Keçid linkləri

Təcili xəbərlər
2022, 24 Sentyabr, şənbə, Bakı vaxtı 21:01

Dünya xəbərləri

AB-dən Serbiyaya xəbərdarlıq

Belçikada Avropa parlamenti

Hərbi cinayətlərdə təqsirli bilinmiş generalın hərbi akademiyaya mühazirəçi təyin olunması Avropa Birliyinin (AB) prinsiplərinə ziddir. Bu xəbərdarlığı AB Serbiyaya edib.

Təqaüddə olan general Vladimir Lazarevic BMT müharibə cinayətləri tribunalı tərəfindən 14 illik həbsə məhkum edilib. O, 1998-99-cu illərdə Kosovoda müharibə zamanı serb əsgərlərinin törətdiyi vəhşiliklərdə təqsirli bilinib.

Lazarevic 2015-ci ildə, cəzasının üçdə ikisini çəkəndən sonra buraxılıb.

AB-nin sözçüsü Maja Koncijancic oktyabrın 30-da yaydığı bəyanatda deyib ki, “siyasi liderlərin keçmiş münaqişə qurbanlarının xatirəsinə sayqıyla yanaşacağını, Qərbi Balkanlarda barışığı təbliğ edəcəyini gözləyirik”.

Serbiya rəsmən AB üzvlüyünə çalışsa da, bəzi aparıcı siyasətçiləri və nazirləri 1990-cı illərin millətçi siyasətinə qayıtmağı təbliğ edir.

Lazarevic Kosovodakı serb əsgərlərinin komandiri olub. Belqradın etnik alban separatçılara qarşı əməliyyatları zamanı 10 mindən çox insan həlak olub.

1999-cu ildə NATO-nun 78 gün ərzində endirdiyi bombardman qan tökülməsini dayandıra bilib.

Kosovo 2008-ci ildə müstəqillik elan etsə də, Serbiya onu tanımır.

Lazarevic ötən həftə akademiyada ilk mühazirəsini oxuyub.

Bütün xəbərləri izləyin

Avropa Şurasının rəhbəri Rusiyanı BMT Təhlükəsizlik Şurasından çıxarmağa çağırır

Çarlz Mişel , Brussel, 1 mart 2022

Avropa Şurasının prezidenti Çarlz Mişel hesab edir ki, Rusiya Birləşmiş Millətlər Təşkilatının (BMT) Təhlükəsizlik Şurasından kənarlaşdırılmalıdır.

"BMT Təhlükəsizlik Şurasının daimi üzvü səbəbsiz və əsassız müharibəyə - BMT Baş Assambleyası tərəfindən qınanılan müharibəyə başladıqda, onun BMT Təhlükəsizlik Şurasındakı üzvlüyünün dayandırılması avtomatik olmalıdır", - Çarlz Mişel Nyu-Yorkda BMT Baş Assambleyasının sessiyada çıxış edərkən deyib.

Sessiyadan kənarda Mişel "politico.eu" -ya Rusiya prezidenti Vladimir Putinin sentyabrın 21-də elan etdiyi səfərbərlikdən qaçan ruslarla bağlı vəziyyəti şərh edib. O deyib ki, Avropa İttifaqı (Aİ) “Kremldən alət kimi istifadə olunmasını istəməyənlərə açıq olmalıdır”.

Mövzunun Aİ səfirlərinin bazar ertəsi, sentyabrın 26-da keçiriləcək görüşündə müzakirəsi planlaşdırılır.

Ukrayna prezidenti Volodimir Zelenski dəfələrlə Rusiyanın BMT Təhlükəsizlik Şurası və qurumun digər strukturlarından xaric edilməsinə çağırıb.

Rusiya Böyük Britaniya, ABŞ, Çin və Fransa ilə birlikdə BMT Təhlükəsizlik Şurasının daimi üzvüdür.

Bu beş ölkənin hər birinin Təhlükəsizlik Şurasının qətnamələrinə veto qoymaq hüququ var.

NYT: Putin generallardan Xersonu tərk etməməyi tələb edib

Ukrayna hərbçiləri, 14 sentyabr 2022

“New York Times” ABŞ hökumətindəki mənbələrə istinadən yazır ki, son həftələrdə Rusiya prezidenti Vladimir Putin Ukraynadakı hərbi əməliyyatlarda bəzi strateji qərarları öz üzərinə götürüb.

Qeyd olunur ki, Putin Ukraynaya hücumun ilk vaxtlarında işğal olunmuş Xersondan Rusiya qoşunların çıxarılması ilə bağlı komandirlərinin xahişlərini rədd edib.

Beləki komandanlıq hesab edir ki, qoşunların Xersondan mütəşəkkil şəkildə çıxarılması texnika və canlı qüvvələri Ukrayna ordusunun hücumlarından qoruya bilər.

Ukrayna ordusu Dnepr çayı üzərindəki körpünü yarasız hala saldığından Rusiya qoşunları arasında əlaqə kəsilib, körpü texnikanın ötürülməsi üçün yararsızdır.

Yaranmış bu vəziyyətə baxmayaraq Putin orduya Xersondan geri çəkilməyə icazə vermir. Məqaləyə görə, bu, onun üçün alçaldıcı məğlubiyyət kimi görünə bilər.

Qəzet yazır ki, tərk etməmək qərarı şəhərdəki Rus qoşunlarının əhval-ruhiyyəsinə zərbə vurub.

Xerson Rusiya ordusunun ələ keçirdiyi yeganə regional mərkəzdir.

ABŞ kəşfiyyatının məlumatına görə, Putin komandirlərə hərbi əməliyyatların sonrakı gedişi ilə bağlı strateji qərarları məhz ozü verəcəyini bildirib ki, bu, da yüksək rütbəli zabit heyətinin narazılığına səbəb olub.

Məlumata görə, hərbçilər Kiyevin tez bir zamanda ələ keçirilməsi üçün ilkin strateji planın mümkünlüyünə də şübhə ilə yanaşırmış.

Onlar hesab edirdilər ki, bunun üçün daha çox əsgər və texnika lazımdır.

“New York Times” yazır ki, elə Putin səfərbərliyinin başlanması haqqında fərmanı Rusiya ordu komandanlığının tövsiyəsi əsasında verib.

Qəzetə verdiyi müsahibədə ABŞ Silahlı Qüvvələrin Baş qərargah rəisi General Mark Milley hazırda strateji təşəbbüsün ukraynalılara keçdiyini, lakin onların qarşıda “uzun bir yol”u olduğunu deyib.

Rusiya fevralın 24-də Ukraynaya hücum edib. Bu müddət ərzində ölkənin bir sıra şəhər və qəsəbələri dağıdılıb, minlərə adam həlak olub, milyonlarla insan ölkədən qaçqın düşüb. Beynəlxalq aləm Rusiyanın bu addımını pisləyir və qoşunlarını Ukraynadan çıxarmağa çağırır.

Rəsmi Moskva isə qonşu Ukraynaya qarşı apardığı müharibəni "xüsusi hərbi əməliyyat" adlandırır. Bundan başqa "müharibə" sözündən istifadə edənlər, "müharibəyə yox" deyənlər, o cümlədən Rusiya müdafiə nazirliyinin rəsmi məlumatlarından fərqli xəbərlər verən fərdlər və KİV-lər cəzalandırılır.

Qazaxıstan bankı Rusiyanın 'Mir' kartından istifadəni dayandırır

Qazaxıstanın ən böyük bankı Halık Bank ABŞ Maliyyə Nazirliyinin sanksiya xəbərdarlığından sonra Rusiyanın Mir ödəniş kartlarından istifadəni dayandırıb.

Vaşinqton xəbərdarlıq etmişdi ki, Rusiyaya sanksiyalardan yayınmaqda kömək edən ölkə və şirkətlərə də sanksiyalar qoyulacaq.

Vyetnamın BIDV bankı da Mir kartlarından istifadəıni dayandırıb.

Halık Bank sentyabrın 21-də Rusiyanın İzvestiya qəzetinə bildirib ki, bu bankın terminallarında Mir kartlarından istifadə mümkün olmayacaq.

BIDV bank da İzvestiya qəzetinə eyni informasiyanı verib.

İki həftə əvvəl Türkiyənin İşbank və DenizBank bankları Mir kartları ilə bankomatlardan pul çıxarılmasını bloklamışdı.

Rusiya Ukraynaya müdaxilədən sonra bildirmişdi ki, onun Mir ödəniş sistemi Rusiyaya dost ölkələrdə işləyəcək.

Sentyabrın 20-də Reuters adları çəkilməyən iki ABŞ administrasiya rəsmisinə istinadən yazırdı rəsmilər İşbank və DenizBankın Mir ödəniş sistemindən imtinasını “ağıllı addım” adlandırıblar.

Gürcüstan bankında girov böhranı şübhəlinin həbsi ilə başa çatıb

Hadisə yeri

Gürcüstan bankında 9 saata yaxın davam etmiş girov böhranı girovçunun həbsi ilə başa çatıb

Gürcüstan bankında 9 saata yaxın davam etmiş girov böhranı girovçunun həbsi ilə başa çatıb.

Bu barədə sentyabrın 20-də Gürcüstan DİN məlumat verib.

Məlumatda deyilir ki, əməliyyat zamanı xəsarət alan olmayıb.

Nazirliyin məlumatına görə xüsusi polis birliyi adı yalnız Q.N. hərfləri ilə verilən 1985-ci il təvəllüdlü şübhəlini saxlaya bilib.

Kutaisidəki banklardan birində 14 nəfəri girov götürən şübhəli özünü partladacağı ilə hədələyirdi.

Şübhəli banka sentyabrın 20-də yerli vaxtla saat 11:00-da daxil olmuşdu və ona 2 milyon dollar nağd pul, Sprinter avtomobili, helikopter, Rusiya bayrağı və balıqçı tilovunun verilməsini tələb edirdi.

Media söhbətin Qriqol Narsiyadan getdiyini bildirir, lakin bu məlumat rəsmən təsdiq edilməyib.

Gürcüstanda bankda girov götürülənlər var

Gürcüstanın qərbi Kutaisi şəhərində bank qarətçisi olduğu bildirilən şəxs 10-dan çox adamı girov götürüb.

Daxili İşlər Nazirliyinin sentyabrın 20-də yaydığı məlumata görə, xüsusi polis bölmələri Kutaisidəki Şota Rustaveli prospektində yerləşən “Bank of Georgia”nın binasında girov götürmə böhranını həll etmək üçün “gərəkən bütün tədbirləri” görür.

Məktəbə 8 saatlıq yol? Astarada uşaqlar dərsə getmirlər deyə, nə saymağı, nə də adlarını yaza bilirlər.
Gözlə

No media source currently available

0:00 0:04:58 0:00

Bu bəyanatdan az öncə mediada yayılan xəbərlərə görə, naməlum bir şəxs bankın Kutaisi filialını qarət etməyə çalışıb. Ancaq polis hadisə yerinə çox tez gəlib deyə, o, azı 10 nəfəri, o cümlədən bank işçiləri və müştərilərini girov götürüb.

Ölkənin ən böyük bankı olan “Bank of Georgia” birinci dəfə deyil belə bir insidentlə gündəmə gəlir.

2020-ci ilin oktyabrında hərbi geyimdə maskalı silahlı bankın Zuqdudi şəhərindəki filialında 43 nəfəri girov götürüb. O, açıqlanmayan məbləğdə nağd ABŞ dolları ilə qaça bilib. O vaxtdan həmin şəxs yaxalanmayıb.

Meymunçiçəyi xəbərdarlığı – əcnəbilərə toxunmayın

ABŞ-da meymunçiçəyinə qarşı peyvənd məntəqəsi

Rəsmi əhalini həmçinin son üç həftə ərzində xaricdə olmuş şəxslər, həmçinin bütün “əcnəbilər”lə “dəri təması”ndan çəkinməyə çağırıb

Çinin aparıcı səhiyyə rəsmisi vətəndaşlara tövsiyə edir ki, meymunçiçəyinin yayılmasını önləmək üçün əcnəbilərlə fiziki təmasdan qaçsınlar. Çinin əsas hissəsində artıq bu virusa ilk yoluxma aşkarlanıb.

“Mümkün meymunçiçəyi yoluxmasını önləmək və sağlam həyat tərzimizin tərkib hissəsi olaraq tövsiyə edilir ki, 1) əcnəbilərlə birbaşa dəri təmasında olmayın”, – Çin Xəstəliklərə Nəzarət və Qarşısının Alınması Mərkəzinin baş epidemioloqu Vu Zunyu sentyabrın 18-də rəsmi Weibo səhifəsində yazıb.

Rəsmi əhalini həmçinin son üç həftə ərzində xaricdə olmuş şəxslər, həmçinin bütün “əcnəbilər”lə “dəri təması”ndan çəkinməyə çağırıb.

Sentyabrın 16-da cənub-qərbi Çonqqinq şəhərində xaricdən gəlmiş bir nəfərdə meymunçiçəyi virusu aşkarlanıb.

Dünya Səhiyyə Təşkilatı bu virusla əlaqədar qlobal fövqəladə vəziyyət elan edib.

Yoluxmuş şəxslər, heyvanlar, çirklənmiş materiallarla sıx təmasla keçən virus çiçək xəstəliyinə oxşar, amma daha yüngül simptomlara, məsələn, qızdırma, başağrısı, səpkiyə səbəb olur.

Adətən 2-3 həftə çəkən xəstəlik nadir hallarda təhlükəli ağırlaşmalar verir.

Spitakda zəlzələ olub

Arxiv foto

Sentyabrın 18-i saat 08:04-də Ermənistanın Spitak şəhərindən 5 km cənub-şərqdə 3 bal gücündə zəlzələ qeydə alınıb.

Bu barədə "Azatutyun" Ermənistan Fövqəladə Hallar Nazirliyinə istinadla məlumat yayıb. Məlumatda qeyd olunur ki, episentrdə zəlzələnin gücü 4 bal olub. Zəlzələ Lori vilayətinin Spitak və Vanadzor şəhərlərində, eləcə də bir sıra ona bitişik icmalarda 3 bal gücündə hiss olunub.

Dağıntı və insan təlafatı barədə hər hansı məlumat verilmir.

1988-ci il dekabrın 7-də Spitakda güclü zəlzələ olub. Baş verən zəlzələ Leninakan (indiki Gümrü) və Spitak şəhərlərini demək olar ki, yer üzündən silib.

Rəsmi məlumata görə, zəlzələ nəticəsində ümumilikdə təxminən 25 min adam ölüb, 10 minlərlə insan əlil olub, 100 minlərlə adamsa evsiz qalıb.

Ən çox itki indiki Gümrü şəhərində olub - 17 min nəfər. Zəlzələnin mərkəzində, Spitakda isə 4 min adam ölüb.

Zəlzələ nəticəsində həmçinin, Kirovakan şəhəri də daxil olmaqla, onlarla şəhər və ətraf kəndlərə ziyan dəyib.

O zaman Azərbaycanla münaqişə vəziyyətində olan Ermənistana Bakıdan humanitar yardım aparan «İl-76» təyyarəsi də Ermənistanın hava məkanında müəmmalı şəkildə qəzaya uğramış, yardıma gedən 78 azərbaycanlı könüllü həlak olmuşdu

'Dosye' və 'EUobserver'in iddiası: AŞPA rəhbərliyi Rusiya kəşfiyyatı ilə bağlıdır

AŞPA, Strasburq, 25 aprel 2017

Araşdırmada iddia olunur ki, AŞPA-nın əvvəlki prezidenti Pedro Aqramunt, onun sələfi Rene van der Linden və təşkilatın keçmiş baş katibi Bruno Aller də Kremlin təsir şəbəkəsində olublar

Avropa Şurası Parlament Assambleyasının (AŞPA) prezidenti Tini Koks (Tiny Kox), assambleyanın bir neçə əvvəlki sədri və keçmiş baş katib Rusiya hərbi kəşfiyyatının (QRU) maraqları sferasında olub.

Koksun bu vəzifəyə seçilməsinə bir neçə il ərzində QRU-nun əməkdaşı tərəfindən lobbiçilik edilib. Bu barədə "Dosye" mərkəzi və "EUobserver" nəşrinin araşdırmasında deyilir.

Koks Hollandiyadan olan senatordur. O, Rusiyanın Ukraynaya hücumundan sonra, yanvarın sonunda sədr vəzifəsinə keçib. Araşdırmada Koks rusiyayönlü siyasətçi adlandırılır. Qeyd olunur ki, o, Rusiya nümayəndə heyətinə səlahiyyətlərinin qaytarılmasını dəstəkləyib.

Toni Kox, arxiv foto
Toni Kox, arxiv foto

Həmçinin o da vurğulanır ki, Krımın ilhaqı və Donbasdakı separatçıları dəstəklədiyinə görə səsvermə hüququndan məhrum edilən Rusiya nümayəndə heyətinin AŞPA sessiyalarında iştirakını Koks müdafiə edib.

Araşdırmaçıların fikrincə, Koksun AŞPA-ya sədr seçilməsi ideyası da ilk dəfə 2017-ci ilin yayından gec olmayaraq Moskvada yaranıb.

"Dosye"-nin araşdırmasında iddia olunur ki, AŞPA-nın əvvəlki sədri, 2017-ci ildə Rusiya nümayəndə heyəti ilə Suriyaya səfər edən və sonra istefaya məcbur edilən ispanyalı Pedro Aqramunt, onun sələfi hollandiyalı Rene van der Linden və təşkilatın keçmiş baş katibi fransalı Bruno Aller də Kremlin təsir şəbəkəsində olublar.

İddiaya görə, adı çəkilən şəbəkənin əsas koordinatoru, Rusiyanın Strasburqdakı baş konsulu Valeri Levitski olub. O da vurğulanır ki, V. Levitski 2018-ci ilin aprelində, Böyük Britaniyada keçmiş rus kəşfiyyatçı Sergey Skripal və qızına qarşı sui-qəsd cəhdindən az sonra QRU agenti kimi Fransadan qovulub.

İndi onun Rusiya Dövlət Dumasının beynəlxalq əməkdaşlıq şöbəsinin müdir müavini vəzifəsində çalışdığı qeyd edilir. Qovulmasını şərh edən Levitski isə kəşfiyyatda iştirakını inkar edib.

"Dosye"yazır ki, Krımın ilhaqından əvvəl də Rusiya hakimiyyəti Avropa İnsan Haqları Məhkəməsinin (AİH) qərarlarına tabe olmamağın- o cümlədən YuKOS-un keçmiş səhmdarlarına təzminat ödəməməyin yollarını axtarıb.

“Sənədlərdən göründüyü kimi, bu prosesdə başqa bir vasitə Kremlin Avropa Şurasının siyasətinə daxildən təsir etmək cəhdləri olub – xüsusən də gizli şəkildə ən yüksək səviyyədə əməkdaşlığa cəlb etməklə”, – deyə jurnalistlər qeyd edirlər.

Araşdırmaçılar bildirilər ki, 2014-cü ildə Rusiya nümayəndə heyətinin səlahiyyətlərinə məhdudiyyətlər tətbiq edildikdən qısa müddət sonra Levitski Koksun qeyd olunduğu “AŞPA əlaqələrinin siyahısı” nı tərtib edib. Koksun AŞPA sədrliyinə namizədliyini irəli sürmək ideyasınının da ilk dəfə məhz Levitskidən gəldiyi bildirilir.

“Dosye” nin materialına görə, bu, AŞPA-nın keçmiş baş katibi Bruno Aller ilə görüş zamanı baş verib. Araşdırmaçılara görə, görünür o da Rusiya tərəfi ilə də əməkdaşlıq edib.

Araşdırma aparan jurnalistlərin fikirincə, van der Lindenin rolunun ən açıq nümunəsi Levitskinin 2017-ci ildə hazırladığı hesabatla bağlı ola bilər. Beləki həmin hesabatda Levitski Rusiya nümayəndə heyəti ilə birgə Suriyaya səfərinə görə qalmaqalın mərkəzində olan Pedro Aqramuntu xilas etmək planını açıqlayıb.

Pedro Aqramunt, AŞPA-nın keçmiş prezidenti, 10 oktyabr 2016
Pedro Aqramunt, AŞPA-nın keçmiş prezidenti, 10 oktyabr 2016

Levitskinin sözlərinə görə, Aqramuntun səlahiyyət müddətinin başa çatmasına kömək etmək üçün nizamnamənin şərhi üçün Avropa Şurası yanında konstitusiya hüququ üzrə məsləhətçi orqan olan Venesiya Komissiyasına müraciət etmək lazımdır. Belə olanda Aqramuntun vəzifədən uzaqlaşdırılması məsələsi yubanacaq və o, vəzifəsində daha çox qala biləcək. Levitskinin fikrinə görə, Rene van der Linden bu planı Koksa çatdırmalı, o isə icraata nail olmalı idi.

"Dosye"nin qeyd etdiyinə görə, sanksiyaların ləğvi üzərində işləməkdən əlavə, Koks özü rus siyasətçilərinə qeyri-rəsmi görüşlər də təklif edib. Məsələn, 2017-ci ilin dekabrında o, Rusiya parlamentarilərindən ibarət nümayəndə heyətinin, o cümlədən Liberal Demokrat Partiyasının hazırkı rəhbəri Leonid Slutskinin AŞPA Prezident Komitəsinin Parisdə keçiriləcək iclasına dəvət olunmasını təmin edib.

Araşdırmaçıların qənaətincə, AŞPA kəşfiyyat və mənbələrin ələ alınması üçün ideal yer olaraq qalır. Nəşr yazır ki, 46 ölkədən parlamentarilər buraya toplaşır və bu o deməkdir ki, AŞPA-da əldə olunan təsir asanlıqla yayılır.

"Dosye" həmçinin belə nəticəyə gəlir ki, Rusiyanın Avropa Şurasından kənarlaşdırılmasına baxmayaraq məsələ araşdırılmadıqca qurumun əsas üzvlərinin Kreml və QRU ilə gizli əlaqələri ilə bağlı vəziyyət dəyişməz qalır.

Tini Koks "EUobserver" ilə söhbətində Rusiya kəşfiyyat xidmətləri ilə əlaqəsini inkar edib. Koks Ukrayna məsələsində Moskvaya qarşı sərt mövqe tutur. AŞPA onun rəhbərliyi altında Rusiyanın Avropa Şurasından çıxarılması ilə bağlı tövsiyə qəbul edib.

Pelosi Ermənistana səfərini təsdiqlədi, 'detalları' açmadı

ABŞ Nümayəndələr Palatasının spikeri Nensi Pelosi

ABŞ Nümayəndələr Palatasının spikeri vurğulayıb ki, onun səfəri bugünlərdə Ermənistan-Azərbaycan sərhədində baş vermiş toqquşmalardan xeyli əvvəl planlaşdırılıb

ABŞ Nümayəndələr Palatasının spikeri Nensi Pelosi bu həftəsonu Ermənistana səfər edəcəyinə dair xəbərləri təsdiqləyib.

Pelosinin bu təsdiqindən əvvəl Ermənistanın Müdafiə Nazirliyi Azərbaycanla Ermənistan arasında atəşkəsin hələki pozulmamasına dair məlumat vermişdi.

Senyabrın 16-da Berlində danışan Pelosi deyib ki, o Ermənistana sentyabrın 17-də ABŞ nümayəndə heyəti ilə birgə gələcək:

"Sabah biz Ermənistana səfər edirik, çünki ermənilərdən uzun müddət bundan əvvəl dəvət almışdıq. Mən bu səfərin detallarını müzakirə etmək istəməzdim, çünki biz səfər zamanı hədəflənmək istəmirik. Odur ki, əvvəlcədən heç nə deməyəcəyəm”.

Pelosi vurğulayıb ki, onun Ermənistana səfəri bugünlərdə Ermənistan-Azərbaycan sərhədində baş vermiş toqquşmalardan xeyli əvvəl planlaşdırılıb.

Qaribaşvili Filip Rikerlə görüşüb

İrakli Qaribaşvili (sağda) və Filip Riker

Gürcüstanın Baş naziri İrakli Qaribaşvili sentyabrın 12-də ABŞ-ın Qafqaz üzrə Baş məsləhətçisi Filip Rikerlə görüşüb. Bu haqda Qaribaşvili özü Twitter-də yazıb.

“ABŞ-ın elçisi Filip Rikerlə görüşdən məmnunam. Regional dinamikanı, Gürcüstanın Aİ-yə inteqrasiyasını, eləcə də Gürcüstanla ABŞ-ın strateji tərəfsaşlığını, ABŞ-ın regionda və kənarda sülhün, demokratiya və inkişafın irəli aparılmasındakı vacib rolunu müzakirə etdik”, – Baş nazir yazıb.

ATƏT-in Minsk qrupuna yeni təyin olunmuş həmsədri Filip Riker sentyabrın 9-da Ermənistanda Xarici işlər naziri Ararat Mirzoyanın görüşündə “Dağlıq Qarabağ problemi ilə bağlı geniş spektrli məsələlər” müzakirə edilib.

ABŞ diplomatının Gürcüstandan sonra Azərbaycana səfər edəcəyi gözlənilir.

ABŞ Dövlət katibi Entoni Blinken iki həftə öncə Filip Rikeri ATƏT-in Minsk qrupuna həmsədr və Qafqazda danışıqlar üzrə baş məsləhətçi təyin edib.

2020-ci ildə 44 günlük müharibəylə Qarabağın bir hissəsinə və ətraf 7 rayona nəzarəti bərpa edən Azərbaycan Dağlıq Qarabağ münaqişəsinin tarixdə qaldığını bildirir. Rəsmi Bakı Rikerin Minsk qrupu həmsədri kimi təyinatına sərt reaksiya verib.

ATƏT-in Minsk qrupu 30 ilə yaxın sülh danışıqlarına vasitəçilik edib. Ancaq müharibə bitəndən sonra Prezident İlham Əliyev bəyanatlarında Dağlıq Qarabağ münaqişəsinin artıq mövcud olmadığını, ATƏT-in Minsk qrupu həmsədrlərinin işinin bitdiyini bildirib.

ABŞ-ın yüksək rütbəli rəsmiləri isə Minsk qrupunun həmsədrliyinə dəstək bildiriblər.

Zaporojye AES-in sonuncu işləyən bloku da dayandırılıb

Ukrayna, Zaporojye AES, 1 sentyabr 2022

Sentyabrın 11-i gecə Zaporojjya Atom Elektrik Stansiyasının (AES) sonuncu işləyən 6-cı enerji bloku da elektrik şəbəkəsindən ayrılıb.

Bu barədə Ukraynanın “Enerqoatom” konserni məlumat yayıb. Zaporojye AES-i Zaporojye vilayətinin Rusiyanın işğal etdiyi Enerqodar şəhərindədir.

Enerji blokunun dayanması ilə bağlı xəbəri işğalçı tərəf də təsdiqləyib. “Enerqoatom”un məlumatına görə, Rusiya ordusunun atəşi nəticəsində Zaporojye atom elektrik stansiyasının Ukrayna enerji sistemi ilə birləşdirən bütün kommunikasiya xətləri zədələnib.

Rusiya tərəfi isə həm elektrik xətlərinin zədəlnməsi, həm də atom elektrik stansiyasının atəşə tutulmasına Ukraynanın özünü ittiham edir.

Atom elektrik stansiyası ətrafındakı vəziyyətlə bağlı narahatlıq BMT və dünyanın bir çox ölkələri tərəfindən ifadə olunub. Stansiyaya səfərdən sonra sentyabrın 6-da Beynəlxalq Atom Enerjisi Agentliyi Zaporojye AES-dəki vəziyyətlə bağlı hesabat dərc edib.

Ekspertlər həmçinin Rusiya hərbi texnikasının Zaporojye AES ərazisində yerləşdiyini müəyyən ediblər. Hesabatda stansiyanın ətrafında “təhlükəsizlik zonası”nın yaradılmasının vacibliyi vurğulanır. Beynəlxalq Atom Enerjisi Agentliyi buna dərhal kömək etməyə hazır olduğunu bildirib.

Agentlik Zaporojye AES-in atəşə tutulmasına son qoymağa çağırır, çünki bu, “nüvə insidentinə” səbəb ola bilər.

Ukrayna stansiya ətrafındakı zonanın tamamilə hərbsizləşdirlməsini tələb edir, bu ideyanı Avropa İttifaqı və ABŞ nümayəndələri dəstəkləyirlər. Rusiya isə bunu istəmir.

Ukrayna ordusu bir-neçə şəhəri azad edib, faktı Moskva da təsdiqləyir

Ukrayna ordusunun xüsusi təyinatlıları Kupyansk şəhərinin mərkəzində, 10 sentyabr 2022

Ukrayna ordusunun Xarkov istiqamətində üç şəhəri azad etdiyi barədə məlumatlar yayılmaqdadır.

Bunu xüsusilə Telegram kanalında "DXR" informasiya nazirinin birinci müavini adlandırılan Daniel Bezsonov yazıb, o Rusiya ordusunun Xarkov istiqamətində İzyum şəhəri daxil bir neçə yaşayış məntəqəsindən çıxdığını yazıb.

"Onlar Xarkov istiqamətində bəzi digər yaşayış məntəqələrindən olduğu kimi İzyumu da tərk ediblər. Təbii ki, bu, pisdir. Təbii ki, bu, ali komandanlığın səhvlərinin nəticəsidir. Amma burada gizli mənalar axtarmağa ehtiyac yoxdur. Söhbət nə razılaşmalardan, nə də xəyanətdən gedir. Biz sadəcə bacardığımız qədər mübarizə aparırıq ", - Bezsonov yazıb.

Məlumatı müharibə müxbirləri Aleksandr Kots və Yevgeni Poddubnı da təsdiqləyib. Poddubny komandanlığın bu şəraitdə geri çəkilmək qərarını düzgün adlandırıb, o bildirib ki, bu olmasa idi Rusiya ordusu İzyumda mühasirəyə düşməsi "fəlakət olar" olar.

Kots öz növbəsində rus qoşunlarının təkcə İzyumdan deyil, Kupyansk və Balakleyadan da getdiyini yazıb. Poddubnı həmçinin Kupyanskdan qoşunların qismən çıxarılması barədə məlumat verib. Ukrayna Silahlı Qüvvələrinin 25-ci Əlahiddə Siçeslav Hava Desant Briqadasının əsgərləri İzyum şəhərinin kənarında lentə alındıqları videonu sosial şəbəkələrdə yayıblar.

Şənbə günü səhər saatlarında Ukrayna ordusunun İzyum və Kupyansk şəhərlərini işğaldan azad etməsilə bağlı çoxsaylı məlumatlar yayılıb. Bu barədə həm rusiyayönlü teleqram kanalları, həm də Ukrayna mənbələri yazıb. Ukrayna Silahlı Qüvvələrinin Kupyanskıni azad etməsini Xarkov vilayəti administrasiyası rəhbərinin müşaviri Natalya Popova təsdiqləyib. O, mesajı Xarkov vilayətində üçüncü ən böyük və Ukraynanın şərqindəki mühüm nəqliyyat qovşağı olan bu şəhərin mərkəzində ukraynalı hərbçilərin fotoşəkili ilə müşayiət edib.

Şənbə günü axşam saatlarında Kupyanskın şimalında, Rusiya sərhədi yaxınlığındakı Volçansk şəhərindən rus qoşunlarının çıxarılması barədə xəbərlər yayılıb.

Rusiya Müdafiə Nazirliyinin sentyabrın 10-da yaydığı məlumatda Xarkov vilayətində, Balakliya və Çuqev bölgələrində Ukrayna ordusunun mövqelərinə zərbələr endirildiyi bildirirdi.

Amma Ukrayna ordusunun Xarkov vilayətində cəbhənin yarılmasından və onlarla yaşayış məntəqəsini azad etməsindən sonra ilk dəfə olaraq Rusiya qoşunlarının geri çəkilməsini dolayı yolla ilk dəfə təsdiqləyib.

Rusiya fevralın 24-də Ukraynaya hücum edib. Bu müddət ərzində ölkənin bir sıra şəhər və qəsəbələri dağıdılıb, minlərə adam həlak olub, milyonlarla insan ölkədən qaçqın düşüb. Beynəlxalq aləm Rusiyanın bu addımını pisləyir və qoşunlarını Ukraynadan çıxarmağa çağırır.

Rəsmi Moskva isə qonşu Ukraynaya qarşı apardığı müharibəni "xüsusi hərbi əməliyyat" adlandırır. Bundan başqa "müharibə" sözündən istifadə edənlər, "müharibəyə yox" deyənlər, o cümlədən Rusiya müdafiə nazirliyinin rəsmi məlumatlarından fərqli xəbərlər verən fərdlər və KİV-lər cəzalandırılır.

Ramzan Kadırova bağlı 1300-ə qədər döyüşçünün Xersona göndərildiyi bildirilir

Ramzan Kadırova bağlı hərbi birləşmənin üzvlərindən biri, arxiv foto

Çeçenistan rəhbəri Ramzan Kadırovla əlaqəli hərbiləşdirilmiş birləşmələrin 1300-ə qədər döyüşçüsü Rusiya qoşun qrupunu gücləndirmək üçün Ukraynanın Xerson vilayətinə göndərilib.

Bu barədə sentyabrın 10-da Ukrayna Baş Qərargahının yaydığı məlumatda deyilir.

Silahlı qüvvələrinin komandanlığı bildirir ki, Rusiya qoşunları bununla Donetsk vilayətini tam ələ keçirməyə, həm də əvvəl işğal etdikləri əraziləri əldə saxlamaq istəyirlər.

Çeçenistanda yaradılmış “kadırovçular” dəstəsi faktiki olaraq regional ordu funksiyasını yerinə yetirir. İndiyə qədər bu ordu birləşmələrinə qarşı ciddi insan hüqquları pozuntularına yol verdikləri barədə ittihamlar səslənib.

Ukrayna ordusu bir neçə həftədir ki, cənubda, Xerson ətrafında böyük əks-hücum elan edir.

Praqada səfərdə olan Amerika Birləşmiş Ştatlarının (ABŞ) müdafiə naziri Lloyd Ostin ukraynalıların indi Xersonda uğur qazanmaqda davam etdiklərini deyib.

Pentaqonun rəhbəri həmçinin Ukrayna Silahlı Qüvvələrinin Ukraynanın şimal-şərqində, Xarkov yaxınlığında da irəlilədiyini qeyd edib.

Ukrayna Prezidenti Volodimir Zelenski də sentyabrın 9-u gecə çxışında ordunun uğurlarından danışarkən Ukrayna Silahlı Qüvvələrinin Xarkov vilayətində 30-dan çox yaşayış məntəqəsini azad etdiyini deyib. Onun sözlərinə görə, sentyabrın 1-dən ölkə ərazisinin 1000 kvadrat kilometrdən çox ərazisi işğaldan azad olunub.

Rusiya fevralın 24-də Ukraynaya hücum edib. Bu müddət ərzində ölkənin bir sıra şəhər və qəsəbələri dağıdılıb, minlərə adam həlak olub, milyonlarla insan ölkədən qaçqın düşüb. Beynəlxalq aləm Rusiyanın bu addımını pisləyir və qoşunlarını Ukraynadan çıxarmağa çağırır.

Rəsmi Moskva isə qonşu Ukraynaya qarşı apardığı müharibəni "xüsusi hərbi əməliyyat" adlandırır. Bundan başqa "müharibə" sözündən istifadə edənlər, "müharibəyə yox" deyənlər, o cümlədən Rusiya müdafiə nazirliyinin rəsmi məlumatlarından fərqli xəbərlər verən fərdlər və KİV-lər cəzalandırılır.

Yerevanda yenidən Qarabağ müzakirəsi

ATƏT-in Minsk qrupunun yeni təyin olunmuş amerikalı həmsədri, Qafqazda danışıqlar üzrə baş məsləhətçi Filip Rikerlə və Ermənistanın xarici işlər naziri Ararat Mirzoyan, Yerevan, 9 sentyabr 2022

Ermənistan xarici işlər nazirliyinin yaydığı məlumatda bildirilir ki, Mirzoyanla Rikerin görüşündə “Dağlıq Qarabağ problemi ilə bağlı geniş spektrli məsələlər” müzakirə edilib

Sentyabrın 9-da ATƏT-in Minsk qrupuna yeni təyin olunmuş həmsədri və Qafqazda danışıqlar üzrə baş məsləhətçi Filip Riker Ermənistanda olub.

AzadlıqRadiosunun erməni xidməti -Azatutyun xarici işlər nazirliyinə istinadla yazır ki, Amerikalı diplomatla Ermənistanın xarici işlər naziri Ararat Mirzoyanın görüşündə “Dağlıq Qarabağ problemi ilə bağlı geniş spektrli məsələlər” müzakirə edilib.

"Dağlıq Qarabağ münaqişəsinin həlli prosesində ATƏT-in Minsk qrupunun həmsədr ölkəsi kimi ABŞ-ın rolu vurğulanıb. Mirzoyan Dağlıq Qarabağ münaqişəsinin hərtərəfli və davamlı həlli kontekstində ATƏT-in Minsk Qrupu İnstitutunun potensialından və təcrübəsindən istifadənin vacibliyini də vurğulayıb."

Azatutyun-nun xəbərinə görə, Ermənistan xarici işlər nazirliyinin yaydığı məlumatda qeyd olunur ki, görüşdə nazir "44 günlük müharibə nəticəsində yaranmış humanitar problemlər mövzusuna, erməni hərbi əsirlərin və digər məhbusların dərhal öz vətənlərinə qaytarılmasına və həmçinin “müharibədən sonra Azərbaycanın nəzarəti altına keçmiş ərazilərdə erməni mədəni və dini irsinin qorunması” ilə bağlı məsələlərə toxunub".

Məlumatda həmçinin vurğulanır ki, Riker və Mirzoyan regional təhlükəsizlik və sabitliklə bağlı bir sıra məsələləri müzakirə ediblər, həmçinin Azərbaycanla Ermənistan arasında münasibətlərin tənzimlənməsinə dair fikir mübadiləsi aparıblar.

Filip Riker sentyabrın 8-də İrəvana gəlib. Regional səfər çərçivəsində o, Gürcüstan və Azərbaycana da səfər edəcək.

ABŞ Dövlət katibi Entoni Blinken iki həftə öncə Filip Rikeri ATƏT-in Minsk qrupuna həmsədr və Qafqazda danışıqlar üzrə baş məsləhətçi təyin edib.

2020-ci ildə 44 günlük müharibəylə Qarabağın bir hissəsinə və ətraf 7 rayona nəzarəti bərpa edən Azərbaycan Dağlıq Qarabağ münaqişəsinin tarixdə qaldığını bildirir. Rəsmi Bakı Rikerin Minsk qrupu həmsədri kimi təyinatına sərt reaksiya verib.

ATƏT-in Minsk qrupu 30 ilə yaxın sülh danışıqlarına vasitəçilik edib. Ancaq müharibə bitəndən sonra Prezident İlham Əliyev bəyanatlarında Dağlıq Qarabağ münaqişəsinin artıq mövcud olmadığını, ATƏT-in Minsk qrupu həmsədrlərinin işinin bitdiyini bildirib.

ABŞ-ın yüksək rütbəli rəsmiləri isə Minsk qrupunun həmsədrliyinə dəstək bildiriblər.

Turk BMT-nin insan haqları üzrə komissarı təyin olunub

Volker Turk

Baçele vəzifədən getməzdən bir neçə dəqiqə öncə Çinin Sintzyan vilayətində insan haqları pozuntularına dair hesabat yayıb

BMT avstriyalı veteran diplomat Volker Turku qurumun İnsan haqları üzrə Ali komissarı postuna təsdiqləyib.

Hazırda siyasi məsələlər üzrə baş katib müavini olan Turk sentyabrın 8-də BMT Baş Assambleyasında konsensus yoluyla bu vəzifəyə təsdiqlənib. O, avqustun 31-də vəzifə müddətini başa vurmuş Mişel Baçeleni əvəzləyəcək.

57 yaşlı Turk 30 ildən çoxdur BMT-də çalışır, baş katib Antonio Quterreşə yaxındır.

Turk sentyabrın 9-da Twitter-də bu vəzifəyə təyin olunmasından “şərəf” duyduğunu yazıb.

Baçele vəzifədən getməzdən bir neçə dəqiqə öncə Çinin Sintzyan vilayətində insan haqları pozuntularına dair hesabat yayıb. Hesabatda uyğurlar və digər əsasən müsəlman əhaliyə qarşı pozuntular, o cümlədən işgəncə, məcburi əmək, özbaşına saxlama halları sadalanıb.

Pekin ittihamları qətiyyətlə rədd edərək hesabatı bloklamağa çalışıb, BMT-ni “banditə çevrilməkdə, ABŞ və Qərblə əlbirlikdə” ittiham edib.

Çində insan haqları pozuntularını son illər insan haqları qrupları da sənədləşdirir.

Air Moldova Moskvaya uçuşları bərpa edir

Kişinau aeroportu, arxiv fotosu

Moskvaya uçuşlar fevralda Rusiya Ukraynaya səbəbsiz hücuma başlayandan sonra dayandırılıb

Air Moldova yeddi aylıq fasilədən sonra Moskvaya uçuşları bərpa etdiyini açıqlayıb.

Milli aviaşirkətin sentyabrın 9-da yaydığı məlumata görə, marşrut “Rusiya Federasiyasında olan və evinə qayıtmaq istəyən Moldova Respublikası vətəndaşlarının saysız xahişləri”nə görə açılır.

Aviaşirkət bildirir ki, koronavirus pandemiyası və Rusiyaya uçuşların dayandırılması “hər gün yüzlərlə sərnişin üçün çətinliklər”, o cümlədən təcili tibbi hallar yaradıb.

Air Moldova Moskvaya uçuşları fevralda Rusiya Ukraynaya səbəbsiz hücuma başlayandan sonra dayandırıb. Parlament fövqəladə vəziyyət şəraitində ölkənin hava məkanını müvəqqəti bağlamışdı.

update

İD Rusiya səfirliyindəki partlayışa görə məsuliyyəti götürüb

Taliban silahlısı partlayışdan sonra səfirlik yaxınlığında

Polisdən “Reuters” agentliyinə deyilib ki, kamikadze mühafizəçilər tərəfindən atəşə tutularkən partlayıcılar işə düşüb, o, hədəfinə çata bilməyib

İslam Dövləti (İD) silahlı qruplaşması Rusiyanın Kabildəki səfirliyi yaxınlığında azı 6 nəfərin, o cümlədən səfirliyin iki əməkdaşının ölümünə səbəb olan partlayışa görə məsuliyyəti öz üzərinə götürüb.

Silahlı qruplaşmanın sentyabrın 5-də “Telegram”da verdiyi bəyanatda deyilir ki, İD silahlısı Əfqanıstanın paytaxtında səfirlik binası yaxınlığında Rusiya işçilərinin də qatıldığı tədbirdə iclasda kamikadze jiletini partladıb.

Kabil polisinin sözçüsü Xalid Zadran Radio Azadi-yə bildirib ki, konsulluq xidməti qarşısında növbədə durmuş 4 əfqan ölüb, 10-dan çoxu yaralanıb.


***

Rusiyanın Əfqanıstan paytaxtı Kabildəki səfirliyi yaxınlığında intiharçı hücumunda səfirliyin iki əməkdaşı öldürülüb.

Partlayışa görə məsuliyyəti götürən olmayıb.

Partlayış səfirliyin konsulluq bölməsinin yaxınlığında baş verib. Ölənlərin biri diplomat, digəri təhlükəsizlik işçisidir.

Yaralılar arasında əfqanlar var.

Kremlin sözçüsü Dmitri Peskov insidenti “terror hücumu” adlandırıb.

“Reuters” iki nəfərin öldürüldüyünü, 11 nəfərin yaralandığını xəbər verir. İntiharçı da güllələnərək öldürülüb.

Ötən ilin avqustunda Əfqanıstanda Taliban silahlı qruplaşması hakimiyyəti ələ keçirib. Rusiya bu ölkədə səfirliyini açıq saxlayan azsaylı ölkələrdəndir. Rusiya daxil olmaqla beynəlxalq ictimaiyyət Taliban hakimiyyətini tanımayıb.

***

Sentyabrın 5-də Əfqanıstanın paytaxtı Kabildə Rusiya səfirliyi yaxınlığında güclü partlayış baş verib.

Yerli mediada hadisə yerinə gələn təcili yardım maşınlarının görüntüləri yayımlanıb.

Polisdən “Reuters” agentliyinə deyilib ki, intiharçı mühafizəçilər tərəfindən atəşə tutularkən partlayıcılar işə düşüb, o, hədəfinə çata bilməyib.

Zabit Mövlavi Sabir xəbər agentliyinə açıqlamasında hələlik, itkilər haqda məlumat olmadığını, hücum edən şəxsin güllələndiyini qeyd edib.

Rusiyanın dövlət agentliyi RİA Novosti xəbər verir ki, hadisə Rusiyaya viza almaq üçün gözləyən əfqanların uzun növbəsinin yaxınlığında baş verib. Agentlik yerli xəbərlərə istinadən 15 və ya 20 nəfərin öldüyünü və ya yaralandığını bildirib.

Pinoçet dövrü konstitusiyasının dəyişdirilməsinə qarşı çıxdılar

Çili, 2 sentyabr

Seçicilərin 61,9%-i yeni konstitusiyanın əleyhinə, 38,1%-i lehinə səs verib

Çilidə seçicilər diktator Auqusto Pinoçetin ölkəyə 40 ildən artıqdır tətbiq etdiyi konstitusiyanı əvəzləyəcək mütərəqqi konstitusiya layihəsini səs çoxluğu ilə rədd edib.

Rəsmilərin sentyabrın 5-də verdiyi məlumata görə, 4 sentyabr referendumunda bülletenlərin 99,9 %-i hesablanıb. Seçicilərin 61,9%-i yeni konstitusiyanın əleyhinə, 38,1%-i lehinə səs verib.

Prezident Qabriel Bobric yeni nizamnamənin lehinə güclü təşviqat aparmışdı. O, səsvermədən sonra açıqlamasında idarəetmə komandasında dəyişikliklər olacağını istisna etməyib.

Bununla belə, o, konstitusiyaya dəyişiklik prosesinin sona çatmadığını açıqlayıb və liderləri “bizi bir ölkə kimi birləşdirən”, yenidən işlənmiş layihə hazırlamaq üçün “daha qətiyyətlə, daha çox dialoqla, daha artıq hörmətlə işləməyə” çağırıb.

Rədd edilmiş layihə, bərabər sayda kişi və qadın təmsilçilərdən ibarət konstitusiya konvensiyasının hazırladığı ilk belə sənəd idi. Tənqidçilər layihənin çox uzun, qeyri-müəyyən olduğunu və muxtar bölgələrin yaradılmasında, ətraf mühitin və gender bərabərliyinin prioritetləşdirilməsində çox uzağa getdiyini deyirdilər.

2020-ci ildə çilililərin 80 %-dən çoxu Pinoçetin konstitusiyasının dəyişdirilməsinin lehinə səs verib.

Avronun dəyəri 1 dollardan aşağı düşüb

İllüstrativ foto

Britaniya funt sterlinqi də son 2 il yarımda ilin ən aşağı səviyyəsinə enib

Sentyabrın 5-də Asiya maliyyə bazarlarında avronun dəyəri 2002-ci ildən bəri ilk dəfə 0,99 dollardan aşağı düşüb.

Britaniya funt sterlinqi də son 2 il yarımda ilin ən aşağı səviyyəsinə enərək 1,14 dollar təşkil edib.

Rusiyanın “Şimal axını 1” boru kəməri ilə təbii qazın nəqlini dayandırmasından sonra Avropa valyutaları təzyiqə məruz qalıb. Bu tədbir turbində neft sızmasıyla izah olunub.

G7 (Böyük Yeddilik) qrupuna daxil olan ölkələrin maliyyə nazirləri Rusiya neftinə maksimal qiymət həddi elan edəndən dərhal sonra Moskva belə bir addım atıb.

Əfqanıstanda zəlzələdə azı 8 nəfər həlak olub

Arxiv fotosu

Bu gün səhər saatlarında Əfqanıstanın şərqi Cəlalabad şəhərində 5.3 bal gücündə zəlzələ baş verib

Ötən gecə Əfqanıstanın şimal-şərqində zəlzələdə azı səkkiz nəfər həlak olub. Rəsmilər məlumatı sentyabrın 5-də yayıb.

Kunar vilayət valisinin sözçüsü Mövləvi Nəcibulla Hənif jurnalistlərə ölü sayının arta biləcəyini deyib.

Bu gün səhər saatlarında Əfqanıstanın şərqi Cəlalabad şəhərində 5.3 bal gücündə zəlzələ baş verib.

Hənif ötən gecəki zəlzələnin maliyyə və insan itkisinə səbəb olduğunu bildirib.

İyunda Əfqanıstanın şərqində zəlzələdə min nəfərdən çox insan həlak olub, bir neçə yaşayış məntəqəsi dağılıb.

Almaniyadan Ukraynaya 200 milyon avro yardım

Ukraynalı qaçqınlar Polşada

Almaniya məcburi köçkünlərə kömək məqsədilə Ukraynaya 200 milyon avro ayırır.

Bu barədə Almaniyanın İqtisadi Əməkdaşlıq və İnkişaf naziri Svenya Şulze məlumat verib.

Onun sözlərinə görə, saziş sentyabrın 4-ü -bazar günü Berlinə gələcək Ukraynanın baş naziri Denis Şmıxalla imzalanacaq.

Şulze hesab edir ki, beynəlxalq dəstək olmadan Ukrayna öz evlərini tərk etməyə və ölkənin daha təhlükəsiz bölgələrinə köçməyə məcbur olan vətəndaşlarına lazımi sosial müavinətləri tam təmin edə bilməz. O, həmçinin digər ölkələri müharibə edən Ukrayna ilə həmrəyliyi zəiflətməməyə və ona kömək etməyə çağırıb.

BMT-nin məlumatına görə, Ukraynada 7 milyona yaxın vətəndaş məcburi köçkün vəziyyətinə düşüb. Onlar daha çox ölkənin döyüşlərin getdiyi şərq və cənub-şərq bölgələrindən Ukraynanın daha təhlükəsiz bölgələrinə köçənlərdir.

Statistik məlumatlara görə, həmin ailələr demək olar ki, gəlirlərinin yarısını itirib.

Ümumilikdə, Rusiyanın Ukraynaya qarşı müharibəyə başlamasından indiyə qədər ölkə sakinlərinin təxminən üçdə biri evlərini tərk etmək məcburiyyətində qalıb.

BMT baş verənləri İkinci Dünya Müharibəsindən bəri ən böyük miqrasiya böhranı hesab edir.

Kamçatka balıqçılarına çox qazanca Ukraynaya getmək təklif edildiyi bildirilir

Kamçatka balıqçıları, arxiv foto

Kamçatkada özünü hərbi komissarı kimi təqdim edən şəxs balıqçılıq zavodlarının işçilərini Ukraynada döyüşmək üçün Müdafiə Nazirliyi ilə müqavilə bağlamağa təşviq edib.

Bu barədə "Sibir.Realii"-yə ("Sibir. Realii" AzadlıqRadiosunun bir layihəsidir) müəssisələrdən birinin işçiləri arasından mənbə bildirib. O, adının çəkilməməsi şərti ilə hərbi komissarın söhbətin videoyazısını redaksiyaya verib. Videodakı hərbi formada olan şəxs xidmət müddətinin “6 aydan yuxarı” olduğunu deyir.

"Bu il balıq ovu hamı üçün uğurlu olmayıb. Buna görə də 6 ay orduda xidmət etmək imkanı var, sonra da dərhal bura balıq tutmağa qayıdırsan. Hə, əlbəttə, əgər məsələni direktorla həll edə bilsən. Hansı üstünlükləri var? Birincisi-müqavilənin imzalanmasından dərhal sonra Kamçatkanın qubernatoru sizə 100 min rubl ödəyir. Müdafiə nazirliyi də sizə 50 min ödəyir" hərbi formada olan adam deyir.

"Sibir.Realii"-nin yazdığına görə, nəşrə danışanın dediyinə görə, müharibəyə aktiv şəkildə sövq edilənlər arasında Özbəkistan vətəndaşları da var. Müqavilə bağlayanlara yüksək məbləğdə müavinət, bütün ailə üçün məzuniyyətə gediş, xidməti mənzil vəd edilib, məhkumluğu olanlara isə amnistiya zəmanəti verilib. Müəssisənin işçiləri arasında bir neçə nəfər bu təkliflə maraqlanıb. Qeyd olunur ki, Komissarlığın nümayəndəsi bir gündə Kamçatkadakı digər zavodlara da baş çəkib. O, müqavilə imzalamaq və yarımadada qalmaq imkanlarından danışıb, lakin Ukrayna ərazisində xidmət etmək üçün daha çox qazana biləcəklərini vurğulayıb.

Nəşrin yazdığına görə, həmin şəxs balıqçılarla söhbətində Ukraynada döyüşməyin qiymətini də açıqlayıb.

"Ukrayna ilə bağlı sizə deyim. Qiymət belədir: burada xidmət etməklə əldə edəcəyiniz məbləğdən iki dəfə çoxdur (müqavilə bağlayaraq Kamçatkada xidmət etdikdə - Qeyd red.) - 100 min rubldan, üstəlik, ezamiyyətin hər gününə 56 dollar, üstəlik, hücum hərəkətləri aparılırsa - sizə hər gün 8 min rubl ödəniləcək, məsələn, "Bayraktarı" vursanız - pul mükafatı, hamısı ayrıdır. Orta aylıq qazanc 350-450 min rubl arasıdır. Xidmət müddəti - 3 ay. Bu günə qədər məndən 25 könüllü Ukraynaya gedib, beş nəfər yaralanıb, heç bir ölüm olmayıb"- hərbçi toplananları inandırmağa çalışır.

Özünü komissar kimi təqdim edən şəxs adamları xidmətə getməyə şəxsən təşviq etməsinin səbəbini bu yaxınlarda Kamçatkadan iki batalyonun döyüşə getməsilə əsaslandırır. Onun dediyinə batalyonlardan biri Suriyaya, digərisə Ukraynaya göndərilib, indi hərbi hissədə xidmət edəcək adam qalmayıb.

“Sibir.Realii” Kamçatka diyarının Yelizovo şəhəri, Yelizovski, Sobolevski və Ust-Bolşeretski rayonlarının hərbi komissarlığından dərhal şərh ala bilməyib. Açıq mənbələrə görə, komissar postunu Aleksandr Vaxonin adlı şəxs tutur.

Rusiya fevralın 24-də Ukraynaya hücum edib. Bu müddət ərzində ölkənin bir sıra şəhər və qəsəbələri dağıdılıb, minlərə adam həlak olub, milyonlarla insan ölkədən qaçqın düşüb. Beynəlxalq aləm Rusiyanın bu addımını pisləyir və qoşunlarını Ukraynadan çıxarmağa çağırır.

Rəsmi Moskva isə qonşu Ukraynaya qarşı apardığı müharibəni "xüsusi hərbi əməliyyat" adlandırır. Bundan başqa "müharibə" sözündən istifadə edənlər, "müharibəyə yox" deyənlər, o cümlədən Rusiya müdafiə nazirliyinin rəsmi məlumatlarından fərqli xəbərlər verən fərdlər və KİV-lər cəzalandırılır.

BMT-dəki tədbirdə iştirak edəcək 56 rusiyalı diplomatın heç birinə viza verilməyib

BMT Baş Assambleyasının toplantısı, 19 dekabr 2016

BMT Baş Assambleyasının debatlarına qatılmağı planlayan Rusiyanın 56 diplomatından heç birinə ABŞ-a giriş vizası verilməyib.

Hələ bundan başqa müzakirəyə çıxarılan sənədlər də xarici işlər naziri Sergey Lavrova .göndərilməyib.

Bu barədə məlumatı Rusiyanın BMT-dəki daimi nümayəndəsi Vasili Nebenzya istinadla Reuters agentliyi yayıb.

Vasili Nebenzyanın BMT baş katibi Antonio Quterreşə ünvanladığı rəsmi məktubda yaranmış vəziyyətin narahatedici olduğu vurğulanır. Bildirilir ki, son bir neçə ayda BMT-nin rəsmi tədbirlərində iştirak etmək üçün göndərdiyimiz bir sıra Rusiya nümayəndələrinə ABŞ hakimiyyəti davamlı olaraq giriş vizaları verməkdən imtina edir.

ABŞ-ın BMT-dəki missiyasından isə bildirilib ki, bütün ölkələrə dəfələrlə xatırladıldığı kimi “ərizələr mümkün qədər tez təqdim edilməlidir”.

"Bu, Rusiyanın səfirliyimizə qarşı əsassız hərəkətləri, o cümlədən əməkdaşlarımızı məcburi ixtisar etməsi və buna görə də bizim vizaların rəsmiləşdirilməsi imkanlarımızı ciddi şəkildə məhdudlaşdırması səbəbindən vacibdir" deyə adının açıqlanmasını istəməyən ABŞ rəsmisi Reuters agentliyinə deyib.

Bundan əvvəl Rusiyanın daxili işlər naziri Vladimir Kolokoltsev viza verilməməsi səbəbindən Nyu-Yorkda BMT-nin polislərlə bağlı 3 günlük tədbirində iştirak edə bilməyib.

Kaliforniyada senatora görə bir qızın sevimli keçisi zorla əlindən alınıb və kəsilib

Keçi, arxiv foto

ABŞ-ın Kaliforniya ştatının hələ on yaşı tamam olmayan sakini yarmarkada satmaq üçün Sidr keçisi yetişdirib.

Lakin qız heyvana bağlanıb və onu kəsməyə vermək istəməyib. Yarmarkanın təşkilatçıları ailəni cinayət işi ilə hədələyərək polisə müraciət ediblər. Polis keçini qızdan məcburi alaraq kəsim məntəqəsinə göndərib.

"The Guardian" nəşrinin yazdığına görə, qızın valideynləri məhkəməyə müraciət ediblər. Ana, polis idarəsini qızının təməl hüquqlarını pozmaqda və agentlik resurslarını israf etməkdə ittiham edib.

Məlumata görə, ailə keçini keçən il qızları gənclərin əkinçilik proqramına qoşulduğu zaman alıblar.

Qaydalara görə, onlar keçini böyüdüb 2022-ci ilin iyununda yarmarkada satmalı idilər. Ancaq qız saxladığı keçiyə öyrəşdiyindən təhvil vermək vaxtı gələndə onu heç kimə verməyəcəyini bildirib.

Anasının dediyinə görə, ev heyvanı kimi çox sevdiyi keçinin qəssabxanaya göndəriləcəyi fikri onun qızı üçün dözülməz olub. Ailə yarmarka təşkilatçılarına keçinin satışından əldə edilə biləcək gəlirin əvəzini ödəməyi təklif edib.

Lakin birlik bildirib ki, keçi yarmarkaya gətirilməsə, ailə böyük oğurluqda ittiham olunacaq. Təşkilatçılar hətta qızın son bir il ərzində üç nənə və babasını itirdiyini biləndən sonra belə öz fikirlərindən yayınmayıblar.

Keçinin əti qubernatorluğa namizədliyini irəli sürən Kaliforniyanın respublikaçı senatoru Brayan Dale-yə satılmalı idi.

Beləki sözü gedən keçinin ətinə ən yüksək qiyməti o təklif edib-902 dollar və bu aksiyonu udub. Senatorun nümayəndələri ailəyə bildiriblər ki, "keçinin xilas olunması ilə bağlı onların səylərinə mane olmayacaqlar.

Nəticədə yarmarkalar birliyi “məhkəmələrdən yayınmaq və dərhal hüquq-mühafizə orqanlarını işə cəlb etmək” qərarına gəlib. İddiaya görə, polis orderinin olmamasına baxmayaraq, keçi ailədən alınaraq yarmarkaya aparılıb və sonra kəsilib.

Polis qarşıdakı məhkəmə prosesi ilə bağlı şərh verməkdən imtina edib. Yarmarkalar Assosiasiyası və senator Deyl-in nümayəndələri məsələ ilə bağlı sorğuları cavabsız qoyublar.

Abbas Lisani həbsxanaya qaytarılıb

Abbas Lisani

İranda Azərbaycan türklərinin fəallarından sayılan Abbas Lisaninin səhhətində problemlərə baxmayaraq bu yaxınlarda (avqustun 27-də) həbsxanaya qaytarıldığı bildirilir.

Bu barədə AzadlıqRadiosuna İranda yaşayan fəallar məlumat verib. Onların sözlərinə görə, bu qərarı A.Lisaninin 6 aylıq tibbi məzuniyyəti bitməmiş Ərdəbil İnqilab Məhkəməsinin prokuroru verib: "Abbas Lisani 2019-cu ildən həbsdədir. O, tibbi məzuniyyətdə olduğu müddətdə üç dəfə belindən əməliyyat olunub. Həkim əməliyyatdan sonra evdə ona iki həftə mütləq istirahət etməyi və bel ağrıları üçün məşq etməyi tövsiyə edib. Lakin o, yenidən həbsə qaytarılıb".

Bu açıqlamaya İranin rəsmi qurumlarından münasibət almaq mümkün olmayıb.

Xatırlatma

Abbas Lisani 2019-cu ildə "ölkənin təhlükəsizliyini pozmaq məqsədilə qanunsuz qrup yaratmaq" ittihamı ilə 8 il həbs və 2 il sürgünə məhkum edilib.

Daha sonra Apellyasiya Məhkəməsi Lisaninin cəza müddətini 15 ilə qaldırıb.

O, ittihamı qəbul etmir.

Rusiya Çin və Hindistanla hərbi təlimlərə başlayır

Arxiv fotosu

Təlimə Hindistan, Laos, Monqolustan, Nikaraqua, Suriya və bir neçə keçmiş sovet ölkəsindən hərbçilər qatılacaq

Rusiya ölkənin şərqində Çin qüvvələri ilə birlikdə irimiqyaslı hərbi təlimlərə başlayıb. Ukraynada müharibədən dolayı Qərblə gərginlik fonunda Moskva Pekinlə müdafiə əlaqələrini gücləndirir.

“Vostok 2022” (Şərq 2022) təlimləri Rusiyanın Uzaq Şərqində və Yapon dənizində müxtəlif yerlərdə keçirilir. Sentyabrın 7-cən davam edəcək təlimlərə 50 mindən çox əsgər, 5 mindən çox silah, o cümlədən 140 təyyarə, 60 hərbi gəmi qatılacaq.

Təlimə Hindistan, Laos, Monqolustan, Nikaraqua, Suriya və bir neçə keçmiş sovet ölkəsindən hərbçilər qatılacaq. Rusiyanın Müdafiə Nazirliyi Azərbaycanın da təlimlərə tərəfdaş qismində qatılacağını bildirib. Azərbaycan isə məlumatı rəsmən təsdiqləməyib.

Hindistan Rusiyanın Ukraynadakı müharibəsində neytral mövqe sərgiləyir, həm Qərb, həm də Moskvayla yaxşı münasibətləri olduğunu bildirir.

Çin də Rusiyanı bu müharibəyə görə tənqid etməyib, ABŞ və NATO-nu Moskvanı təhrik etməkdə suçlayıb, Qərbin Moskvaya sanksiyalarını pisləyib.

Rusiya da öz növbəsində ABŞ-la gərginlik yaşayan Çinə güclü dəstək verib. ABŞ Nümayəndələr Palatasının Spikeri Nensi Pelosinin Tayvana səfərindən sonra gərginlik daha da qızışıb.

Rusiya Prezidenti Vladimir Putin ABŞ-ın Ukraynaya dəstəyilə Pelosinin Tayvana səfəri arasında paralel aparıb, hər ikisini Amerikanın qlobal sabitsizliyi pozmaq cəhdlərinin tərkib hissəsi adlandırıb.

Davamı

XS
SM
MD
LG