Keçid linkləri

2017, 12 Dekabr, çərşənbə axşamı, Bakı vaxtı 04:35

Əfqan Muxtarlı Gürcüstan prezidentinə təşəkkür etdi


«Gürcüstanda insan hüquqlarının müdafiəsi uğrunda mübarizə aparan və mənim hüquqlarımı müdafiə edən jurnalist həmkarlarıma, vətəndaş cəmiyyəti fəallarına, Gürcüstan prezidentinə, bütün ictimai-siyasi təşkilatlara təşəkkür edirəm».

1 saylı Bakı İstintaq Təcridxanasında saxlanan jurnalist Əfqan Muxtarlı vəkilləri vasitəsilə göndərdiyi bəyanatında belə deyib.

Vəkillərindən Nemət Kərimli bu gün, iyunun 9-da təcridxanada onunla görüşüb.

Ə.Muxtarlı bəyanatında Gürcüstanda diktatura yaradılmasına imkan verilməyəcəyinə ümidvar olduğunu söyləyib.

Jurnalistin saxlanma şəraitindən şikayət etmədiyini bildirən vəkili başqa çətinliklərinin olduğunu xəbər verib.

«Onun ailə üzvləri, yaxınları ilə telefonla danışmasına qeyri-rəsmi qadağa qoyulub. İndiyədək danışa bilməyib. Ancaq təcridxana rəhbərliyi bu gündən etibarən telefonla yaxınları ilə əlaqə saxlamasına imkan yaradılacağını bildirib», - vəkil deyib.

Gürcüstan prezidenti Giorgi Margvelashvili bu günlər mətbuata açıqlamasında Ə.Muxtarlı ilə bağlı baş verənləri ölkəsinin suverenliyi və təhlükəsizliyinə təhdid adlandırmışdı. Baş nazir və daxili işlər naziri isə bu məsələdə Gürcüstan hüquq-mühafizə orqanlarının iştirakını istisna edərək, istintaqın başa çatmasını gözləməyi məsləhət bilmişdi.

XATIRLATMA

Jurnalist Ə.Muxtarlı mayın 29-u oturum izini aldığı Gürcüstandan zorla Azərbaycana gətirildiyini deyir. Jurnalist Cinayət Məcəlləsinin 315.2-ci maddəsi ilə hakimiyyət nümayəndəsinə müqavimət və ya zor tətbiq etmədə ittiham olunur.

Bundan başqa, ona 318.1, 206.1 maddələr ilə - sərhədi qanunsuz keçmə və qaçaqmalçılığa görə də ittiham irəli sürülüb.

Bakıda rəsmi qurumlar iddia edir ki, Ə.Muxtarlı sərhədi qanunsuz keçərkən Azərbaycan ərazisində saxlanıb və bu məsələnin siyasiləşdirilməsi düzgün deyil.

Məhkəmənin qərarı ilə ona ilkin istintaq dövründə 3 aylıq həbs cəzası verilib.

Ə.Muxtarlı iki ildən çoxdur Gürcüstanda yaşayırdı. O, Azərbaycanda təqib olunduğunu bildirmişdi. Ə.Muxtarlı son illər Tbilisidə Azərbaycan hakimiyyətinin əleyhinə keçirilən aksiyalarda da fəal iştirak edirdi. O, bir sıra araşdırma yazılarının da müəllifi idi.

Günün bütün mövzuları

XS
SM
MD
LG