Ukraynada vətənə xəyanət ittihamıyla saxlanmış rusiyalı jurnalistin evində axtarış aparılıb. Məlumatı jurnalistin vəkili Andriy Domansky “Frans Pres” agentliyinə təsdiqləyib.
Daha öncə Rusiyanın xəbər agentlikləri RIA Novosti-Ukraynanın direktoru Kirill Vyshinsky-nin evində axtarış aparıldığını bildirmişdi.
Vyshinsky-nin həyat yoldaşının Ria Novosti Rusiya dövlət xəbər agentliyinə deməsinə görə, “hər şeyi aparıblar. Mənzilin altını üstünə çeviriblər”.
Mənzilin harda yerləşdiyi açıqlanmasa, Vyshinsky Ukraynanın Xerson şəhərində saxlanır. O, vətənə xəyanətdə ittiham olunur və təqsiri sübuta yetirilsə, 15 ilədək həbsə məhkum edilə bilər.
Kiyev polisi isə iyunun 4-də axtarış xəbərlərini təsdiqləməyib, bircə onu deyib ki, “cinayətdə şübhəlilərin müəyyənləşdirilməsi” üçün təhqiqat başladılıb.
Ukraynanın Təhlükəsizlik Xidməti (SBU) RIA Novosti-Ukrayna-nın əməkdaşlarına qarşı irimiqyaslı əməliyyat aparıb, həm ofislərini, həm mənzillərini axtarıb. Vyshinsky evinin yaxınlığında saxlanıb.
SBU daha sonra yaydığı bəyanatda bildirirdi ki, Ukraynaya qarşı hibrid müharibə aparan media strukturları şəbəkəsi aşkarlanıb.
REAKSİYALAR
Bu həbs Rusiyanın qəzəbli reaksiyasına səbəb olub. Prezident Vladimir Putin-in sözçüsü Vyshinsky-nun saxlanmasını, əgər işilə əlaqədardırsa, “biabırçı və qalmaqallı hərəkət” adlandırıb.
Rusiyanın Xarici İşlər Nazirliyi iyunun 3-də yaydığı bəyanatda “Vyshinsky-nin dərhal azadlığa buraxılmasını, ona qarşı ittihamların qaldırılmasını” tələb edib.
ATƏT-in media azadlığı üzrə təmsilçisi axtarışdan “ciddi narahatlığını” dilə gətirib, Ukrayna hakimiyyətini “xarici jurnalistlərin işinə gərəksiz məhdudiyyətlər qoymamağa” çağırıb.
“Propaqanda ilə mübarizə beynəlxalq standartlara uyğun olmalıdır, medianın fəaliyyətinə qeyri-mütənasib müdaxiləyə çevrilməməlidir”, – Harlem Desir bəyanatında bildirib.
Rusiya 2014-cü ildə Krımı ilhaq edəndən Moskvayla Kiyevin münasibətləri pisləşib. Rusiya həmçinin Ukraynanın şərqində separatçıları dəstəkləməkdə ittiham olunur. Ukraynadakı münaqişədə indiyədək 10 min 300-dən çox adam öldürülüb.