Keçid linkləri

Təcili xəbərlər
2020, 24 Oktyabr, şənbə, Bakı vaxtı 13:31

Prezidentin oğlunun Rusiyadakı mülkündən yazırlar


Heydər Əliyev hərbi xidmətdə

Azərbaycan Prezidenti İlham Əliyevin oğlu Heydərin Moskvada Rublevo-Uspensky şosesində torpaq sahəsi və evi var. Bu haqda “Proyekt” nəşri Rusiyanın əmlak reyestrinə istinadla yazır.

“Sadı Mayendorf” qəsəbəsindəki sahənin 7 min kvadrat metrdən artıq, mülkün sahəsinin 1,6 min kvadrat metr olduğu bildirilir. “Proyekt” bu mülkün dəyərinin 2,3 milyard rubla (35 milyon dollara yaxın) yaxın olduğunu hesablayıb.

İqamətgah yaxınlığında Rusiya prezidenti və baş nazirinin mülkləri yerləşir.

Nəşr Heydər Əliyevin həmin mülkə 2007-ci ildə, doqquz yaşı olanda sahibləndiyini yazır. Reyestrə görə, əmlakı prezidentin qaynatası Arif Paşayev alandan bir il sonra nəvəsinə hədiyyə edib.

“Proyekt” prezident administrasiyasından sorğusuna cavab ala bilməyib.

Daha öncə jurnalistlərin OCCRP layihəsi Əliyevlər ailəsinin Rublyevkadakı evi barədə yazmışdı. Həmin evin sahibinin prezidentin böyük qızı Leyla Əliyevanın olduğu qeyd edilirdi.

***Buna da bax: Leyla Əliyevanın “daçası”

“Proyekt” yazır ki, Azərbaycan prezidenti və xanımının Bolşoy Yakimankada 136 kvadrat metrlik mənzilinin də olması mümkündür.

Transparency International təşkilatına görə, Azərbaycan korrupsiyanı qavrama indeksində 180 ölkə içində 152-ci yerdədir.

Qeyd edək ki, ilk dəfə “Washington Post” qəzeti prezidentin oğlunun Dubayda mülkü barədə yazmışdı. Ondan sonra müxtəlif nəşrlər prezidentin ailə üzvlərinin dünyanın müxtəlif yerlərində dəbdəbəli əmlakı haqda məlumat dərc edib. İndiyədək bu yazılanlara rəsmi reaksiya verilməyib.

Hakimiyyət təmsilçiləri ölkədə korrupsiyayla daimi mübarizə aparıldığını deyir, beynəlxalq qurumların tənqidlərini qəbul etmirlər. Onlar bu tənqidləri Azərbaycana qarşı xüsusi dairələrin gözdənsalma kampaniyası kimi dəyərləndirirlər.

Multimedia

XS
SM
MD
LG