Rusiyanın Saxa-Yakutiya regionunun rəhbəri əcnəbilərin bir sıra iqtisadi sektorlarda işə götürülməsini qadağan edən fərman imzalayıb. Bundan bir neçə gün öncə yerli qadını zorlamaqda şübhəli bilinən qırğız miqrant həbs olunmuşdu.
Aisen Nikolaev-in fərmanı region hökumətinin vebsaytında dərc olunub.
Sənəddə deyilir ki, əcnəbilər ticarət, şəhər nəqliyyatı, ərzaq və geyim istehsalı, tikinti, taksi xidmətləri və mühasibatlıq daxil 33 sektorda işə götürülə bilməzlər.
Bəyanatda Nikolaev-ə istinadla vurğulanır ki, fərman federal qanunvericiliyə “tam uyğundur”.
“ƏMƏK BAZARININ XÜSUSİYYƏTLƏRİ”
Sənədə görə, “Saxa-Yakutiya ərazisində əmək bazarının xüsusiyyətləri, işəgötürmə məsələsində Rusiya Federasiya vətəndaşlarına üstünlük verilməsinin vacibliyi” nəzərə alınır.
Son bir neçə həftə ərzində Moskvadan 4 min 900 kilometr şərqdə yerləşın Yakutsk şəhərində Orta Asiyadan miqrantlara hücumlar artıb.
Gərginlik polisin martın 17-də verdiyi bəyanatdan sonra yüksəlib. Polis bildirmişdi ki, 23 yaşlı qırğızıstanlı 36 yaşlı qadını oğurlayıb zorlamaqda şübhəli bilinərək həbs olunub.
Yakutsk polisinin martın 28-də bildirməsinə görə, ötən gecə dörd nəfəri saxlayıblar. Onlar “Orta Asiyadan miqrant”a məxsus ərzaq mağazasına hücumda ittiham olunurlar.
Martın 27-də sosial mediada yayılan videoda bir neçə nəfərin mağazada tərəzini əzdiyi, dükan sahibinə meyvə-tərəvəz atdığı, onu hədələdiyi və təhqir etdiyi görünürdü.
Polis saxlanan dörd şübhəlinin videosunu yayıb, biri deyir ki, hücum vaxtı içkili olublar.
Türkdilli yakutlar regionun 1 milyon əhalisinin təxminən yarısını təşkil edirlər.
Rusiyanın bir sıra şəhərlərində Orta Asiyadan əmək miqrantları ilə digər sakinlər, etnik ruslar arasında gərginlik yaşanır.
