ABŞ mediasında yayılan məlumatlara görə xüsusi prokuror Robert Mueller Almaniyanın Deutsche Bank bankına müraciət edərək Donald Trump və onun ailə üzvlərinə aid hesablar barədə informasiyanı istəyib.
Reuters agentliyi dekabrın 5-də bu məsələ ilə tanış mənbələrə istinadən yazıb ki, Mueller bəzi pul və kredit tranşlarına dair məlumatların ona verilməsi üçün bir neçə həftə bundan əvvəl Almaniyanın ən böyük bankına tələbnamə göndərib.
Bu tələbnamə barədə məlumatı bundan əvvəl Almaniyanın Handelsblatt qəzeti vermişdi.
Bundan əvvəl buna bənzər tələbləri şəxsi sirlər barədə qanunlara söykənərək rədd edən Deutsche Bank Mueller-in müraciətinə necə cavab verdiyinə aydınlıq gətirməyib.
Mueller Rusiyanın 2016-cı il ABŞ seçkisinə müdaxiləsini və Trump-ın kampaniyası ilə Rusiya hökuməti arasında mümkün sövdələşməni araşdırır.
İndiyədək bu təhqiqatla bağlı 4 nəfərə qarşı cinayət işi qaldırılıb.
Ötən oktyabrda Trump seçki kampaniyasının keçmiş başçısı Paul Manafort və onun biznes şəriki Rick Gates-ə qarşı federal orqanlara yalan məlumat vermək ittihamı üzrə cinayət işi qaldırılıb.
Trump-ın keçmiş xarici işlər müşaviri George Papadopoulos da FTB agentlərinə yalan danışdığını etiraf edib və Mueller-in təhqiqatı ilə əməkdaşlıq etməyə hazır olduğunu bildirib.
