Amerikalıların demək olar, yarısı hələ də düşünür ki, Prezident Donald Trump 2016-cı ildə prezident seçkisinə müdaxilə etməsi üçün Rusiyayla işləyib. Bunu Xüsusi prokuror Robert Mueller-in hesabatı açıqlanandan sonra keçirilmiş Reuters/Ipsos sorğusu üzə çıxarıb.
22 aylıq təhqiqatın nəticələrini öyrənən amerikalıların Trump-a daha müsbət yanaşmağa başladığı bəlli olub. Belə ki, hesabat Trump-ın seçki kampaniyasının Rusiyayla sövdələşməsinə sübut da tapmayıb, amma onu tam təmizə də çıxarmayıb.
PARTİYA MƏNSUBİYYƏTİNİN TƏSİRİ
Di gəl, sorğu göstərir ki, Baş prokuror William Barr-ın təhqiqatla bağlı dörd səhifəlik icmalı ictimaiyyətin prezidentlə bağlı fikrini çox da dəyişə bilməyib.
Mueller Trump-ın Rusiyayla iddia olunan əlaqələrini araşdırırdı. Bazar günü Barr-ın açıqladığı icmalda deyilir ki, Mueller tərəflər arasında sövdələşməyə sübut tapmayıb, ancaq prezidentin istintaqı əngəlləməsi məsələsində prezidenti təmizə də çıxarmayıb.
Əlbirlik və ədalətin əngəllənməsi ittihamları haqda soruşanda respondentlərin 48 faizi deyib ki, onlar “Trump-ın, yaxud onun kampaniyasından başqa birinin 2016-cı il seçkisinə təsir göstərməsi üçün Rusiyayla işləməsinə inanır”. Bir həftə öncə belə düşünənlərin sayı 6 faiz çox idi.
53 faiz deyib ki, “Trump Rusiyanın onun administrasiyasına təsirinə dair istintaqı dayandırmağa çalışıb”. Bu, bir həftə öncəkindən 2 faiz azdır.
İctimai rəy partiyalara görə də dəyişir, Trump-ın Rusiyayla əlbirliyinə və ədaləti əngəlləməsinə respublikaçılardan çox demokratlar inanır.
Reuters/Ipsos sorğunu Birləşmiş Ştatlarda bazar ertəsi və çərşənbə axşamı keçirib, yəni Mueller-in hesabatı açıqlanandan sonra. 1003 yetkin yaşlının onlayn cavabları toplanıb. Onlardan 948-i deyib ki, icmal barədə azından eşidiblər.
TRUMP-IN REYTİNQİ DƏ ARTIB
Trump-ın reytinqi də azacıq artıb. İndi amerikalıların 43 faizi onun işini bəyəndiyini deyir. Bu, bu il ən yüksək göstərici, ötən həftə keçirilən sorğudakından 4 faiz yüksəkdir.
Yanvardan bəri Trump-ı dəstəkləyən yetkin yaşlıların sayı 37-43 faiz arasında dəyişir.
Trump Mueller-in hesabatının onu tamamilə təmizə çıxardığını deyib, siyasi düşmənlərinə öz təhqiqatları ilə cavab verəcəyini deyib.
Demokratlar isə Barrı hesabatı tamamilə açıqlamağa çağırırlar. Respondentlərin əksəriyyəti də bu mövqeyi dəstəkləyir.
Barrın icmalı ilə tanış olanların yalnız 9 faizi deyib ki, Trymp-ın Rusiyayla əlaqələrinə dair düşüncəsini dəyişib. 57 faiz isə hesabatın tamını görmək istədiyini deyib.
Bütün yetkin yaşlıların 38 faizi Konqresdə Rusiya istintaqının davam etdirilməsini hədəfləyən demokratları dəstəkləyir.
39 faiz hesab edir ki, Trump “impiç olunmalıdır”, 49 faiz isə belə düşünmür.
