Keçid linkləri

2024, 19 Mart, çərşənbə axşamı, Bakı vaxtı 11:57

Trump Çin tariflərini təsdiqləyir


Donald Trump Pekində, 9 noyabr, 2017-ci il
Donald Trump Pekində, 9 noyabr, 2017-ci il

ABŞ prezidenti Donald Trump on milyardlarla dollarlıq Çin malına cəzalandırıcı tariflərin tətbiqi planını təsdiqləyib. Plan bu gün – iyunun 15-də təsdiqlənib.

“The Associated Press” agentliyi yazır ki, bu, prezidentin ticarət siyasəti ilə onun Koreya yarımadasını nüvə silahlarından azad etmək planını qarşı-qarşıya qoyur.

55 MİLYARD DOLLARLIQ MƏHSUL

Trump hələ seçki kampaniyası dövründə Çinin ədalətsiz hesab etdiyi ticarət praktikasıyla mübarizə aparacağını vəd edib. Di gəl, milyardlarla dollarlıq tarif çağırışları Çinin Şimali Koreya danışıqlarında dəstəyinə ziyan vura bilər.

ABŞ prezidenti bir gün öncə kabinetinin bir neçə üzvü və ticarət müşavirləri ilə görüşüb. Onun Çindən idxal olunan azı 35-40 milyard dollarlıq məhsula tarif qoyacağı gözlənirdi. Bunu planla tanış olan administrasya rəsmiləri deyiblər. Ümumilikdə isə tarif qoyulan malların ümumi dəyəri 55 milyard dollara çata bilər.

ABŞ dövlət katibi Mike Pompeo (solda) və Çin prezidenti Xi Jinping
ABŞ dövlət katibi Mike Pompeo (solda) və Çin prezidenti Xi Jinping

Prezident bu addımları atarsa, Pekin də cavab tədbirləri verə bilər. Trump artıq Kanada, Meksika və Avropa müttəfiqlərindən idxal olunan polada və alüminiuma tariflər tətbiq edib. Çinə tariflər isə dünyanın ən böyük iki iqtisadiyyatı arasında ticarət müharibəsinin başlanması deməkdir.

Çinin xarici işlər nazirliyinin sözçüsü Geng Shuang cümə günü deyib ki, Pekin dərhal reaksiya verəcək, “qanuni hüquq və maraqlarımızın qorunmasından ötrü gərəkən addımlar atacaq”.

Daha öncə Pekin də cavab tarifləri qoyulacaq 50 milyard dollarlıq ABŞ məhsulunun siyahısını açıqlamışdı. Buraya mal əti və soya paxlası daxildir ki, bu da Trump-ın kənd yerlərindəki tərəfdarlarına zərbə deməkdir.

«ETMƏLİ OLDUĞUMU ETMƏLİYƏM»

Trump bu həftə Şimali Koreya lideri Kim Jong Un-la sammit keçirib. O, Pxenyanın nüvə arsenalının ləğvindən ötrü Çinlə sıx koordinasiya işləri aparıb. Amma ticarətdə disbalansı tənzimləmək üçün “etməli olduğumu etməliyəm” siqnalını verib.

Çində uyğur satıcı qadın
Çində uyğur satıcı qadın

Prezident Sinqapurda mətbuat konfransında deyib ki, Birləşmiş Ştatların Çinlə “böyük ticarət defisiti var və bununla bağlı nəsə etməliyik. Bunun baş verməkdə davam etməsinə icazə verə bilmərik”.

2017-ci ildə ABŞ-ın Çinlə ticarət defisiti 336 milyard dollar olub.

Pekinin xarici şirkətlərdən texnologiyanı oğurlaması, yaxud onların sirlərini açıqlamaq üçün təzyiq göstərməsinə dair iddialar var.

Biznes cameəsi ticarət gərginliyinin artmasını narahatlıqla izləyir, Trump-ın hakimiyyəti dövründə əldə olunmuş iqtisadi artımın önlənəcəyi sarıdan əndişələr yaranıb.

“Hər şey tarif savaşıyla sonuclansa, bu, qiymət inflyasiyası, istehlakçı borcu deməkdir. Bütün bunlar iqtisadi yavaşımanın tarixi tərkib hissələridir”, – Trump-ın keçmiş iqtisadi müşaviri Gary Cohn “The Washington Post”un təşkil etdiyi tədbirdə deyib.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

Abunə

XS
SM
MD
LG