertiza üçün nümunə götürülməyib

İyunun 7-də səhər vəkili Dmitry Dzhulai​ ilə görüşən Golunov ona saxlanandan sonra döyüldüyünü deyib. Onun sözlərinə görə, ifadə verərkən polis əməkdaşları onu döşəməyə yıxıb, biri yumruqla yanağına vurub. Vəkil jurnalistin sinəsindən təpikləndiyini də bildirib.

Ancaq döyülməsinə baxmayaraq, jurnalist təqsirini etiraf etməyib, baş verənləri provokasiya adlandırıb. “Əməliyyatçılar çox qaba işləyiblər”, – vəkil deyib.

Dzhulai söyləyib ki, polis əməkdaşları jurnalistin narkotiklərə toxunduğunu, yaxud istifadə etdiyini müəyyənləşdirməkdən ötrü əlindən və dırnaqlarından nümunə götürməkdən imtina ediblər.

Golunov Moskva hakimiyyətinin korrupsiyası barədə araşdırmaları ilə tanınıb. O, Moskvanın vitse-merinin qohumları barədə araşdırma aparıb, paytaxtdakı yenidənqurma işlərindən yazıb. 2,2 milyard rubl dəyərində bir layihəni ictimailəşdirəndən sonra bu məsələ üzrə tender təxirə salınıb.

“İvan Qolunovun peşəkar reputasiyası qüsursuzdur. O, təcrübəli, vicdanlı, qərəzsiz jurnalistdir. İşdən kənarda isə o, tanıdığımız adamlar içində ən təmizidir”, – “Meduza”nın rəhbərləri Galina Timchenko və Ivan Kolpakov bəyanatlarında bildirirlər.

“Golunov-un günahsız olmasından əminik. Həmçinin onun jurnalist fəaliyyətindən dolayı təqibə məruz qalmasını düşünməyə əsasımız var. Son aylar Vanya hədələnirdi; bunun hazırlanmaqda olan mətnlə bağlı olduğunu, kimdən gəldiyini təxmin edirik. Vanyanın kimin iradəsilə təqib olunduğunu aydınlaşdıracaq, bu informasiyanı ictimailəşdirəcəyik”, – bəyanatda vurğulanır.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG