ABŞ Prezidenti Donald Trump Meksikayla sərhədə baş çəkib, fövqəladə vəziyyət elan etməyə hazır olduğunu deyib.
Trump Texas ştatının McAllen şəhərinə səfər etdiyi gün hökumətin qismən bağlanmasının artıq 20-ci günü başlanıb. Hazırda 800 minədək federal işçi ya pulsuz işləyir, ya da məzuniyyətə buraxılıb.
Prezident sərhədin hasarlanmasını milli təhlükəsizlik məsələsi sayır, buna 6 milyard dollar tələb edir. Demokratlar isə imtina edir, Trump-ı immiqrasiya məsələsini şişirtməkdə suçlayır.
Trump səfəri zamanı deyib ki, narkotik maddələr və cinayətkarlıq böhranı yaranıb.
“Ya qalib gəlməliyik, kompromisə getməliyik – çünki düşünürəm ki, kompromis hamı üçün uduşdur, ya da fövqəladə vəziyyət elan edəcəyəm”, – Trump vurğulayıb.
TRUMP MƏSLƏHƏTLƏŞMƏLƏR APARIR
Bu arada yayılan məlumatlara görə, Trump Ağ evin vəkilləri ilə hasarın tikilməsinə görə birtərəfli addım atmaqdan ötrü prezident səlahiyyətindən istifadənin leqallığını götür-qoy edir.
Ancaq bu addım ziddiyyət yaradar, çünki Konstitusiyaya görə, xərcləmələrlə bağlı qərarlara Konqres nəzarət edir.
Nümayəndələr Palatasının demokrat spikeri Nancy Pelosi isə Trump-ı siyasi oyunlar aparmaqda suçlayıb.
Hökumətin qismən bağlanmasının (şatdaun) 20-ci günü – yanvarın 10-da yüzlərlə federal işçi Ağ evin qabağında etiraz aksiyasına yığışıb.
Etirazçılar Ağ evin qarşısında yürüş edib “Şatdauna son qoyun!” qışqırıb, “Trump: Şatdauna son qoy”, “Tətil yox, işləmək istəyirik” yazılmış plakatlar qaldırıblar.
Trump seçki kampaniyası zamanı Meksikayla sərhədin hasarlanması vədini verirdi. O deyib ki, hasara maliyyə nəzərdə tutulmayan heç bir sənədi imzalamayacaq.
Müdafiə departamenti kimi bəzi qurumlar işini davam etdirir. Ancaq Ədliyyə, Dövlət, Xəzinədarlıq, Daxili Təhlükəsizlik departamentləri ciddi təsirə məruz qalıb.