Keçid linkləri

Təcili xəbərlər
2022, 26 Noyabr, şənbə, Bakı vaxtı 17:20

Azərbaycan xəbərləri

'Cənub Qaz Dəhlizi'nin maliyyələşdirilməsi araşdırılır

Kəmər tikintisi

Avropa İnvestisiya Bankı (EIB) «Cənub Qaz Dəhlizi»nə daxil olan TAP (Trans Adriatik Qaz Kəməri) və TANAP (Trans Anadolu Qaz Kəməri) layihəsinin tikintisinin maliyyələşdirilməsi imkanlarını qiymətləndirir.

Bu haqda Avropa İnvestisiya Bankından Trend-ə bildiriblər.

Bankdan deyiblər ki, EIB bu layihələrə vəsait ayırmaq imkanına baxılması prosesində «due diligence» (investisiya qoyulan obyektlərlə bağlı obyektiv təqdimatın formalaşdırılması üzrə tədbirlər) proseduru çərçivəsində bütün müvafiq məsələləri diqqətlə öyrənir.

«EIB maliyyələşdirilən bütün layihələrin texniki, iqtisadi, maliyyə, ekoloji və sosial qiymətləndirilmələri zamanı ən yüksək standartları tətbiq edir. Bank həmçinin, bu layihələrin Avropa Birliyinin qanunlarına, standartlarına və milli qanunlara uyğunluq səviyyəsini dəyərləndirir», - bankdan bildiriblər.

Bu ilin fevralında Bakıda «Cənub Qaz Dəhlizi» Məşvərət Şurasının üçüncü iclası keçirilmişdi. Həmin iclasın sonunda Azərbaycan, Albaniya, Bolqarıstan, Gürcüstan, Yunanıstan, İtaliya, Türkiyə, Xorvatiya, Monteneqro, Böyük Britaniya, ABŞ nümayəndələri və Avropa Komissiyasının vitse-prezidenti birgə bəyannamə imzalamışdı.

««Cənub Qaz Dəhlizi»nin maliyyələşdirilməsində beynəlxalq maliyyə qurumlarının əzmini alqışladıqlarını bildirir, onları dəstəklərini gücləndirməyə səsləyirik», - deyə bəyannamədə vurğulanırdı.

XATIRLATMA

TANAP və TAP layihələri «Cənub Qaz Dəhlizi»nin ayrı-ayrı hissələrini təşkil edir. «Cənub Qaz Dəhlizi» layihəsi Azərbaycan qazının Avropaya nəqlini nəzərdə tutur.

Trans-Anadolu Qaz Kəməri (TANAP) layihəsi «Şahdəniz-2»dən çıxarılan təbii qazı Türkiyə və Avropaya çatdırmalıdır.

Trans-Adriatik Qaz Kəməri (TAP) isə TANAP-ın davamıdır. «Şahdəniz-2» yatağındakı qazın Yunanıstan və Albaniya vasitəsilə, Adriatik dənizi ilə İtaliyanın cənubuna, oradan da Qərbi Avropaya nəqlini nəzərdə tutur.

Layihənin 2020-ci ildə tam reallaşacağı bildirilir.

TANAP üzrə işlərin 70, TAP üzrə isə 40 faizdən çoxunun icra edildiyi bildirilir.

Dünya Bankı, Avropa İnvestisiya Bankı (EIB), Avropa Yenidənqurma və İnkişaf Bankı (EBRD), Asiya İnfrastruktur İnvestisiya Bankı (AIIB) və Asiya İnkişaf Bankı (ADB) «Cənub Qaz Dəhlizi»ni dəstəkləyir.

Azərbaycanın «Cənub Qaz Dəhlizi» layihəsi ilə bağlı 2014-2019-cu illər üzrə 11.9 milyard dollar öhdəliyi var. Bu vəsaitdən ötən ilin sonuna kimi 6 milyard dolları icra edilib.

Hazırda «Cənub Qaz Dəhlizi» layihəsinin dəyəri təxminən 40 milyard dollar həcmində qiymətləndirilir. Bu vəsaitin 9.3 milyard dolları TANAP, 6 mlrd. dolları TAP, 23.8 milyard dolları isə «Şahdəniz-2» və Cənubi Qafqaz Kəmərinin genişləndirilməsi layihələrinin payına düşür.

Bütün xəbərləri izləyin

Prezident İsraildə səfirliyin fəaliyyətinin təmini ilə bağlı sərəncam verib

İlham Əliyev, arxiv foto

Noyabrın 26-da Prezident İlham Əliyev Azərbaycanın İsraildə (Təl-Əviv şəhərində) səfirliyinin fəaliyyətinin təmin edilməsi haqqında sərəncam imzalayıb.

Bu barədə Prezidentin mətbuat xidməti məlumat yayıb. Sərəncamda səfirliyinin fəaliyyətinin təmin olunması ilə bağlı Nazirlər Kabinetinə və Xarici İşlər Nazirliyinə maddi-texniki təchizat və maliyyələşdirilmə məsələlərinin həlli, strukturu və ştat cədvəlini təsdiq olunması ilə bağlı göstərişlər verilir.

Azərbaycanın İsraildə səfirlik təsis etməsi ilə bağlı məsələ Milli Məclisin noyabrın 18-də qəbul edilib.

İsraillə Azərbaycan arasında diplomatik münasibətlər 1992-ci ilin aprelindən başlayıb. 1993-cü ilin avqustunda Azərbaycanda İsrailin səfirliyi açılıb. Buna baxmayaraq, İsraildə Azərbaycanın səfirliyi indiyə qədər olmayıb.

Prezident eyni gündə Fələstində (Ramallah şəhərində) Təmsilçilik Ofisinin fəaliyyətinin təmin edilməsi haqqında da sərəncam imzalayıb.

Xatırlatma

Onilliklərdir İsrail və Fələstin arasında zaman-zaman insan itkiləri ilə nəticələnən münaqişələr baş verir.

Azərbaycan rəsmiləri bildirirlər ki, Fələstin münaqişəsinin Fələstin Dövlətinin paytaxtı Şərqi Qüds olmaqla "iki dövlət" prinsipinə əsasən həllini dəstəkləyirlər.

2017-ci ildə İslam Əməkdaşlıq Təşkilatı Şərqi Qüdsü Fələstinin paytaxtı elan edib.

Amma ABŞ-ın keçmiş prezidenti Donald Tramp hakimiyyəti dönəmində Yerusəlimi - Qüdsü İsrailin paytaxtı kimi tanıdığını bəyan edib. ABŞ-dan sonra bəzi ölkələr də oxşar qərar verib.

Komissiya bildirir ki, narkotiklərin 95 faizindən çoxu İran ərazisindən gəlib

İranla sərhəddə tutulmuş narkotik maddələr (Arxiv fotosu)

Bildirilir ki, ümumilikdə 9564 cinayət faktı aşkarlanıb, qanunsuz dövriyyədən 5 ton 62 kiloqramdan artıq narkotik vasitə və psixotrop maddə müsadirə edilib

“Xarici ölkə mənşəli narkotik vasitələrin təxminən 95 faizindən çoxu İran ərazisindən qaçaqmalçılıq və digər qanunsuz yollarla Azərbaycana gətirilib”

Bu fikir, bugün, noyabrın 25-də Azərbaycan baş nazirinin müavini, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının sədri Əli Əhmədovun iştirakı ilə Nazirlər Kabinetində keçirilmiş görüşdə səslənib.

Bu barədə Komissiyanın saytı məlumat yayıb.

Məlumata görə, görüşdə Dövlət Komissiyasının sədri Əli Əhmədov çıxış edib.

Çıxışda bu ilin on ayı ərzində narkotik vasitələrin, psixotrop maddələrin və onların prekursorlarının qanunsuz dövriyyəsinə qarşı mübarizədə hüquq-mühafizə orqanlarının gördüyü işlərdən bəhs edilib.

İranda etiraz və toqquşmalar davam edir, yeni itkilər var
Gözlə

No media source currently available

0:00 0:02:30 0:00

Vurğulanıb ki, həyata keçirilmiş kompleks əməliyyat-axtarış tədbirləri nəticəsində ümumilikdə 9564 cinayət faktı aşkarlanıb, qanunsuz dövriyyədən 5 ton 62 kiloqramdan artıq narkotik vasitə və psixotrop maddə müsadirə edilib:

“Qeyd olunan xarici ölkə mənşəli narkotik vasitələrin təxminən 95 faizindən çoxu İran İslam Respublikasının ərazisindən qaçaqmalçılıq və digər qanunsuz yollarla Azərbaycana gətirilib. Bəlli olduğu kimi bu, ilk növbədə Şərqdən Qərbə tranzit baxımından respublikanın əlverişli coğrafi mövqedə yerləşməsi ilə şərtlənir.”

Hələlik, bu fikirlərə İranın hüquq-mühafizə orqanları və bu ölkənin Azərbaycandakı Səfirliyinin münasibəti bəlli deyil.

Aktauda Yol Xəritəsi qəbul edilib

Aktauda xarici işlər və nəqliyyat nazirlərinin görüşü

Noyabrın 25-də Qazaxıstanın Aktau şəhərində bu ölkə, Azərbaycan, Gürcüstan və Türkiyə xarici işlər nazirlərinin görüşü Yol Xəritəsinin qəbulu ilə başa çatıb.

Qazaxıstan Xarici İşlər Nazirliyinin (XİN) məlumatına görə, tərəflər beynəlxalq nəqliyyat marşrutlarının sürətləndirilmiş inkişafı və Xəzər-Qara dənizi regionunda əməkdaşlığın möhkəmləndirilməsi üzrə tədbirləri müzakirə ediblər.

Tədbirin yekunlarına görə tərəflər 2022-2027-ci illər üçün "Orta dəhliz"in inkişafı üzrə Yol Xəritəsini imzalayıblar.

Məlumata görə, razılaşmaların icrası 2025-ci ilə qədər Transxəzər Beynəlxalq Nəqliyyat Marşrutunun buraxılış qabiliyyətini ildə hazırkı 1.5 mln. tondan 10 mln. tonadək artırmağa imkan verməlidir.

2017-ci ildə işə düşən "Orta dəhliz"in önəmi 2022-ci ildə Ukraynada hərbi əməliyyatların (Rusiya 2022-ci il fevralın 24-də Ukraynaya təcavüz edib) başlaması ilə artıb.

Əvvəl Rusiya ilə işləyən Avropa şirkətləri üçün yükdaşımalarının davamı məqsədilə bu ölkə ərazisindən yan keçən marşrutların tapılması zərurəti yaranıb.

Naxçıvan gömrüyündən həbs xəbəri var

Dövlət Gömrük Komitəsi

Naxçıvan Muxtar Respublikası Dövlət Gömrük Komitəsinin (DGK) Gömrük tariflərinin tənzimlənməsi və ödənişlər şöbəsinin rəisi Mənsur Əsgərov həbs edilib. Onun barəsində Səbail Rayon Məhkəməsinin qərarı ilə 4 aylıq həbs-qətimkan tədbiri seçilib.

Məhkəmədən bu barədə məlumatları "Turan"a təsdiqləyiblər.

Yerli saytlarda yer alan məlumatlara görə, o, bir qrup şəxs halında xüsusilə külli miqdarda vəsaitlərin mənimsəməsində ittiham olunur.

Məhkəməyə həbslə bağlı vəsatəti istintaq orqanı - Dövlət Təhlükəsizliyi Xidmətinin (DTX) verdiyi deyilir.

Amma bu məlumatlara, hələlik, DTX və Mənsur Əsgərovun yaxınlarından münasibət almaq mümkün olmayıb.

Prezident özünə yeni köməkçi təyin edib

Azərbaycan prezidentinin iqamətgahı

​​​​​​​Andrey Vladimiroviç Sipilin Azərbaycan prezidentinin köməkçisi –  Prezident Administrasiyasının Hərbi-texniki təminat məsələləri şöbəsinin müdiri təyin edilib

Andrey Vladimiroviç Sipilin Azərbaycan prezidentinin köməkçisi – Prezident Administrasiyasının Hərbi-texniki təminat məsələləri şöbəsinin müdiri təyin edilib.

Bununla bağlı prezident İlham Əliyev bugün, noyabrın 24-də sərəncam imzalayıb.

Andrey Vladimiroviç Sipilin buna qədər Azərbaycanda Birinci vitse-prezidentin köməkçisi vəzifəsini tutub.

O, 2001-ci ildə Konstitusiya Məhkəməsində İnformasiya Texnologiyaları şöbəsinin müdiri vəzifəsində çalışıb.

2004—2006-cı illərdə "McDermott Caspian Contractors Inc" şirkətində müxtəlif vəzifələrdə işləyib.

Daha sonra "PAŞA İnşaat" MMC-də İnsan Resursları və İdarəetmə departamentinin direktoru vəzifəsində fəaliyyət göstərib.

Prezident Administrasiyasinda bu şöbə yeni yaradılıb.

Almaniyadan qaytarılandan sonra həbs edilmişdi, azadlığa çıxıb

Ziya İbrahimli

Bu ilin yazında Almaniyadan readmissiya ilə Azərbaycana qaytarılandan sonra həbs edilən Ziya İbrahimli bu gün, noyabrın 24-də azadlığa buraxılıb.

Bu barədə vəkil Elçin Sadiqov məlumat verib. Onun sözlərinə görə, Z.İbrahimli Biləsuvar Rayon Məhkəməsinin qərarı ilə azad edilib: "İcra sənədlərində olan tələblər icra edilib deyə, məhkəmə Ziya bəyin azadlığa çıxması ilə bağlı qərar qəbul edib".

Z.İbrahimli özü də Azadlıq Radiosuna bu məlumatı təsdiqləyib. O bildirib ki, saxlanma müddətində hər hansı təzyiqə məruz qalmayıb, səhhətində heç bir problem yoxdur.

Z.İbrahimli müxalifətdə olan Azərbaycan Xalq Cəbhəsi Partiyasının (AXCP) Biləsuvar rayonundakı funksionerlərindən biri olub. O, 2018-ci il prezident seçkisindən sonra ölkədən çıxıb və Almaniyaya mühacirət edib.

Z.İbrahimli 2022-ci ilin mayın 19-da Azərbaycana qaytarıldıqdan sonra həbs edilib. Onun əvvəlcə inzibati, daha sonra isə Cinayət Məcəlləsinin 306.1-ci (Qanuni qüvvəyə minmiş məhkəmə qətnaməsini, hökmünü, qərardadını, qərarını və ya əmrini qərəzli olaraq icra etməmə və ya həmin məhkəmə aktlarının icrasına maneçilik törətmə) maddəsi ilə ittiham olunduğu bildirilir. Cinayət işi onun keçmiş həyat yoldaşının pul tələbi ilə bağlı olub.

Z.İbrahimli daxil, son bir ildə Almaniyadan readmissiya edilən şəxslərdən altı nəfərin həbs olunduğu açıqlanmışdı. Onların dördü narkotik, biri də bədənə xəsarət yetirmə ittihamı ilə həbsdədir. Həmin şəxslərin yaxınları ittihamları qəbul etmir və bunu siyasi sayırlar. Amma Azərbaycan rəsmiləri ölkədə siyasi həbslərin olması ilə bağlı deyilənləri qəbul etmirlər.

Readmissiya dedikdə, saziş üzrə razılığa gələn dövlətlərdən birinin ərazisinə qeyri-qanuni daxil olan şəxslərin (mənşə dövlətin öz vətəndaşları, üçüncü ölkə vətəndaşları və ya vətəndaşlığı olmayan şəxslər) geri qaytarılması nəzərdə tutulur.

'Müsəlman Birliyi' Hərəkatı üzvünün saxlandığı deyilir

Polis

"Müsəlman Birliyi" Hərəkatının üzvü Şahin Qədirovun saxlanıldığı bildirilir.

Təşkilatdan verilən məlumata görə, onu mülki geyimli şəxslər noyabrın 23-ü axşam saatlarında fəhlə işlədiyi obyektdən çıxarıb zorla avtomobilə mindirərək naməlum istiqamətə aparıblar: "Ailəsi bu barədə Daxili İşlər Nazirliyinin 102 Xidmətinə məlumat versə də, hələlik, onun taleyi barədə məlumat ala bilmirlər".

Bu deyilənlərlə bağlı hüquq-mühafizə orqanlarından məlumat almaq mümkün olmayıb.

"Müsəlman Birliyi" Hərəkatının bəzi rəhbər şəxsləri hazırda uzunmüddətli həbsədirlər. Onlar 2015-ci ildə ikisi polis olmaqla altı nəfərin öldüyü Nardaran hadisələri zamanı həbs ediliblər. Həmin şəxslər qətl və başqa ağır cinayətlərdə ittiham edilirlər. Lakin heç kimi öldürmədiklərini və saxlandıqdan sonra ağır işgəncələrə məruz qaldıqlarını bildirirlər. Daxili İşlər Nazirliyi isə işgəncə şikayətlərini əsaslı saymayıb.

Serbiyaya mühacirət edənlər də qaytarıla bilər

Belqradda Azərbaycan-Serbiya sənədləri imzalanıb

Noyabrın 23-də Belqradda Azərbaycan Prezidenti İlham Əliyevlə Serbiya Prezidenti Aleksandar Vuçiç arasında görüş olub. Geniş tərkibdə görüşü başa çatdıqdan sonra iki ölkə arasında sənədlərin imzalanması mərasimi olub.

AZƏRTAC-ın məlumatına görə, əvvəlcə prezidentlər "Azərbaycan Respublikası və Serbiya Respublikası arasında Strateji Tərəfdaşlıq Şurasının yaradılması haqqında Memorandum" və daha bir neçə sənəd imzalayıblar.

Bundan başqa, iki ölkə arasında readmissiya haqqında saziş də qəbul edilib. Sənədi Azərbaycan Daxili İşlər naziri Vilayət Eyvazov və Serbiya Daxili İşlər naziri Bratislav Qaşiç imzalayiblar.

Readmissiya ilə Azərbaycana dönənləri nə gözləyir?
Gözlə

No media source currently available

0:00 0:05:25 0:00

Readmissiya dedikdə, saziş üzrə razılığa gələn dövlətlərdən birinin ərazisinə qeyri-qanuni daxil olan şəxslərin (mənşə dövlətin öz vətəndaşları, üçüncü ölkə vətəndaşları və ya vətəndaşlığı olmayan şəxslər) geri qaytarılması nəzərdə tutulur.

Bundan əvvəl Azərbaycanla Avropa İttifaqı arasında da belə bir saziş qəbul edilib.

İlham Əliyev Serbiyaya gedib

Noyabrın 23-də Azərbaycan Prezidenti İlham Əliyev Serbiyaya rəsmi səfər edib.

Bu səfər çərçivəsində onun Serbiya Prezidenti Aleksandar Vuçiç və başqa şəxslərlə görüşləri nəzərdə tutulur.

Bu görüşlərdə ikitərəfli və regional əməkdaşlıq məsələlərindən bəhs ediləcəyi gözlənir.

İsrail prezidenti İlham Əliyevə zəng edib

İshaq Hersoq

Açıqlamaya görə, İlham Əliyev qeyd edib ki, İsraildə Azərbaycan səfirliyinin açılması barədə qərar iki ölkə arasında dostluq əlaqələrini daha da gücləndirir

Bugün, noyabrın 22-də İsrail Dövlətinin prezidenti İshaq Hersoq Azərbaycan prezidenti İlham Əliyevə zəng edib.

Bu barədə Azərbaycan Prezidentinin Mətbuat xidməti məlumat yayıb.

Həmin məlumata görə, İshaq Hersoq İsraildə Azərbaycan səfirliyinin açılması barədə qərara toxunub.

O, qeyd edib ki, bu, onlar üçün mühüm dost ölkə və strateji tərəfdaş olan Azərbaycanla çox gözəl münasibətlərdə irəliyə doğru böyük bir addımdır.

Açıqlamaya görə, İlham Əliyev isə qeyd edib ki, İsraildə Azərbaycan səfirliyinin açılması barədə qərar iki ölkə arasında dostluq əlaqələrini daha da gücləndirir:

“Telefon söhbəti zamanı İsrail-Azərbaycan əlaqələrinin müxtəlif aspektləri müzakirə edilib, gələcək təmaslar barədə fikir mübadiləsi aparılıb.”

Milli Məclisin noyabrın 18-də keçirilən iclasında "Azərbaycan Respublikasının İsrail Dövlətində (Tel-Əviv şəhərində) Səfirliyinin təsis edilməsi haqqında" qanun layihəsi səsverməyə qoyularaq qəbul edilib.

İsraillə Azərbaycan arasında diplomatik münasibətlər 1992-ci ilin aprelindən başlayıb. 1993-cü ilin avqustunda Azərbaycanda İsrailin səfirliyi açılıb. Buna baxmayaraq, İsraildə Azərbaycanın səfirliyi indiyə qədər olmayıb.

Azərbaycanda yerə siqaret kötüyü atan 10 mindən çox adam cərimələnib

Bu ilin əvvəlindən Azərbaycanda nəzərdə tutulmayan yerlərə siqaret kötüklərini atdığına görə, 10 mindən çox adam cərimələnib

Bu ilin əvvəlindən Azərbaycanda nəzərdə tutulmayan yerlərə siqaret kötüklərini atdığına görə, 10 mindən çox adam cərimələnib.

Bu barədə Daxili İşlər Nazirliyinin (DİN) Mətbuat xidməti bildirib.

DİN-dən açıqlamaya görə, cərimələri Azərbaycanın şəhər, rayon polis orqanları İnzibati Xətalar Məcəlləsinin normalarına uyğun olaraq keçirilən tədbirlər çərçivəsində tətbiq edib.

Həmin normalara əsasən “Tütün məmulatlarının istifadəsinin məhdudlaşdırılması haqqında” qanunla qadağan olunmuş yerlərdə tütün çəkməyə görə, məsuliyyət nəzərdə tutulur.

Kasıb, haqqı tapdanan YAP-çılar....
Gözlə

No media source currently available

0:00 0:05:05 0:00

DİN-dən vurğulanıb ki, tütün məmulatı tullantılarının ətraf mühitə atılmasına görə, 10 835 nəfər barəsində inzibati tənbeh tətbiq edilib.

Daha 500-dən çox halda yetkinlik yaşına çatmayanlara tütün məmulatları satılmasına görə, cərimə yazılıb.

DİN-dən əlavə edilib ki, sözügedən tədbirlər çərçivəsində tətbiq edilən cərimələrin ümumi məbləği 383,3 min manat olub.

2021-ci il ərzində isə qanunla qadağan edilmiş yerlərdə siqaret çəkdikləri və tütün məmulatları tullantılarını ətraf mühitə atdıqlarına görə 3422 nəfərin cərimələndiyi açıqlanmışdı.

Ramananın 'analoqu olmayan' yolları
Gözlə

No media source currently available

0:00 0:02:07 0:00

Ondan da əlavə tütün məmulatlarını yektinlik yaşına çatmayanlara satdıqlarına görə, 270 şəxs barəsində inzibati tənbeh tədbiri tətbiq olunduğu bildirilmişdi.

2018-ci ildən başlayaraq Azərbaycanda həm ictimai yerlərdə siqaret çəkməklə bağlı qaydalar sərtləşdirilib və həm də qadağan edilən yerlərdə ondan istifadəyə görə, cərimələr artırılıb.

Amma 2020-ci ilin əvvəlindən ölkədə koronavirus pandemiyası ilə bağlı sərt karantin qaydaları tədbiq edilib.

Karantin hazırda da davam etsə də bir xeyli yumşaldılıb.

Bakıda NATO günləri başlayıb

Baş Qərargah rəisi NATO-nun Müttəfiq Qüvvələrin Avropadakı Baş Qərargah rəisinin müavini ilə görüşüb

Noyabrın 21-də Azərbaycan Ordusunun Baş Qərargah rəisi Kərim Vəliyev NATO-nun Müttəfiq Qüvvələrin Avropadakı Baş Qərargah rəisinin müavini kontr-admiral Qunnşteyn Brusdal ilə görüşüb.

Azərbaycan Müdafiə Nazirliyinin (MN) məlumatına görə, görüşdə Azərbaycan-NATO əməkdaşlığının inkişaf perspektivləri, həmçinin mövcud və yarana biləcək təhdidlərə qarşı birgə fəaliyyət istiqamətləri müzakirə edilib.

Müdafiə Nazirliyi ilə NATO arasında 2022-ci il üçün Fərdi Tərəfdaşlıq üzrə Əməkdaşlıq Proqramı çərçivəsində Bakıda noyabrın 21-dən "NATO günləri"nə start verilib.

Noyabrın 25-dək keçiriləcək "NATO günləri" çərçivəsində müxtəlif mövzularda brifinqlər təqdim olunacaq.

Azərbaycan Şimali Atlantik Bloku (NATO) ilə ötən əsrin 90-ci illərindən əməkdaşlıq edir. Azərbaycan 1994-cü ildə NATO-nun Sülh Naminə Tərəfdaşlıq proqramının Çərçivə Sənədini imzalayıb.

2005-ci ildən isə Fərdi Tərəfdaşlıq üzrə Əməkdaşlıq Proqramını imzalayıb. Amma Azərbaycan rəsmiləri dəfələrlə bəyan ediblər ki, qarşıya NATO-ya üzvlük məsələsi qoyulmayıb.

Azərbaycanla İsrail hərbi-texniki əməkdaşlığı müzakirə ediblər

İsrailin Müdafiə naziri Benyamin Qantz, (solda)

Noyabrın 20-də İsrailin müdafiə naziri Benyamin Qantzla Azərbaycanın müdafiə naziri Zakir Həsənov arasında telefon danışığı olub.

Bu barədə Azərbaycan Müdafiə Nazirliyinə istinadla "Turan" İnformasiya Agentliyi məlumat yayıb.

Məlumata görə, israilli nazirin təşəbbüsü ilə baş tutan telefon danışığında tərəflər ikitərəfli hərbi-texniki əməkdaşlığın perspektivlərinə dair fikir mübadiləsi aparıblar.

İsrailin müdafiə naziri Azərbaycanın Təl-Əvivdə səfirliyinin açılması qərarına görə minnətdarlığını bildirib-məlumatda deyilir.

Azərbaycanın İsraildə səfirliyi təsis edilir. Bununla bağlı məsələ Milli Məclisin noyabrın 18-də keçirilən iclasının gündəliyinə əlavə edilən "Azərbaycan Respublikasının İsrail Dövlətində (Təl-Əviv şəhərində) Səfirliyinin təsis edilməsi haqqında" qanun layihəsində əksini tapıb.

Müzakirələrdən sonra qanun layihəsi səsverməyə qoyularaq qəbul edilib.

İsraillə Azərbaycan arasında diplomatik münasibətlər 1992-ci ilin aprelindən başlayıb. 1993-cü ilin avqustunda Azərbaycanda İsrailin səfirliyi açılıb. Buna baxmayaraq, İsraildə Azərbaycanın səfirliyi indiyə qədər olmayıb.

Azərbaycanın Fələstin Dövlətində (Ramallah şəhərində) isə Təmsilçilik Ofisi təsis edilir.

Bu barədə məsələ də parlamentin noyabrın 18-də keçirilən iclasında qəbul edilib.

2011-ci ildə Bakıda Fələstin Dövlətinin Azərbaycandakı səfirliyinin rəsmi açılışı olub. Lakin Fələstində Azərbaycanın səfirliyi yoxdur.

Milyarder Fərhad Əhmədovun evində axtarış aparılıb

Fərhad Əhmədov, arxiv foto

Azərbaycan əsilli Rusiya milyarderi Fərhad Əhmədovun Göyçay rayonundakı evində axtarış aparılıb.

"Turan" İnformasiya Agentliyinin yazdığına görə, məlumatı milyarderin mətbuat katibi Müşfiq Əlizahid təsdiqləyib.

Rusiyada yaşayan azərbaycanlı milyarder parlament seçkisi ilə bağlı təkliflərini verib
Gözlə

No media source currently available

0:00 0:02:32 0:00

Mətbuat katibi Fərhad Əhmədovun müəssisələrində də axtarış aparılması və hətta saxlanması ilə bağlı mətbuatda yayılan məlumatları təkzib edib.

Onun sözlərinə görə, yalnız onun Göyçaydakı şəxsi evində axtarış aparılıb, müəssisələrdə yoxlama aparılmayıb.

Axtarış zamanı heç nəyin müsadirə olunmadığını deyən Müşfiq Əlizahid bu axtarışın hansısa anlaşılmazlıqla bağlı ola biləcəyini deyib.

"Görünür, bir anlaşılmazlıq baş verib, hər şeyə aydınlıq gətirilib, məsələ bağlanıb, Əhmədovun saxlanılması haqqında məlumat həqiqətə uyğun deyil, o, Azərbaycandadır və öz işləri ilə məşğul olmağa davam edir"- milyarderin mətbuat katibi əlavə edib.

Bu məlumata hələki Azərbaycanın hüquq-mühafizə orqanlarından hər hansı münasibət öyrənmək mümkün olmayıb.

Fərhad Əhmədovun Azərbaycanda bir neçə müəssisəsi, o cümlədən Azərbaycanın Göyçay rayonunda nar şirəsi istehsal edən böyük zavodu var.

Əhmədov Rusiyanın Ukraynadakı hərbi kampaniyası fonunda ABŞ hökumətinin və Avropa İttifaqının elan etdiyi sanksiyalarına məruz qalıb.

Sanksiyaların elanından sonra bu ilin mayında milyarderin qiyməti 400 milyon avro dəyərləndirilən super yaxtası Almaniyanın Hamburq limanında saxlanılıb.

Həmin vaxt "Süddeutsche Zeitung" qəzeti Almaniya federal polisinə istinadən superyaxtanın Azərbaycan əsilli Rusiya milyarderi Fərhad Əhmədova məxsus olduğunu yazıb.

Qəzetin məlumatına görə, 9 göyərtəsi və hovuzu olan bu yaxta 2014-cü ilədək başqa bir rusiyalı milyarderə - Roman Abramoviçə məxsus olub.

"Superyacht" Fan saytında dərc olunmuş məlumata görə, Əhmədov bu yaxtanı Abramoviçdən 300 milyon dollara alıb və bundan sonra yaxta təmir üçün Bremerhafen tərsanəsində təmirə göndərilib.

"Forbes" jurnalı Fərhad Əhmədovun sərvətini 1.7 milyard dollar olaraq dəyərləndirib.

Azərbaycan mövqelərinin vurulduğunu deyir, Yerevan təkzib edir

Ermənistanın Müdafiə Nazirliyi öz növbəsində noyabrın 17- də Azərbaycan tərəfdən açılan atəş nəticəsində bir  hərbçilərinin yaralandığını bildirmişdi

Ermənistanın Müdafiə Nazirliyi Azərbaycanın Müdafiə Nazirliyinin noyabrın 18-də Azərbaycan-Ermənistan sərhədi yaxınlığındakı mövqelərinin Ermənistan silahlı qüvvələri tərəfindəın atəşə tutulması barədə məlumatını təkzib edib.

AzadlıqRadiosunun Erməni xidməti – Azatutyun yazır ki, Ermənistan MN məlumatı “növbəti dezinformasiya” adlandırıb.

Azərbaycan MN habelə Füzuli rayonundakı mövqelərinin Rusiya sülhməramlılarının yerləşdiyi ərazidən atəşə tutulduğunu bildirmişdi.

Bundan əvvəl Qarabağ separatçıları bildirmişdilər ki, Azərbaycan silahlı qüvvələri Xocavənd rayonun Çörəkli kəndində əkin sahəsində işləyən bir nəfəri atəşə tutub.

Azərbaycan Kəlbəcərdə mövqelərinin vurulduğunu deyir.

Bu barədə Azərbaycan Müdafiə Nazirliyi (AMN) məlumat yayıb.

Məlumata görə,noyabrın 18-də saat 12:50-də Ermənistan silahlı qüvvələrinin bölmələri Azərbaycan ordusunun Kəlbəcər rayonunun Mollabayramlı yaşayış məntəqəsi istiqamətində mövqelərini atıcı silahlardan atəşə tutub:

“Bundan başqa, saat 17:10-da Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstəsinin üzvləri tərəfindən ordumuzun Füzuli rayonunun Yuxarı Veysəlli yaşayış məntəqəsi istiqamətində yerləşən mövqeləri atəşə tutulub.”

AMN vurğulayıb ki, qeyd olunan istiqamətlərdə yerləşən bölmələri adekvat cavab tədbirləri görüb.

Bu məlumata, hələlik, qarşı tərəflərin münasibəti bəlli deyil.

AMN noyabrın 17-də isə bildirmişdi ki, “Rusiya sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı birləşmələrinin üzvlərinin Ağdam və Xocalı rayonları ərazilərində döyüş mövqelərinin möhkəmləndirilməsi məqsədilə mühəndis tədbirləri icra etmələri” müşahidə edilib.

Ermənistanla həmsərhəd Astaf kəndinin bərbad durumu
Gözlə

No media source currently available

0:00 0:04:03 0:00

Ancaq Ermənistanın Müdafiə Nazirliyi öz növbəsində noyabrın 17- də Azərbaycan tərəfdən açılan atəş nəticəsində bir hərbçilərinin yaralandığını bildirmişdi.

Daha öncəki günlər isə Qarabağda tanınmayan qurumdan deyilmişdi ki, Azərbaycan tərəfi kənd təsərrüfatı işlərilə məşğul olan dinc sakinlərə atəş açıb.

Bu il sentyabrın 12-13-də isə Azərbaycan və Ermənistan sərhədində vəziyyət daha da gərginləşmişdi.

Hər iki tərəfdən ümümilikdə 300-ə qədər hərbi qullqçunun həlak olduğu bildirilirdi.

Tərəflər atəşkəsin pozulmasına görə, bir-birlərini günahlandırırdılar.

Ermənistan Azərbaycan hərbi quluqçularının onların ərazisinə daxil olduğunu, Azərbayca isə öz növbəsində qarşı tərəfin təxribatıyla üzləşdiyini vurğulayırdı.

Sentyabrın 14-dən tərəflər arasında yenidən atəşkəs əldə edildiyi bildirilib.

Xatırlatma

2020-ci ildə 44 günlük İkinci Qarabağ Müharibəsi nəticəsində Azərbaycan Qarabağın bir hissəsinə və ətraf 7 rayona nəzarəti bərpa etmişdi.

Azərbaycan, Ermənistan və Rusiya rəhbərliyinin 2020-ci il noyabrın 10-da imzladığı birgə bəyanatla döyüşlər dayandırılandan sonra Laçın dəhlizində və Qarabağdakı təmas xəttində Rusiya sülhməramlıları yerləşdirilib.

1988-ci ildə başlayan Qarabağ münaqişəsi Azərbaycan və Ermənistan arasında döyüşlərə səbəb olub.

1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Partiya sədrinin ölkədən çıxışına icazə verilməyib

Anar Əsədli

Daxili İşlər Nazirliyinin Mətbuat xidmətindən isə bildirilib ki, Anar Əsədlinin barəsində tətbiq olunan bu qərara səbəb iki vətəndaşın dələduzluqla bağlı onlara  şikayətdir

Azərbaycan Yüksəliş (AY) Partiyasının başqanı Anar Əsədlinin ölkədən çıxışına qadağa qoyulduğu bildirilir.

Bu barədə Əsədlinin özü məlumat verib.

Partiya rəhbərinin sözlərinə görə, bugün, noyabrın 18-də Ankaraya səfəri olub, lakin onun ölkədən çıxışına Daxili Işlər Nazirliyi qanunsuz olaraq qadağa qoyub:

"Hal-hazırda Heydər Əliyev adına hava limanındayam. Məsələ ilə bağlı Daxili Işlər Nazirliyinin rəhbərliyi məlumatlandırılıb. Əgər bu anlaşılmazlıq qısa zamanda ortadan qaldırılmasa o zaman xalqımıza, media nümayəndələrinə və beynəlxalq ictumaiyyətə geniş məlumat veriləcək".

Ramananın 'analoqu olmayan' yolları
Gözlə

No media source currently available

0:00 0:02:07 0:00

DİN-dən deyilir ki…

Daxili İşlər Nazirliyinin Mətbuat xidmətindən isə “Turan” İnformasiya Agentliyinə bildirilib ki, Anar Əsədlinin barəsində tətbiq olunan bu qərara səbəb iki vətəndaşın dələduzluqla bağlı onlara şikayətdir.

Nazirliyin açıqlamasına görə, Anar Əsədli yalan vədlər verərək onların birindən 150 min, digərindən isə 10 min ABŞ dolları pullarını alaraq mənimsəməkdə günahlandırılır.

DİN-dən habelə qeyd olunub ki, hazırda hər iki müraciətlə bağlı Daxili İşlər Nazirliyində araşdırma aparılır:

"A.Əsədlinin ölkəni tərk etməsinə qoyulan məhdudiyyət də məhz bu araşdırmalarla əlaqədardır".

Anar Əsədli isə öz növbəsində bu ittihamları qəbul etmədiyini bildirib:

"Pulu mənimsəmişəmsə cinayət işi və məhkəmə qərarı hanı? Bu, siyasi sifarişdir və bizim fəaliyyətimizlə bağlıdır".

Oktyabrın sonunda Azərbaycan Yüksəliş Partiyasının sədri Anar Əsədli Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə çağırılmışdı. Partiyanın mətbuat xidmətinin yaydığı məlumatına görə, buna səbəb Əsədli barəsində edilən şikayət göstərilib.

Azərbaycan Yüksəliş Partiyası 2020-ci ildə yaradılıb. Bir il sonra dövlət qeydiyyatına alınıb.

Rusiyadan Azərbaycana gələnlərdə 80 faiz artım

Prezidenti İlham Əliyevin Rusiya Hökumətinin sədri Mixail Mişustin ilə təkbətək görüşü

Noyabrın 18-də Azərbaycan Prezidenti İlham Əliyevin Rusiya Federasiyası Hökumətinin sədri Mixail Mişustin ilə geniş tərkibdə görüşü olub.

AZƏRTAC-ın xəbərinə görə, İ.Əliyev deyib ki, iki ölkə arasında qarşılıqlı ticarətin həcmi pandemiyadan (2020-ci ildə koronavirus) əvvəlki səviyyəyə çatır. Əlavə edib ki, bu səfər ərəfəsində bəzi statistik məlumatlara baxıb: "Sevindim ki, aviareyslərin sayı sürətlə artır. Həftədə 130-dan çox reys var, yəni, biz praktiki olaraq ən yüksək göstəriciyə nail olmuşuq və Rusiyadan turist axını da artır. Bu il təqribən 80 faiz artım olub. Əlbəttə, pandemiya ilə əlaqədar bu göstərici azalmışdı. Biz hələ pandemiyadan əvvəlki səviyyəyə çatmamışıq, lakin fikrimcə, çatacağıq".

M.Mişustin noyabrın 17-də Azərbaycanla Rusiya arasında 11-ci regionlararası foruma toxunub: "İlk növbədə energetika, sənaye, nəqliyyat, mədəni-humanitar sahələrə diqqət yetirildi. Danışıqların yekunlarına əsasən, ən müxtəlif sahələrdə əməkdaşlığın inkişafına dair bir sıra sazişlər imzalandı. Nəqliyyat sahəsi çox mühüm, xüsusi sahədir. Əminik ki, birgə infrastruktur-logistika layihələri bütün əməkdaşlıq kompleksinin genişləndirilməsi üçün yeni drayver olacaq".

Putin Əliyevə zəng edib

Noyabrın 17-də Rusiya Federasiyasının Prezidenti Vladimir Putin Azərbaycan Prezidenti İlham Əliyevə zəng edib.

Azərbaycan Prezidentinin Mətbuat xidmətinin məlumatına görə, telefon danışığı əsnasında dövlət başçıları iqtisadi-ticari və enerji sahələrində əməkdaşlıq məsələlərini müzakirə ediblər.

Hökumət başçıları da görüşüb

Noyabrın 17-də Bakıda Azərbaycan Baş naziri Əli Əsədovun Rusiya Federasiyası Hökumətinin sədri Mixail Mişustinlə görüşü olub.

Azərbaycan Nazirlər Kabinetinin Mətbuat xidmətindən verilən məlumata görə, görüşdə ikitərəfli iqtisadi əlaqələrin durmadan inkişaf etməsi xüsusi vurğulanıb: "Diqqətə çatdırılıb ki, cari ilin 10 ayı ərzində qarşılıqlı ticarətin həcmi təqribən 20 faiz artıb və 3 milyard dollara yaxın olub".

Məlumata görə, nəqliyyat-tranzit sahəsində əməkdaşlığın davamlı inkişafı ilə bağlı vurğulanıb ki, bu ilin əvvəlindən Azərbaycan ilə Rusiya arasında yükdaşımaların ümumi həcmi təqribən 22 faiz artıb.

Azərbaycandan keçən nəqliyyat dəhlizləri vasitəsilə Rusiya yüklərinin tranzit daşınmasının əhəmiyyətli dərəcədə artması da qeyd edilib. Bildirilib ki, 2022-ci ilin yanvar-oktyabr aylarında bu artım 98 faizə bərabər olub.

Görüşün yekunlarına əsasən bir sıra sənədlərin imzalandığı açıqlanıb. Amma sənədlərlə bağlı detallı bilgilər verilməyib.

Rusiya Federasiyası Hökumətinin sədri M.Mişustin noyabrın 17-də Azərbaycana gəlib.

Azərbaycan İsraildə səfirliyini açır

Səfirlik Təl-Əvivdə yerləşəcək.

Azərbaycanın İsraildə səfirliyi təsis edilir. Bununla bağlı məsələ Milli Məclisin bu gün, noyabrın 18-də keçirilən iclasının gündəliyinə əlavə edilən "Azərbaycan Respublikasının İsrail Dövlətində (Təl-Əviv şəhərində) Səfirliyinin təsis edilməsi haqqında" qanun layihəsində əksini tapıb. Müzakirələrdən sonra qanun layihəsi səsverməyə qoyularaq qəbul edilib.

İsraillə Azərbaycan arasında diplomatik münasibətlər 1992-ci ilin aprelindən başlayıb. 1993-cü ilin avqustunda Azərbaycanda İsrailin səfirliyi açılıb. Buna baxmayaraq, İsraildə Azərbaycanın səfirliyi indiyə qədər olmayıb.

Azərbaycanın Fələstində Təmsilçilik Ofisi olacaq

Azərbaycanın Fələstin Dövlətində (Ramallah şəhərində) isə Təmsilçilik Ofisi təsis edilir.

Milli Məclisin noyabrın 18-də keçirilən iclasında "Azərbaycan Respublikasının Fələstin Dövlətində (Ramallah şəhərində) Təmsilçilik Ofisinin təsis edilməsi haqqında" qanun layihəsi də müzakirə edilib. Bu layihə də qəbul edilib.

2011-ci ildə Bakıda Fələstin Dövlətinin Azərbaycandakı səfirliyinin rəsmi açılışı olub. Lakin Fələstində Azərbaycanın səfirliyi yoxdur.

Xatırlatma

Onilliklərdir İsrail və Fələstin arasında zaman-zaman insan itkiləri ilə nəticələnən münaqişələr baş verir.

Azərbaycan rəsmiləri bildirirlər ki, Fələstin münaqişəsinin Fələstin Dövlətinin paytaxtı Şərqi Qüds olmaqla "iki dövlət" prinsipinə əsasən həllini dəstəkləyirlər.

2017-ci ildə İslam Əməkdaşlıq Təşkilatı Şərqi Qüdsü Fələstinin paytaxtı elan edib.

Amma ABŞ-ın keçmiş prezidenti Donald Tramp hakimiyyəti dönəmində Yerusəlimi - Qüdsü İsrailin paytaxtı kimi tanıdığını bəyan edib. ABŞ-dan sonra bəzi ölkələr də oxşar qərar verib.

update

Ağdam və Xocalıda vəziyyətin yenidən gərginləşdiyi xəbər verilir

Rusiya sülhməramlıları

Azərbaycan Müdafiə Nazirliyi noyabrın 17-də axşam saatlarında Qarabağ bölgəsində vəziyyətlə bağlı məlumat yayıb.

Məlumata görə, noyabrın 17-də “Rusiya sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı birləşmələrinin üzvlərinin Ağdam və Xocalı rayonları ərazilərində döyüş mövqelərinin möhkəmləndirilməsi məqsədilə mühəndis tədbirləri icra etmələri” müşahidə edilib.

Nazirlik hesab edir ki, bu kimi fəaliyyətlər Azərbaycan, Rusiya Federasiyası və Ermənistanın 2020-ci il noyabrın 10-da imzaladıqları üçtərəfli bəyanatın tələblərinin kobud şəkildə pozulmasıdır:

“Həyata keçirilən qanunsuz fəaliyyətlərin qarşısının alınması məqsədilə Ordumuzun bölmələri tərəfindən zəruri tədbirlər görülüb.”

Hələlik, bu məlumata qarşı tərəflərin münasibəti bəlli deyil.

Ancaq Ermənistanın Müdafiə Nazirliyi noyabrın 17-də Azərbaycan tərəfdən açılan atəş nəticəsində bir erməni hərbçinin yaralandığını bildirib.

Daha öncəki günlər isə Qarabağdakı separatçı rejim Azərbaycan tərəfin kənd təsərrüfatı işlərilə məşğul olan dinc sakinlərə atəş açdığını deyib.

Bundan əvvəl

Bundan öncə, bu il sentyabrın 12-13-də Azərbaycan və Ermənistan sərhədində vəziyyət gərginləşmişdi.

Hər iki tərəfdən ümümilikdə 300-ə qədər hərbi qullqçunun həlak olduğu bildirilirdi.Tərəflər atəşkəsin pozulmasına görə, bir-birlərini günahlandırırlar.

Ermənistan Azərbaycan hərbi quluqçularının onların ərazisinə daxil olduğunu, Azərbayca isə öz növbəsində qarşı tərəfin təxribatıyla üzləşdiyini vurğulayırdı.

Sentyabrın 14-dən tərəflər arasında yenidən atəşkəs əldə edildiyi bildirilib.

Xatırlatma

2020-ci ildə 44 günlük İkinci Qarabağ Müharibəsi nəticəsində Azərbaycan Qarabağın bir hissəsinə və ətraf 7 rayona nəzarəti bərpa etmişdi.

Azərbaycan, Ermənistan və Rusiya rəhbərliyinin 2020-ci il noyabrın 10-da imzladığı birgə bəyanatla döyüşlər dayandırılandan sonra Laçın dəhlizində və Qarabağdakı təmas xəttində Rusiya sülhməramlıları yerləşdirilib.

1988-ci ildə başlayan Qarabağ münaqişəsi Azərbaycan və Ermənistan arasında döyüşlərə səbəb olub.

1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

'Meydan hərəkatı'nın 34 ili tamam olur

Bakıda Lenin meydanında mitinq. 1989

Bu gün, noyabrın 17-si Azərbaycanda Milli Dirçəliş Günü kimi qeyd edilir.

34 il öncə, 1988-ci il noyabrın 17-də Bakının Lenin, indiki Azadlıq meydanında Qarabağla bağlı Azərbaycan Sovet Sosialist Respublikasına SSRİ daxilində ərazi iddialarına və Kreml rəhbərliyinin buna münasibətinə etiraz olaraq mitinqlər başlayıb.

Az vaxt ərzində yüz minlərlə insan meydan hərəkatına qoşulub. Hərəkatın təşkilatçıları hesab ediblər ki, Kreml bu məsələdə qızışdırıcı və yanlış yol tutub. Fasiləsiz mitinqlər dekabrın 5-nə kimi davam edib və həmin gün sovet ordusunun zorakılığı ilə dağıdılıb. Nümayişlərin təşkilatçıları və fəalları istintaqa cəlb edilib, bir çoxu həbs edilib. Lakin həbslər uzun sürməyib.

1992-ci ildə Azərbaycan Xalq Cəbhəsinin sədri Əbülfəz Elçibəyin prezident seçilməsindən sonra həmin gün rəsmi qaydada qeyd edilməyə başlayıb. 1992-ci ildə noyabrın 17-si bayramlar sırasına salınıb və qeyri-iş günü elan edilib.

Bundan bir il əvvəl, 1991-ci ildə isə Azərbaycanda Dövlət Müstəqilliyi haqqında Konstitusiya Aktı qəbul edilmişdi.

Milli Dirçəliş Günü Azərbaycanda dövlət səviyyəsində qeyd olunsa da, 2006-cı ilin dekabrında qanunvericiliyə edilmiş dəyişikliklərə görə, artıq qeyri-iş günü deyil.

Bakıda İran əleyhinə aksiya olub

İranın Bakıdakı səfirliyinin qarşısında etiraz

Aksiyada saxlananlar buraxılıb

Müsavatdan AzadlıqRadiosuna bildiriblər ki, aksiyada saxlanılan bütün partiya üzvləri sərbəst buraxılıb.

Məsələ ilə bağlı Daxili İşlər Nazirliyi ilə danışmaq mümkün olmayıb.

+++

Noyabrın 15-də İranın Bakıdakı səfirliyinin qarşısında Müsavat Partiyası fəalları etiraz aksiyası keçirməyə cəhd ediblər.

Aksiya ilə bağlı müraciətə Bakı Şəhər İcra Hakimiyyətinin Aparatı müsbət cavab vermədiyini əsas gətirən polislər onun keçirilməsinə maneələr yaradıblar.

Aksiya iştirakçıları Axundov bağının yanında "Azadlıq, Ədalət, Milli hökumət", "Rədd olsun molla rejimi" kimi şüarlar səsləndiriblər.

Polis əməkdaşları aksiya iştirakçılarının səfirliyə yaxınlaşmasına imkan verməyib. Polislər onları saxlayaraq polis avtobuslarına və avtomobillərinə mindirib.

Aksiya zamanı partiyanın başqanı Arif Hacılının da saxlanıldığı bildirilir.

Təşkilatçıların vurğulamasına görə, aksiya zamanı ümumilikdə 30 civarında şəxs saxlanaraq naməlum istiqamətə aparılıb.

Hələlik, aksiyaya İranın Azərbaycandakı səfirliyindən münasibət almaq mümkün olmayıb.

Xatırlatma

Son aylar İranın müxtəlif bölgələrində, o cümlədən azərbaycanlıların sıx yaşadığı Təbrizdə etirazlar baş verir. İranda insan haqlarını monitorinq edən qurumların məlumatına görə, etirazçılara divan tutulması nəticəsində 350-yə yaxın şəxs öldürülüb. Etirazlara səbəb kimi sentyabrın 13-də hicab qaydasını pozduğu iddiası ilə Tehranda əxlaq polisinin saxladığı Məhsa Əmininin ölümü göstərilir. O, təcridxanaya aparılandan bir müddət keçmiş komaya düşüb və üç gün sonra xəstəxanada ölüb.

İranda hicab islam inqilabından (1979) sonra qadınlar üçün məcburi geyim kodeksi elan edilib.

Avropa İttifaqı bundan sonra İranda bəzi rəsmi şəxslərə sanksiyalar açıqlayıb.

Azərbaycan prezidenti Albaniyaya gedib

İlham Əliyev

Azərbaycan Prezidenti İlham Əliyev noyabrın 15-də Albaniya Respublikasına səfər edib.

Bu səfər çərçivəsində onun Albaniya Prezidenti Bayram Beqay və başqa rəsmi şəxslərlə görüşü nəzərdə tutulur. Həmin görüşlərdə ikitərəfli və regional əməkdaşlıq məsələlərinin müzakirəsi gözlənir.

İran və Azərbaycan nazirləri danışıb

Noyabrın 14-də Azərbaycan  xarici işlər naziri Ceyhun Bayramov ilə İran xarici işlər naziri Hüseyn Əmir Abdullahian arasında telefon danışığı olub

Bugün, noyabrın 14-də Azərbaycan xarici işlər naziri Ceyhun Bayramov ilə İran İslam Respublikasının xarici işlər naziri Hüseyn Əmir Abdullahian arasında telefon danışığı olub.

Azərbaycan Xarici İşlər Nazirliyinin (XİN) məlumatına görə, onlar ikitərəfli gündəliyin aktual məsələlərini, habelə regional vəziyyəti müzakirə ediblər:

“Tərəflər iki ölkə arasında münasibətlərdə yaranmış son vəziyyətin, ictimai ritorika ilə bağlı narahatlığın və digər mövcud problemlərin qarşılıqlı dialoq, anlaşma çərçivəsində həll edilməsinin zəruri olduğunu bildiriblər. Bu xüsusda, Xarici İşlər Nazirliklərinin mətbuat katibləri arasında əlaqə yaradılmasının faydalı ola biləcəyi diqqətə çatdırılıb.”

Məlumata görə, telefon danışığı zamanı, nazirlər qarşılıqlı maraq doğuran digər məsələlər ətrafında fikir mübadiləsi aparıb və təmasların davam etdirilməsinin vacib olduğunu qeyd ediblər.

İki ölkə arasında qarşılıqlı ittihamlar

Son aylar Azərbaycan və İran arasında qarşılıqlı ittihamlar eşidilməkdə idi.

Elə bugün, noyabrın 14-də Azərbaycan Dövlət Təhlükəsizlik Xidməti (DTX) bildirmişdi ki, İran xüsusi xidmət orqanlarının yaratdığı casus şəbəkəsi ifşa edilib. Bununla bağlı 5 Azərbaycan vətəndaşının həbs edildiyi bildirilirdi.

3 gün öncə, noyabrın 11-də İranın Azərbaycandakı səfiri Seyid Abbas Musəvi bu ölkənin Xarici İşlər Nazirliyinə çağırılmışdı.

Məlumata görə, görüşdə, son zamanlar İran mediasında Azərbaycan əleyhinə aparılan təbliğat, qarayaxma kampaniyası, yüksək vəzifəli rəsmilərin təhdid xarakterli ritorikaları ilə bağlı narazılıq və narahatlıq qarşı tərəfin diqqətinə çatdırılmışdı.

İran İnqilab Keşikçiləri Korpusu terrorçu təşkilat hesab oluna bilər
Gözlə

No media source currently available

0:00 0:03:44 0:00

Bundan bir neçə gün öncə eyni qaydada Azərbaycanın İrandakı səfirinin də həmin ölkənin xarici siyasət idarəsinə çağırılaraq oxşar narazılıqla üzləşdiyi açıqlanmışdı.

Azərbaycan DTX-sı isə bu ayın əvvəlində bildirmişdi ki, İran xüsusi xidmət orqanlarının nəzarəti altında yaradılmış qanunsuz silahlı birləşmə ifşa olunub.

Ondan bir qədər sonra İranın İnformasiya və Kəşfiyyat Nazirliyinin yaydığı məlumatda isə iddia olunurdu ki, oktyabrın 26-da bu ölkənin Şiraz şəhərindəki məsciddə törədilən terror aktının koordinatoru Azərbaycan vətəndaşıdır:

"Həbs edilənlərin heç biri iranlı deyil. Bunlar Azərbaycan Respublikasının, Tacikistan və Əfqanıstanın vətəndaşlarıdır".

Hücumda azı 15 nəfərin həlak olduğu deyilirdi.

Qeyd edilən bu açıqlamalara adı çəkilən ölkələrin rəsmi qurum və başqa maraqlı tərəflərindən birbaşa münasibət bildirilməmişdi.

Oktyabrın 17-də isə İran Silahlı Qüvvələri Azərbaycanla sərhəddə Araz sahilində hərbi təlim keçirmişdilər.

Azərbaycan parlamentində bəzi deputatlar bunu ölkələrinə təhdid kimi dəyərləndirmişdilər. Amma sonradan İranın Azərbaycandakı səfirliyi təlimlə bağlı rəsmi Bakının əvvəlcədən məlumatlandırıldığını bildirmişdi.

Daha sonra isə Azərbaycan xüsusi təyinatlıları ölkənin cənubunda təlim keçiriblər. Həmin təlimin də plana uygun keçirildiyi qeyd edilmişdi.

DTX İranın casus şəbəkəsini ifşa etdiyini deyir

DTX

Dövlət Təhlükəsizlik Xidməti (DTX) noyabrın 14-də bildirib ki, İran xüsusi xidmət orqanlarının yaratdığı casus şəbəkəsi ifşa edilib.

DTX-nın iddiasına əsasən, müəyyən edilib ki, Xəzər Dəniz Neft Donanmasında gəmi kapitanı vəzifəsində işləyən Zahir Əsgərov İranın Qum şəhərində dini təhsil aldığı müddətdə maddi maraq əvəzində onu adıçəkilən ölkənin xüsusi xidmət orqanı məxfi əməkdaşlığa cəlb edib: "O, ötən dövr ərzində onların tapşırığı ilə... xarici dövlətlərin ölkəmizdə fəaliyyət göstərən şirkət və nümayəndəlikləri, Xəzər dənizində Hərbi Dəniz Qüvvələrinin keçirdiyi təlimlərin yeri, vaxtı, neft platformalarına daşınan yüklər barədə məlumatlar toplayıb. Zahir Əsgərov sözügedən məlumatları mobil telefon vasitəsilə, eləcə də İranda həmin şəxslərlə görüşlər zamanı bilavasitə təqdim etməklə casusluq formasında dövlətə xəyanət edib".

Rəsmi məlumatda habelə oxşar əməllərdə şübhəli sayılan daha dörd Azərbaycan vətəndaşından bəhs edilir: "Zahir Əsgərov, Elnur Rəsulov, Arif Rəsulov, Mirhafiz Cəfərzadə və Bəxtiyar Ağazadə Azərbaycan Respublikası Cinayət Məcəlləsinin 274-cü (dövlətə xəyanət) maddəsi ilə cinayət məsuliyyətinə cəlb edilərək həbs olunmuşlar".

Hələlik, bu iddialara adıçəkilən şəxslər, onların vəkilləri və İranın Azərbaycandakı səfirliyindən münasibət almaq mümkün olmayıb.

Qarşılıqlı ittihamlar…

Son aylar Azərbaycan və İran arasında qarşılıqlı ittihamlar eşidilməkdədir. Elə üç gün öncə - noyabrın 11-də İranın Azərbaycandakı səfiri Seyid Abbas Musəvi bu ölkənin Xarici İşlər Nazirliyinə (XİN) çağırılmışdı. Məlumata görə, görüşdə son zamanlar İran mediasında Azərbaycan əleyhinə aparılan təbliğat, qarayaxma kampaniyası, yüksək vəzifəli rəsmilərin təhdid xarakterli ritorikaları ilə bağlı narazılıq və narahatlıq qarşı tərəfin diqqətinə çatdırılıb.

Ondan da bir neçə gün öncə eyni qaydada Azərbaycanın İrandakı səfirinin də həmin ölkənin xarici siyasət idarəsinə çağırılaraq oxşar narazılıqla üzləşdiyi açıqlanmışdı.

Azərbaycan DTX-sı da bu ayın əvvəlində bildirmişdi ki, İran xüsusi xidmət orqanının nəzarəti altında yaradılmış qanunsuz silahlı birləşmə ifşa olunub. Məlumata görə, ittiham olunan şəxslərdən birinin İran səfirliyinin avtomaşını ilə Azərbaycana çatdırılan, üzərində dini şüarlar yazılmış köynəklərin rayonlarda planlaşdırılan aksiyaların iştirakçılarına paylanmasını təşkil etməsinə şübhələr yaranıb.

Bundan bir qədər sonra İranın İnformasiya və Kəşfiyyat Nazirliyinin yaydığı məlumatda isə iddia olunurdu ki, oktyabrın 26-da bu ölkənin Şiraz şəhərindəki məsciddə törədilən terror aktının koordinatoru Azərbaycan vətəndaşıdır. Həmin hücuma görə məsuliyyəti öz üzərinə "İslam Dövləti" ekstremist təşkilatı götürmüşdü. Hadisəyə görə 26 nəfərin həbs edildiyi açıqlanıb. Hücumda azı 15 nəfərin həlak olduğu deyilirdi.

Hər iki açıqlamaya da adıçəkilən ölkələrin rəsmi qurum və şəxsləri birbaşa münasibət bildirməmişdi.

Makron Əliyevə zəng edib

İlham Əliyev və İmmanuel Makron, Praqa, 20 iyul 2018

Xəbərdə qeyd olunur ki, Fransa prezidenti noyabrın 19-də Ermənistanın baş naziri ilə görüşü barədə İlham Əliyevi məlumatlandırıb

Noyabrın 12-də Fransa Prezidenti Emmanuel Makron Azərbaycan Prezidenti İlham Əliyevə zəng edib. Bu barədə Azərbaycan prezidentinin mətbuat xidməti məlumat yayıb.

Məlumatda qeyd olunur ki, Fransa Prezidenti noyabrın 19-da keçiriləcək Frankofoniya təşkilatının 18-ci Zirvə Görüşü çərçivəsində Ermənistanın baş naziri Nikol Paşinyanla görüşəcəyi barədə İlham Əliyevə məlumat verib və Fransanın Ermənistanla Azərbaycan arasında münasibətlərin normallaşdırılması prosesinə töhfə vermək niyyətini bir daha ifadə edib.

Bundan başqa xəbər də vurğulanır ki, tərəflər Azərbaycan, Ermənistan, Avropa İttifaqı və Fransanın iştirakı ilə dördtərəfli formatda keçirilmiş Praqa görüşünün nəticələri və bundan irəli gələn məsələlər barədə fikir mübadiləsi aparıblar.

Həmçinin bildirilir ki, İlham Əliyev Ermənistanla Azərbaycan arasında münasibətlərin normallaşdırılması prosesində bitərəf, qərəzsiz və tarazlaşdırılmış yanaşmanın nümayiş etdirilməsinin vacibliyini qeyd edib:

"Dövlətimizin başçısı Ermənistan tərəfindən son günlərdə səsləndirilən bəyanatların iki ölkə arasında münasibətlərin normallaşdırılması və sülh gündəliyi ilə ziddiyyət təşkil etdiyini diqqətə çatdırıb."-xəbərdə deyilir.

Hesablama Palatası AZAL-da nöqsanlar tapıb

AZAL loqo

Hesablama Palatası Azərbaycan Hava Yolları Cəmiyyətində (AZAL-Qapalı Səhmdar Cəmiyyət) apardığı yoxlamalarla bağlı açıqlama yayıb. 2019-2021-ci illəri əhatə edən yoxlama zamanı qurumda bir çox nöqsanların üzə çıxdığı bildirilir.

Palatanın açıqlamasından aydın olur ki, aparılan yoxlamalar şirkətin xidmətlərinin bahalığı, rəqabət mühitinin məhdudluğu ilə bağlı indiyə qədər müxtəlif səviyyələrdə səsləndirilən nöqsanları təsdiqləyir.

Yeni dəhliz ilk erməni kəndində böyük mübahisəyə səbəb olub
Gözlə

No media source currently available

0:00 0:04:37 0:00

Məlumatda vurğulanır ki, audit yoxlaması qiymətlərin daha rəqabətli mühitdə formalaşmasına üstün diqqət yetirilmədiyini müəyyənləşdirib. Bütövlükdə rentabelliyin artırılması potensialı da gərəyincə dəyərləndirilməyib. Bununla yanaşı, bəzi komisyon haqları ilə bağlı bənzər standartlardan yüksək tariflərin tətbiq edildiyi də üzə çıxıb.

Yoxlamalara görə, AZAL-ın fəaliyyətində dövlət-özəl tərəfdaşlığının beynəlxalq təcrübədə mövcud uğurlu nümunələri də öyrənilib, tətbiqi imkanlarından da istifadə edilməyib.

Bu əməkdaşlıq nəticəsində əldə edilə biləcək əlavə gəlir potensialı da reallaşdırılmamış qalıb.

Aeroportlardan istifadə əmsalı aşağıdır

Hesablama Palatasının açıqlamasında AZAL-ın xidmətlərindən istifadə göstəricisi də diqqət çəkir.

Açıqlamada deyilir ki, xərc tutumu daha yüksək olan uzunməsafəli istiqamətlərdə doluluq səviyyəsi orta göstəricidən önəmli səviyyədə aşağıdır.

Bilet qiymətlərinin optimallaşdırılmasına əngəl törədən amillər də müəyyənləşdirilib. Aeroportlardan istifadə zamanı uçuş aralarının uzunluğu, sabit xərc yükü sərnişindaşıma fəaliyyətindən gəlirləri artırmağa mənfi təsir edir. Hesablama Palatasının auditinə görə, biletləri ucuzlaşdırmağa mənfi təsir göstərən bir amil də yanacağın bahalaşmasıdır.

AZAL-ın reaktiv mühərrik yanacağından istifadə etdiyi həcmlərinin alış qiymətləri 2021- ci ilin fevralından bəri beynəlxalq satış birjalarında formalaşan qiymətlər əsasında müəyyənləşdirilir. Halbuki, reaktiv mühərrik yanacağının ölkədaxili istehsalı var və bunu dövlət tənzimləmir.

Bu baxımdan, Palata Azərbaycan İnvestisiya Holdinqinin idarəetməsində olan milli rezidentlər arasında qarşılıqlı kommersiya münasibətlərinin dövlət sektoru kontekstində tənzimlənmədiyini ayrıca vurğulayır.

Hesablama Palatasının auditi ortaya çıxarıb ki, iş və xidmətlər, əsasən, kənar hüquqi şəxslərə sifariş verilib. Palatanın fikrincə, bütövlükdə muzdlu işçi kontingentinin ştat cədvəli üzrə və gerçək sayı uzunmüddətli dövr üçün optimallaşdırılmayıb.

İki milyard manatı aşan borc var

Hesablama Palatasının bu ilin əvvəlinə olan məlumatına görə, AZAL-ın borcu 2 milyard 100 milyon manata yaxındır. Palata düşünür ki, borc məbləğinin belə çox olması şirkətin maliyyə likvitliyinə ciddi risklər yaradır. Beləki uzunmüddətli perspektivdə cari dövriyyə vəsaitləri cari öhdəliklərdən geri qala bilər.

Üstəlik, AZAL-ın borcları dövlət maliyyəsi üçün də əlavə xərclər yaradır. Hesablama Palatasının ötənilki dövlət büdcəsinin icrasına dair rəyindən aydın olur ki, “Təminat Fondu” hesabına AZAl-ın borclarının ödənilməsinə təxminən 35 milyon manat xərclənib.

Bu göstərici ilə şirkət fond hesabına ən çox borcu ödənilən dördüncü dövlət müəssisəsi olub. Bu da bildirilir ki, AZAL bir sıra hallarda aktivlərdən qənaətli istifadə və artıq xərclərin qarşısının alınması baxımından dövlət sektoru kontekstində düzgünlük meyarlarına əməl etməyib.

Dövlət əmlakının və dövlət vəsaitlərinin yönəldilməsində audit meyarları ilə müqayisədə bir sıra əhəmiyyətli uyğunsuzluq halları olub. Palata bütün nöqsan və çatışmazlıqların aradan qaldırılması üçün təkliflər irəli sürüb.

Hələki AZAL Hesablama Palatasının yoxlamanın nəticələri ilə bağlı açıqladığı məlumata hər hansı münasibət bildirməyib.

Davamı

XS
SM
MD
LG