-
Ümumdünya Səhiyyə Təşkilatı (ÜST) bildirir ki, Zimbabve prezidenti Robert Mugabe-nin “xoşməramlı səfir” postuna təyinatını ləğv edib. Bu təyinat qərb donorlarının və insan haqları qruplarının qəzəbinə səbəb olmuşdu.
ÜST baş katibi Tedros Ghebreyesus ötən həftə qeyri-yoluxucu xəstəliklərə dair konfransda Mugabe-nin vəzifəyə təyinatını elan edib.
Tedros oktyabrın 22-də yaydığı bəyanatda deyib ki, son günlər beynəlxalq liderlərin və səhiyyə ekspertlərinin Mugabe-nin təyinatıyla bağlı güclü tənqid və narahatlığı barədə düşünüb.
“Sonucda bu təyinatı ləğv etməyə qərar verdim”, – o deyib.
Tedros onu da vurğulayıb ki, bu qərarı Zimbabve hökumətiylə müzakirə edib.
Qərb 93 yaşlı Mugabe-ni Zimbabvenin iqtisadiyyatını dağıtmaqda və saysız insan haqları pozuntularına yol verməkdə suçlayır. O, 37 il ərzində prezident, ya da baş nazir kimi bu ölkəyə rəhbərlik edib.
Öz ölkəsində isə Mugabe-ni həmişə tənqid edirlər ki, ölkənin səhiyyə sistemi iqtisadi böhran səbəbindən dağıldığından tibbi müalicə üçün xaricə gedir.