Keçid linkləri

Təcili xəbərlər
2020, 01 Noyabr, bazar, Bakı vaxtı 04:47

Pashinian Tusk ilə Dağlıq Qarabağı götür-qoy edib


Nikol Pashinian (solda) və Donald Tusk

Ermənistanın Baş naziri Nikol Pashinian və Avropa Şurasının Prezidenti Donald Tusk Brüsseldə görüşüblər. Onlar Yerevanla Avropa Birliyinin münasibətlərini, həmçinin Ermənistan-Azərbaycan Dağlıq Qarabağ münaqişəsini müzakirə ediblər.

Brüsseldə keçirilən danışıqlardan sonra Tusk jurnalistlərə deyib ki, AB “Ermənistanın demokratiyanın möhkəmləndirilməsi, vətəndaşları üçün daha yaxşı iqtisadi gələcək yaradılmasına doğru yolunu dəstəkləyəcək”.

O, tərəflər arasına hərtərəfli və genişləndirilmiş tərəfdaşlıq razılaşmasının hər iki tərəfə real faydalar verməsinə çalışdıqlarını, AB-nin Ermənistan mallarının ən böyük idxalçısı olduğunu vurğulayıb.

AB-YƏ "VİZASIZ SƏYAHƏT"

Pashinian deyib ki, o, Tusk ilə Ermənistan vətəndaşları üçün AB-yə vizasız səyahət məsələsini də götür-qoy edib.

“Ermənistan vətəndaşları yaxın gələcəkdə Avropa Birliyinə vizasız səyahət etmək imkanını səbirsizliklə gözləyirlər”, – Pashinian vurğulayıb.

Minsk qrupu həmsədrlərinin nazirlərlə Paris görüşü, 16 yanvar, 2019-cu il
Minsk qrupu həmsədrlərinin nazirlərlə Paris görüşü, 16 yanvar, 2019-cu il

Dağlıq Qarabağ münaqişəsinə gəlincə, Tusk qeyd edib ki, AB ATƏT-in Minsk qrupu həmsədrlərinin münaqişənin həlli yönündə fəaliyyətini “tamamilə dəstəkləyir”.

“Ermənistan və Azərbaycan liderlərinin son kontaktları məni ürəkləndirib”, – Tusk vurğulayıb.

“AB status kvonun davamlı olmamasına inanır. Münaqişənin hərbi yolla həlli yoxdur və beynəlxalq hüquqa uyğun olaraq siyasi həllini tapmalıdır”, – o deyib.

“Əhalinin sülhə hazırlanması həllə doğru vacib addımdır və biz bunu dəstəkləməyə hazırıq”, – Tusk bildirib.

Pashinian deyib ki, Yerevan AB-nin Dağlıq Qarabağ münaqişəsində “davamlı balanslı mövqeyini” qiymətləndirir.

“Bu, regionumuzda sülhə və təhlükəsizliyə dəyərli töhfədir. Mən Ermənistanın Dağlıq Qarabağ münaqişəsinin müstəsna olaraq sülh yoluyla həllinə tam sadiq olduğunu bir daha vurğuladım”, – o deyib.


Xatırlatma

Qarabağ münaqişəsi 1988-ci ildə Ermənistanın Azərbaycana ərazi iddiaları ilə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi, ona bitişik 7 rayon və bəzi əlavə kəndlər işğal edilib. Atəşkəs razılaşmasından sonra da cəbhədə tez-tez atəş səsləri eşidilməkdədir. Tərəflər, bir qayda olaraq, buna görə bir-birlərini ittiham edirlər.

Dağlıq Qarabağ münaqişəsinin həlli ilə bağlı sülh danışıqları ATƏT-in Minsk qrupu həmsədrlərinin vasitəçiliyi ilə aparılır. ABŞ, Rusiya və Fransa həmsədr dövlətlərdir.

XS
SM
MD
LG