Birləşmiş Ştatların Kanadadakı səfiri ölkənin BMT-də təmsilçisi postuna namizəddir. Bunu Prezident Donald Trump administrasiyasının rəsmiləri deyirlər.
Senat çoxluğunun lideri Mitch McConnell-in idarəsi fevralın 21-də deyib ki, bu nüfuzlu konqresmen Kelly Craft-ın BMT-dəki posta namizədliyini dəstəkləyir.
“O, prezidentlə danışıb və onun namizədliyini tövsiyə edib”, – McConnell-in sözçüsü Robert Steurer yerli qəzetlərdən birinə deyib.
Məsələdən xəbərdar iki nəfərin “Associated Press” agentliyinə deməsinə görə, Dövlət katibi Mike Pompeo və Milli təhlükəsizlik müşaviri John Bolton da Craft-ın potensial namizədliyini dəstəkləyir.
TRUMP-I DƏSTƏKLƏYİRLƏR
Craft Kentuki ştatındandır, kömür milyarderi Joe Craft-ın həyat yoldaşıdır. Onların hər ikisi Trump-ı 2016-cı seçki kampaniyasında dəstəkləyib, Respublikaçı Partiyasının əsas donorlarındandlır.
Craft 2007-ci ildə Prezident George W. Bush tərəfindən BMT-nin Baş Məclisinə alternativ nümayəndə təyin olunmuşdu.
Xəbər mediasının yazdığına görə, ABŞ-ın Almaniyadakı səfiri Richard Grenell və ABŞ Senatına keçmiş namizəd John James də BMT-dəki vəzifəyə potensial namizəddirlər.
Əvvəlki səfir Nikki Haley ötən ilin sonunda istefa verərək vəzifədən gedib.
Trump-ın bu posta ilk namizədi, Dövlət Departamentinin sözçüsü Heather Nauert ötən həftəsonu ailə səbəblərini əsas gətirərək namizədliyini geri götürüb. Demokratlar Nauertin yetərincə beynəlxalq diplomatik təcrübəsinin olmadığını deyirdilər.