Çinin Huawei telekommunikasiya nəhəngi bildirir ki, bu payızadək Çindəki smartfonlar və laptoplar üçün özünün əməliyyat sistemini buraxa bilər. Məlumat mayın 23-də yayılıb.
Sistemin beynəlxalq versiyası isə 2020-ci ilin birinci, yaxud ikinci rübündə hazır ola bilər, Huawei istehlakçı biznesi üzrə rəhbəri Richard Yu ABŞ-ın CNBC televiziyasına deyib.
Birləşmiş Ştatlar ötən həftə Huawei Technologies şirkətini qara siyahıya salıb, ABŞ şirkətlərinin onunla iş görməsini yasaqlayıb. Sonradan qadağalar nisbətən yüngülləşdirilib. Vaşinqton Huawei-ni milli təhlükəsizliyə zidd fəaliyyətdə suçlayır, Huawei inkar edir.
“Bunu etmək istəmirik”
Bu həftə isə Google qərar verib ki, Huawei cihazlarının Android əməliyyat sisteminə çıxışını qismən kəssin.
“Bu gün Huawei Microsoft Windows və Google Android sistemlərinə sadiqdir. Ancaq onlardan istifadə edə bilməsək, Huawei öz əməliyyat sistemini istifadə etməklə bağlı B planı hazırlayacaq”, – rəsmi deyib.
Çinin dövlətə məxsus “The Global Times” qəzeti bu həftə yazıb ki, “HongMeng” adlı platforma sınaqdan çıxarılır və tədricən Android sistemini əvəzləyəcək.
“Bunu etmək istəmirik, ancaq ABŞ hökuməti bizi buna vadar edəcək. Məncə, belə bir məsələ təkcə bizim üçün deyil, dəstəklədiyimiz ABŞ şirkətləri üçün də pis xəbərdir. Bunu etmək istəmirik, amma başqa həll yolumuz, seçimimiz yoxdur”, – Yu vurğulayıb.
ABŞ Ticarət Departamenti Huawei və 68 filialını qara siyahıya salsa da, bazar ertəsindən 90 günlük möhlət verib, yəni bəzi xidmətlər davam edəcək.
