Keçid linkləri

Təcili xəbərlər
2021, 23 Sentyabr, Cümə axşamı, Bakı vaxtı 13:52

Azərbaycan xəbərləri

Hüquq müdafiəçisi: 'Əfqan Muxtarlı 'Qırmızı Xaç'dan gizlədilib'

Beynəlxalq Qırmızı Xaç Komitəsi

“Beynəlxalq Qırmızı Xaç Komitəsinin (BQXK) nümayəndələrinin hazırda həbsdə olan jurnalist Əfqan Muxtarlı ilə görüşünə imkan verilmir...”

Bunu hüquq müdafiəçisi Oktay Gülalıyev bildirib:

“Bakı İstintaq Təcridxanasından bildirilib ki, o burda deyil. Əslində Təcridxana rəhbərliyi BQXK nümayəndələrinə yalan deyiblər, Əfqan Muxtarlı adı çəkilən həbs yerində saxlanılır...”

Buna da bax:​ Avropa Birliyindən Əfqan Muxtarlı çağırışı

O.Gülalıyev deyir ki, BQXK əməkdaşlarının Ə. Muxtarlı ilə görüşünə imkan verilməməsi, işgəncə hallarını gizlətməyə xidmət edir.

Beynəlxalq Qırmızı Xaç Komitəsinin Bakı nümayəndəliyi isə “Turan” Agentliyinin hüquq müdafiəçisinin dedikləri ilə bağlı sualına münasibət bildirmək istəməyiblər.

Nümayəndəliyin ictimaiyyətlə əlaqələr şöbəsinin müdiri İlahə Hüseynova yalnız bunları deyib:

“Biz məhbusların saxlanma yerlərinə baş çəkərik və onlarla görüşərik. Amma bu zaman prinsiplərimizə sadiq qalırıq. Yəni bu görüşə şərh verilməz, sonuna qədər konfidensiallıq qorunar”.

Buna da bax:​ Gürcüstanda Əxqan Muxtarlı ilə bağlı növbəti aksiya keçirilib

Məsələyə, Ədliyyə Nazirliyinin Penitensiar Xidmətindən isə, hələlik, hər hansı münasibət almaq mümkün olmayıb.

Xatırlama

Jurnalist Ə.Muxtarlı mayın 29-u oturum izini aldığı Gürcüstandan zorla Azərbaycana gətirildiyini deyir.

Jurnalist Cinayət Məcəlləsinin 315.2-ci maddəsi ilə hakimiyyət nümayəndəsinə müqavimət göstərmə və ya zor tətbiq etmədə ittiham olunur. Bundan başqa ona 318.1, 206.1 maddələr ilə - sərhədi qanunsuz keçmə və qaçaqmalçılığa görə də ittiham irəli sürülüb.

Məhkəmənin qərarı ilə ona ilkin istintaq dövründə 3 aylıq həbs cəzası verilib.

Buna da bax:​ 'Muxtarlının oğurlanması'na Gürcüstan rəsmilərinin reaksiyaları

Ancaq o, məhkəmədə bildirib ki, Gürcüstandan zorla gətirilib. Ona işgəncə verilib və cibinə 10 min avro pul qoyublar.

Ə.Muxtarlı iki ildən çoxdur Gürcüstanda yaşayırdı. O, Azərbaycanda təqib olunduğunu bildirmişdi. Ə.Muxtarlı son illər Tbilisidə Azərbaycan hakimiyyətinin əleyhinə keçirilən aksiyalarda da fəal iştirak edirdi. O, bir sıra araşdırma yazılarının da müəllifi idi. Ə.Muxtarlı, həmçinin, Qarabağ müharibəsinin keçmiş iştirakçısıdır.

Bütün xəbərləri izləyin

1356 gündəlik yoluxma aşkarlanıb, 17 ölüm

Sentyabrın 22-də verilən məlumata görə, COVID-19 üçün götürülən analiz nümunələri müsbət çıxan 17 nəfər vəfat edib

Son bir gündə Azərbaycanda koronavirus (COVID-19) infeksiyasına 1356 yeni yoluxma faktı qeydə alınıb, bu virusa yoluxanlardan 2651 nəfər sağalıb.

Nazirlər Kabineti yanında Operativ Qərargahdan sentyabrın 22-də verilən məlumata görə, COVID-19 üçün götürülən analiz nümunələri müsbət çıxan 17 nəfər vəfat edib.

Açıqlamaya görə, indiyədək ölkədə ümumilikdə 476 min 409 nəfərin koronavirus infeksiyasına yoluxması faktı müəyyən edilib, onlardan 441 min 731-i sağalıb, 6370-i vəfat edib, aktiv xəstə sayı 28 min 308-ə düşüb .

Bildirildiyinə görə, son sutka ərzində yeni yoluxma hallarının müəyyənləşdirilməsi ilə əlaqədar ölkədə 13 min 546, ötən müddət ərzində isə ümumilikdə 4 milyon 778 min 393 test aparılıb.

Xatırlatma

2019-cu ilin sonlarında dünyada yeni koronavirus aşkar edilib.

2020-ci il martın 11-də Dünya Səhiyyə Təşkilatı koronavirusu pandemiya elan edib.

Dünyada sürətlə yayılan bu virusdan indiyə qədər 4,7 milyondan çox şəxsin vəfat etdiyi açıqlanıb.

Beynəlxalq Bank da İnvestisiya Holdinqinə verildi

Azərbaycan Beynəlxalq Bankı

Azərbaycan Beynəlxalq Bankı İnvestisiya Holdinqinin idarəetməsinə verilib.

Bununla bağlı bu gün, sentyabrın 22-də prezident İlham Əliyev fərman imzalayıb.

Azərbaycan İnvestisiya Holdinqi 2020-ci ilin avqustunda prezidentin fərmanı ilə yaradılıb. Bu qurumun ölkə iqtisadiyyatının müasir çağırışlara cavab verməsi məqsədilə yaradıldığı açıqlanıb.

Azərbaycan Dövlət Neft Şirkəti (SOCAR) və bir çox dövlət qurumları da onun idarəetməsinə verilib.

Bu gün, sentyabrın 22-də Azərbaycan Beynəlxalq Bankından başqa "Azər-Türk Bank" ASCDövlət Sığorta Şirkəti (Azərsığorta) də İnvestisiya Holdinqinin idarəetməsinə keçib.

Ekspert: "Rövnəq Abdullayevin səlahiyyəti alınır"
Gözlə

No media source currently available

0:00 0:03:59 0:00

Xatırlatma

Azərbaycan Beynəlxalq Bankı (ABB) 3.3 milyard dollar borcun restrukturizasiyasına nail olmaq məqsədilə 2017-ci il mayın 11-də Nyu-York məhkəməsinə müraciət etmişdi. Nəticədə Azərbaycan dövləti həmin borcu öz üzərinə götürdü.

Bu bankın keçmiş rəhbəri Cahangir Hacıyev isə 2015-ci ilin dekabrından həbs olunub. O, əvvəlcə mənimsəmə və vəzifəsindən sui-istifadə ittihamı ilə 15 il həbs cəzası almışdı. Sonra ona yenidən hökm oxunub. Bu dəfə əvvəlki cəzası da birləşdirilməklə 16 il 6 ay azadlıqdan məhrum edilib. C.Hacıyev bu dəfə Beynəlxalq Bankdan kredit kimi götürülmüş 4.7 milyard manatı mənimsəmədə təqsirli bilinib. O, ittihamları qəbul etmir.

Azərbaycan İrandan kartof idxalını qismən dayandırır

Kartof

Azərbaycan İranın bəzi subyektlərindən kartof idxalını dayandırır.

Bu barədə bu gün, sentyabrın 22-də Azərbaycan Qida Təhlükəsizliyi Agentliyi (AQTA) məlumat yayıb.

Məlumata görə, İranın "Afshin Ghoje Biglo Agha Mohammad Biglo" və "Saleh Ehsas Gojeh Bagloo" adlı təsərrüfat subyektlərinin Azərbaycana ixrac edilən kartof məhsulunda kartof güvəsi (Phthorimaea operculella) aşkarlanıb: "Bununla əlaqədar Agentlik İran tərəfinə notifikasiya verib, adıçəkilən subyektlər tərəfindən Azərbaycana kartof ixracının dayandırılması və baş verən uyğunsuzluqların araşdırılaraq nəticəsi barədə məlumat verilməsinin zəruriliyi bildirilib".

Məsələyə, hələlik, İranın cavabdeh qurumları və sözügedən subyektlərin təmsilçilərindən münasibət öyrənmək mümkün olmayıb.

İrana keçənlər nə alıb gətirir
Gözlə

No media source currently available

0:00 0:01:37 0:00

Son həftələr Azərbaycanda kartofun qiymətlərində təqribən 20 faiz bahalaşma müşahidə edilir. Ekspertlər bu il Azərbaycanda kartofun məhsuldarlığının aşağı olduğunu bildirirlər.

+++

Azərbaycanın ticarət şəbəkələrində son həftələr kartofun bahalaşması ilə bağlı "Turan" agentliyinin sualına Kənd Təsərrüfatı Nazirliyindən cavab veriblər.

Nazirliyin İctimaiyyətlə əlaqələr və informasiya təminatı şöbəsinin müdiri Vüqar Hüseynov deyib ki, ölkədə bazar qiymətləri azaddır. "Qiymətlər nazirliyin səlahiyyətində deyil", - o vurğulayıb.

Xatırlatma

Kartof güvəsi kartofun, badımcanın, pomidorun, bibərin, tütünün və quşüzümü fəsiləsinə aid yabanı bitkilərin karantin zərərvericisidir. Kəpənəyi kiçik, parlaq boz rəngdədir.

Güvə ən çox kartofa ziyan vurur. Kütləvi çoxaldıqda sahədə və ya çardaq altında müvəqqəti saxlanan kartof yumrularını iki-üç həftə ərzində tamamilə məhv edə bilir. Zərərverici 25-80 faiz məhsul itkisinə səbəb olur.

Ceyhun Bayramov Viktoriya Nulandla görüşüb

C.Bayramov və V.Nuland

Dünən, sentyabrın 21-də BMT Baş Assambleyasının 76-cı sessiyası çərçivəsində Azərbaycan Xarici İşlər naziri Ceyhun Bayramov Amerika Birləşmiş Ştatlarının (ABŞ) dövlət katibinin siyasi məsələlər üzrə müavini Viktoriya Nuland ilə görüşüb.

Bu barədə Azərbaycan Xarici İşlər Nazirliyi (XİN) sentyabrın 22-də məlumat yayıb.

Məlumata görə, tərəflər regional və beynəlxalq təhlükəsizlik məsələləri ətrafında ümumi fikir mübadiləsi aparıblar.

XİN-in bildirməsinə görə, ABŞ rəsmisi beynəlxalq sülh və təhlükəsizlik məsələlərində Azərbaycan ilə əməkdaşlığı yüksək dəyərləndirib: "Tərəflər bölgədəki cari təhlükəsizlik vəziyyəti, 10 noyabr 2020-ci il tarixli üçtərəfli bəyanatın icrası ilə əlaqədar məsələlər üzrə fikir mübadiləsi aparıblar. Nazir Ceyhun Bayramov Azərbaycan tərəfindən bu xüsusda konstruktiv addımların atıldığını, Ermənistan tərəfindən isə buna qarşılığın verilmədiyini qeyd edib".

Məlumata görə, görüşdə bölgənin sülh şəraitində gələcək inkişafı üçün kommunikasiyaların açılışının və dövlət sərhədlərinin delimitasiyasının vacibliyi vurğulanıb: "Görüşdə tərəflər, habelə… iqtisadi, energetika, təhlükəsizlik və digər sahələrdə əməkdaşlığın inkişafı məsələlərini müzakirə ediblər".

ABŞ-ın Nyu-York şəhərində keçirilən BMT Baş Assambleyasının 76-cı sessiyası sentyabrın 14-də başlayıb. Sessiya sentyabrın 27-də başa çatmalıdır. Onun əsas müzakirə mövzularından biri Əfqanıstandakı vəziyyətdir. Ötən ay Əfqanıstanda "Taliban" hərəkatı silahlı yolla hakimiyyətə gəlib. Ölkədə humanitar problemlərin kəskin hal aldığı bildirilir.

Xatırlatma

2020-ci ildə, 44 günlük İkinci Qarabağ müharibəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və qoşunların təmas xəttində Rusiya sülhməramlıları yerləşdirilib. Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.

Qarabağ münaqişəsi Ermənistanın Azərbaycana ərazi iddiaları ilə 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

1594 gündəlik yoluxma aşkarlanıb, 26 ölüm

İllüstrativ foto

Sentyabrın 21-də verilən məlumata görə, COVID-19 üçün götürülən analiz nümunələri müsbət çıxan 26 nəfər vəfat edib

Son bir gündə Azərbaycanda koronavirus (COVID-19) infeksiyasına 1594 yeni yoluxma faktı qeydə alınıb, bu virusa yoluxanlardan 2543 nəfər sağalıb.

Nazirlər Kabineti yanında Operativ Qərargahdan sentyabrın 21-də verilən məlumata görə, COVID-19 üçün götürülən analiz nümunələri müsbət çıxan 26 nəfər vəfat edib.

Açıqlamaya görə, indiyədək ölkədə ümumilikdə 475 min 53 nəfərin koronavirus infeksiyasına yoluxması faktı müəyyən edilib, onlardan 439 min 80-i sağalıb, 6353-ü vəfat edib, aktiv xəstə sayı 29 min 620-ə düşüb .

Bildirildiyinə görə, son sutka ərzində yeni yoluxma hallarının müəyyənləşdirilməsi ilə əlaqədar ölkədə 13 min 583, ötən müddət ərzində isə ümumilikdə 4 milyon 764 min 847 test aparılıb.

Xatırlatma

2019-cu ilin sonlarında dünyada yeni koronavirus aşkar edilib. 2020-ci il martın 11-də Dünya Səhiyyə Təşkilatı koronavirusu pandemiya elan edib.

Dünyada sürətlə yayılan bu virusdan indiyə qədər 4,7 milyondan çox şəxsin vəfat etdiyi açıqlanıb.

Azərbaycan mənzil sökməyə görə 64 min təzminat ödəyəcək

Sovetski sakinləri etiraz edirlər
Gözlə

No media source currently available

0:00 0:02:52 0:00

Bu gün, sentyabrın 21-də Avropa İnsan Hüquqları Məhkəməsi (AİHM) Azərbaycandan gələn yeddi şikayət üzrə qərar qəbul edib. Ərizələr birləşdirilib, yekunda bir qərar çıxarılıb.

Bu barədə AzadlıqRadiosuna məlumat verən hüquqşünas Xalid Ağalıyev deyib ki, ərizəçilər Zülfiyyə Əliyeva və başqaları Səbail rayon sakinləridir.

Hüquqşünasın vurğulamasına görə, işdə bildirilir ki, onların mənzilləri 2011-12 illərdə sökülüb: "Bakı Şəhər İcra Hakimiyyətinin qərarı ılə. Mənzillərin yerində yol tikintisi nəzərdə tutulub".

Şikayətdə bildirildiyinə görə, hər kvadratmetr üçün ailələrə 1500 manat təzminat ödənilib, amma bu məbləğin 30 faizi həcmində əlavəni sakinlər almayıblar.

X.Ağalıyevin deməsinə görə, AİHM-ın qərarına görə, Azərbaycan hökuməti ümumilikdə 64 min 30 avro ödəməlidir.

Qərara Azərbaycanın cavabdeh rəsmi qurumlarından münasibət almaq mümkün olmayıb.

Sürücülərdən də COVID-pasport tələb ediləcək

'COVID pasportu əməlli-başlı biznesə çevrilib'
Gözlə

No media source currently available

0:00 0:04:13 0:00

Oktyabrın 1-dən etibarən immunitet sertifikatı və COVID-19 pasportu olmayan sürücülər aşkarlanarsa, onların reysdə iştirakına icazə verilməyəcəyi bildirilir.

Bunu Nəqliyyat, Rabitə və Yüksək Texnologiyalar Nazirliyi yanında Dövlət Avtomobil Nəqliyyatı Xidmətindən deyiblər.

Qurumdan qeyd ediblər ki, Nazirlər Kabinetinin bu il iyulun 26-da verilən qərarına əsasən, COVID-19-a qarşı peyvənd olunması, yaxud immunitet sertifikatının tələb olunduğu iş, xidmət sahələrinə avtomobil nəqliyyatı ilə yük və sərnişin daşınması, o cümlədən taksi fəaliyyəti də daxildir: "Bu səbəbdən... Dövlət Avtomobil Nəqliyyatı Xidməti tərəfindən qərarın icrasının təmin olunması ilə bağlı bütün daşıyıcı şirkətlərə xəbərdarlıq edilib".

Bu il sentyabrın 1-dən Azərbaycanda iri ticarət mərkəzinə və habelə ali məktəblərə girişdə də COVID-19 pasportu tələb edilir.

Xatırlatma

2019-cu ilin sonlarında dünyada yeni koronavirus aşkar edilib. 2020-ci il martın 11-də Dünya Səhiyyə Təşkilatı koronavirusu pandemiya elan edib. Dünyada sürətlə yayılan bu virusdan indiyə qədər 4.7 milyondan çox şəxsin vəfat etdiyi açıqlanıb. Azərbaycanda isə sentyabrın 21-nə kimi ümumilikdə 473 min 459 nəfərin koronavirus infeksiyasına yoluxması faktı müəyyən edilib, onlardan 6 min 327-nin vəfat etdiyi bildirilib.

Azərbaycanda vaksinasiyaya bu il yanvarın 18-dən başlanıb. İndiyə qədər 8 milyona yaxın peyvənd vurulduğu bildirilir. Bunlardan 4.6 milyonu birinci, 3.3 milyonu isə ikinci dozanın payına düşür. Azərbaycan əhalisi 10 milyondan çoxdur.

Traktorçu minaya düşüb

Mina xəritələri qeyri-dəqiqdir? 'Təbiət hadisəsi də ola bilər'
Gözlə

No media source currently available

0:00 0:03:42 0:00

Bu gün, sentyabrın 21-də saat 01 radələrində Ağdam rayonunun Qərvənd kəndi ərazisində "Körpü-Bina-Tikinti" MMC-yə məxsus ekskavator yükləyici traktorun tank əleyhinə minaya düşdüyü bildirilir.

Ağdam Rayon Prokurorluğundan verilən məlumata görə, nəticədə sürücü, 1972-ci il təvəllüdlü Zəfər Ağayev müxtəlif dərəcəli bədən xəsarəti alıb.

Faktla bağlı Ağdam Rayon Prokurorluğunda araşdırma aparılır.

Məsələyə, hələlik, traktorçunun yaxınları və "Körpü-Bina-Tikinti" MMC-dən münasibət almaq mümkün olmayıb.

Azərbaycanın rəsmi qurumlarının açıqlamasına görə, ötən il üçtərəfli bəyanatın imzalanmasından bəri 25 civarında vətəndaş işğaldan azad edilən ərazilərdə minaya düşmə səbəbindən həlak olub, 100-dən çoxu yaralanıb.

Onlar Ermənistan tərəfini minalanmış ərazilərin xəritələrini Azərbaycana verməməkdə günahlandırırlar. Hərçənd, bir müddət əvvəl Azərbaycanda tutulan Ermənistan hərbçilərindən bir neçə qrupunun təhvil verilməsi əvəzi Ağdam, Füzuli və Zəngilan rayonlarına aid mina xəritələrinin geri alındığı açıqlanmışdı. Amma sonradan Azərbaycan prezidenti həmin xəritələrin reallığı böyük ölçüdə əks etdirməməsi ilə bağlı narazılığını ifadə etdi. Həmin narazılığa isə Ermənistanın rəsmi qurumlarından, hələlik, münasibət almaq mümkün olmayıb.

Xatırlatma

2020-ci ildə, İkinci Qarabağ müharibəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və qoşunların təmas xəttində Rusiya sülhməramlıları yerləşdirilib. Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.

Qarabağ münaqişəsi Ermənistanın Azərbaycana ərazi iddiaları ilə 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

İki Ermənistan vətəndaşı qaytarılıb

Gorus-Qafan yolunun bir hissəsi

Azərbaycan qüvvələrinin nəzarəti altında olan ərazidə saxlanmış iki Ermənistan vətəndaşı erməni tərəfinə verilib

Azərbaycan qüvvələrinin nəzarəti altında olan ərazidə saxlanmış iki Ermənistan vətəndaşı erməni tərəfinə verilib.

AzadlıqRadiosunun Erməni xidməti Ermənistan Milli Təhlükəsizlik Xidmətinə (MTX) istinadən bildirir ki, Azərbaycan tərəfi saxlananları sentyabrın 20-də saat 23:45-də qaytarıb.

Ermənistan MTX bildirir ki, saxlananların qaytarılması Ermənistan və Rusiya sərhədçilərinin səyləri nəticəsində mümkün olub.

Bundan əvvəl Ermənistan MTX xəbər vermişdi ki, Ermənistanın Kotayk vilayətinin Kasax icmasından iki Ermənistan vətəndaşı Gorus-Vorotan magistralından yayınaraq Azərbaycanın nəzarətində olan əraziyə keçib.

“Sarsılmaz qardaşlıq-2021” təlimi başlayıb

Naxçıvanda “Sarsılmaz qardaşlıq-2021”  Azərbaycan və Türkiyə birgə taktiki təliminə start verilib

Naxçıvanda “Sarsılmaz qardaşlıq-2021” Azərbaycan və Türkiyə birgə taktiki təliminə start verilib.

Bu barədə sentyabrın 20-də Azərbaycan Müdafiə Nazirliyi məlumat yayıb.

Məlumata görə, bu Azərbaycan və Türkiyə arasında imzalanmış hərbi əməkdaşlıq haqqında sazişə əsasən gerçəkləşib.

Qeyd edilir ki, təlimdə hər iki ölkənin motoatıcı, xüsusi təyinatlı, komando və müxtəlif qoşun növləri iştirak edəcək.

Təlimin nə vaxt başa çatacağı açıqlanmayıb.

Bundan əvvəlki bir neçə ildə də Naxçıvanda iki ölkə arasında eyni adda təlim keçirilib.

740 gündəlik yoluxma aşkarlanıb, 22 ölüm

Son bir gündə Azərbaycanda koronavirus (COVID-19) infeksiyasına 740 yeni yoluxma faktı qeydə alınıb,  bu virusa yoluxanlardan 2442 nəfər sağalıb

Son bir gündə Azərbaycanda koronavirus (COVID-19) infeksiyasına 740 yeni yoluxma faktı qeydə alınıb, bu virusa yoluxanlardan 2442 nəfər sağalıb.

Nazirlər Kabineti yanında Operativ Qərargahdan verilən məlumata görə, COVID-19 üçün götürülən analiz nümunələri müsbət çıxan 22 nəfər vəfat edib.

Qərargahdan verilən açıqlamaya görə, indiyədək ölkədə ümumilikdə 473 min 459 nəfərin koronavirus infeksiyasına yoluxması faktı müəyyən edilib, onlardan 436 min 537-i sağalıb, 6327-i vəfat edib, aktiv xəstə sayı 30 min 595-ə düşüb.

Bildirildiyinə görə, son sutka ərzində yeni yoluxma hallarının müəyyənləşdirilməsi ilə əlaqədar ölkədə 7 103, ötən müddət ərzində isə ümumilikdə 4 751 264 test aparılıb.

Xatırlatma

2019-cu ilin sonlarında dünyada yeni koronavirus aşkar edilib. 2020-ci il martın 11-də Dünya Səhiyyə Təşkilatı koronavirusu pandemiya elan edib.

Dünyada sürətlə yayılan bu virusdan indiyə qədər 4,6 milyondan çox şəxsin vəfat etdiyi açıqlanıb.

Qlobal innovasiyaya görə neçənciyik

Bosniya və Herseqovinada Təhsil, Roboteka, İnnovasoya və Texnologiya Mərkəzi

Bu ilin yeniliyi Qlobal İnnovasiya İzləyicisidir

Sentyabrın 20-də 132 iqtisadiyyatın innovasiya perfomansı, həmçinin COVID-19 pandemiyanın innovasiyaya təsirini göstərən indeks açıqlanıb. Bu indeks dövlət və özəl mənbələrdən 81 indikator əsasında hazırlanır.

Bu ilin yeniliyi Qlobal İnnovasiya İzləyicisidir. Dünyada COVID-19 pandemiyasının təsirləri hələ də qaldığından indeks böhranın qlobal innovasiya perfomansına təsirini də dəyərləndirir.

Qlobal İnnovasiya İndeksində ilk 10-luqda İsveçrə, İsveç, Birləşmiş Ştatlar, Böyük Britaniya, Koreya Respublikası, Niderland, Finlandiya, Sinqapur, Danimarka və Almaniya yer alıb.

Azərbaycan 132 ölkə içində 80-cidir. Ermənistan 69, Rusiya 45, Gürcüstan 63, İran 60-cı yerdədir.

Yarım ton heroin saxlanılıb

105 şəffaf paketə qablaşdırılmış... heroin

Azərbaycan gömrükçülərinin yarım tondan çox heroini müsadirə etdikləri bildirilir.

Bu barədə Azərbaycan Dövlət Gömrük Komitəsi məlumat yayıb.

Məlumata görə, Biləsuvar gömrük postunda Azərbaycan ərazisindən tranzit keçməklə İrandan Latviyaya "kimyəvi maddə və quruducu qatqı" yükü aparan İran vətəndaşı Sıasatı Aşkan Bahmanın idarə etdiyi yük avtomobili saxlanıb: "...Avtomobildə olan... 105 şəffaf paketə qablaşdırılmış... heroin aşkar edilib. Baxış zamanı paketlər elektron tərəzidə çəkilib və təqribi çəkisinin 527 kq 600 qram olduğu müəyyənləşib".

Bu açıqlamaya sürücünün və ya onun vəkilinin münasibətini, hələlik, almaq mümkün olmayıb.

Rusiya gəmiləri Bakıya gəldi və getdi

Rusiya hərbi gəmisi Bakı limanında - 18 sentyabr 2021

Rusiya Xəzər flotiliyasının hərbi gəmiləri Bakı limanını tərk edib.

Bu barədə Azərbaycan Müdafiə Nazirliyi sentyabrın 20-də məlumat yayıb.

Məlumatda qeyd edilib ki, Azərbaycanda qeyri-rəsmi dostluq səfərində olan Rusiya Federasiyası Hərbi Dəniz Donanmasının (HDD) Xəzər flotiliyasının "Astraxan" və "Anatoli Qujvin" hərbi gəmiləri Bakı limanını tərk ediblər.

Rusiya hərbi gəmiləri sentyabrın 18-də Bakıya gəlmişdi.

Bakıda Azərbaycan və Rusiya hərbi dənizçiləri arasında görüş də keçirilib: "Azərbaycan hərbi Dəniz Qüvvələrinin (HDQ) komandanı kontr-admiral Sübhan Bəkirov Rusiya HDD-sı Xəzər flotiliyasının gəmilərinin dəstə komandiri 2-ci dərəcəli kapitan Vladimir Zaytsevin rəhbərlik etdiyi nümayəndə heyətini qəbul edib. Görüşdə Azərbaycan HDQ ilə Rusiya Xəzər Flotiliyası arasında dostluq münasibətləri və qarşılıqlı maraq doğuran digər məsələlər müzakirə olunub".

Ceyhun Bayramov Nyu-Yorka gedib

C.Bayramov

Azərbaycan Xarici İşlər naziri Ceyhun Bayramovun rəhbərlik etdiyi nümayəndə heyəti BMT Baş Assambleyasının 76-cı sessiyasında iştirak etmək üçün ABŞ-ın Nyu-York şəhərinə yola düşüb.

Bu barədə bu gün, sentyabrın 20-də Azərbaycan Xarici İşlər Nazirliyi məlumat yayıb.

Məlumata görə, səfər zamanı sessiya çərçivəsində keçiriləcək tədbirlərdə iştirak, habelə xarici dövlətlərin rəsmiləri ilə ikitərəfli görüşlərin keçirilməsi nəzərdə tutulur.

BMT Baş Assambleyasının 76-cı sessiyası sentyabrın 14-də başlayıb.

Sabah sentyabrın 21-dən sessiya çərçivəsində yüksək səviyyəli tədbirlər başlamalı və 27-də ona yekun vurulmalıdır.

Sessiyanın əsas mövzusu çətin humanitar vəziyyətin hökm sürdüyü Əfqanıstandakı son durumdur.

İran Azərbaycanda saxlanmış sürücüləri buraxdırmağa çalışır

Gorus-Qafan yolu

İran sürücülərin dərhal buraxılmasını, eləcə də məsələnin həllindən ötrü rəsmi şəxslərlə görüş tələb edir

İran Azərbaycan tərəfin saxladığı yük maşını sürücülərini buraxdırmağa çalışır. Bu haqda İslam Respublikası Xarici İşlər Nazirliyinin rəsmi təmsilçisi Səid Xətibzadə açıqlama verib.

Onun sözlərinə görə, İran sürücülərin dərhal buraxılmasını, eləcə də məsələnin həllindən ötrü rəsmi şəxslərlə görüş tələb edir.

Sentyabrın 12-dən Azərbaycan polisi Gorus-Qafan yolunun onun nəzarətində olan Eyvazlı hissəsində (Ermənistanın Vorotan kəndi yaxınlığında) İran nömrəli yük maşınlarını dayandırmağa, sənədlərini yoxlamağa başlayıb. Azərbaycan Dövlət Gömrük Komitəsi İran maşınlarından rüsum alınmasının ölkə qanunvericiliyinə uyğun olduğunu bildirib. İki sürücünün saxlanması isə onların Azərbaycan ərazisinə qanunsuz yollarla girməsilə izah olunub.

İran XİN-in təmsilçisi qonşu ölkələrin ərazi bütövlüyünün Tehran üçün prioritet olduğunu vurğulayıb.

1734 gündəlik yoluxma aşkarlanıb, 25 ölüm

COVID-19 xəstəsi, Sarayevo Mərkəzi xəstəxanası, 17 sentyabr 2021

Son gündə Azərbaycanda koronavirus (COVID-19) infeksiyasına
1734 yeni yoluxma faktı qeydə alınıb, bu virusa yoluxanlardan 3 378 nəfər sağalıb.

Nazirlər Kabineti yanında Operativ Qərargahdan sentyabrın 19-da verilən məlumata görə, COVID-19 üçün götürülən analiz nümunələri müsbət çıxan 25 nəfər də vəfat edib.

Qərargahın açıqlamasına görə, Azərbaycanda indiyədək ümumilikdə 472 719 nəfər koronavirus infeksiyasına yoluxub, onlardan 434 095-İ sağalıb, 6 305-İ vəfat edib, aktiv xəstə sayı 32 319-Ə düşüb .

Bildirildiyinə görə, ölkədə son sutka ərzində 12 780, hazırkı dövrədək isə ümumilikdə 4 744 161 test aparılıb.

Xatırlatma

2019-cu ilin sonlarında dünyada yeni koronavirus aşkar edilib. 2020-ci il martın 11-də Dünya Səhiyyə Təşkilatı koronavirusu pandemiya elan edib. Dünyada sürətlə yayılan bu virusdan indiyə qədər 4,6 milyondan çox şəxsin vəfat etdiyi açıqlanıb.

Mərkəzi Bank uçot dərəcəsini yüksəldib

uçot dərəcəsi 6,25 faizdən  6,5 faizə, faiz dəhlizinin aşağı həddi 5,75-dən 6-ə,  yuxarı həddi isə 6,75-dən 7  səviyyəsinə yüksəldilib

Azərbaycan Mərkəzi Bankının (AMB) İdarə Heyəti uçot dərəcəsinin yüksəltməsi haqqında qərar qəbul edib.

Bu barədə AMB-nin bugün, sentyabrın 17-də yaydığı məlumatında bildirilir.

Qərarla uçot dərəcəsi 6,25 faizdən 6,5 faizə, faiz dəhlizinin aşağı həddi 5,75-dən 6-ə, yuxarı həddi isə 6,75-dən 7 səviyyəsinə yüksəldilib.

Faiz dәhlizinin parametrlәrinә dair növbəti qərarlar oktyabrın 29-u və dekabrın 17-ə nəzərdə tutulub.

Bəzi müstəqil ekspertlər isə vurğulayırlar ki, Azərbaycanda Mərkəzi Bankın rəqəmləri ilə kommersiya banklarının faizləri arasında bir qayda olaraq böyük fərq olur. Onlar hesab edirlər ki, Mərkəzi Bankın qərarları inzibati xarakter daşıyır.

AMB isə bildirir ki, bu qərar qlobal iqtisadiyyatda güclənən inflyasiya, xüsusilə ərzaq, xammal qiymətlərinin milli iqtisadiyyata ötürülməsi prosesinin güclənməsi, həmçinin ertələnən daxili tələbin yüksəlməsi fonunda təklifin geri qalması və başqa amillərinin proqnozu əsasında qəbul edilib.

Avropa Şurası Nazirlər Komitəsi bəzi keçmiş vəkilləri müdafiə edir

Qurumun qərarında keçmiş vəkillərin – Xalid Bağırovun, Elçin Namazovun, Aslan İsmayılovun kollegiyaya bərpa edilməli olduqları vurğulanır

Avropa Şurası Nazirlər Komitəsi Azərbaycan Vəkillər Kollegiyasından xaric edilən bəzi şəxslərin üzvlüyə bərpa edilməsi ilə bağlı qərar qəbul edib.

Qərarda keçmiş vəkillərin – Xalid Bağırovun, Elçin Namazovun, Aslan İsmayılovun kollegiyaya bərpa edilməli olduqları vurğulanır.

Bu barədə AzadlıqRadiosuna hüquqşünas Xalid Ağaliyev məlumat verib.

Onun sözlərinə görə, qərar Namazov işi qrupuna daxil olan qərarların icra durumunun müzakirəsinin yekunu kimi qəbul edilib:

"Bu qrup çərçivəsində Avropa İnsan Haqları Məhkəməsinin (AİHM) Azərbaycanla bağlı Elçin Namazov, Xalid Bağırov, Aslan İsmayılov Azərbaycana qarşı qərarlarının icrasına nəzarət edilir. Hər 3 qərar vəkillərin Azərbaycan Vəkillər Kollegiyasından xaric edilmələri ilə bağlıdır. AİHM bu işlərdə vəkillikdən kənarlaşdırılmalarından şikayət edən ərizəçilərin xeyrinə qərar vermişdi".

Hüquqşünasın dediyinə görə, Avropa Şurasının Nazirlər Komitəsinin qərarında qeyd edilir ki, Azərbaycan hökuməti Vəkillər Kollegiyasının diqqətini AİHM-in vəkillikdən uzaqlaşdırılanların şikayətləri üzrə qərarlarının icrasına, şikayətçilərin əvvəlki vəziyyətlərinə qaytarılmalı olması öhdəliyinə yönəltməlidir. Hökumətdən hər 3 ərizəçi ilə bağlı işlərə yenidən baxılması, qərar verilməsi istənilir.

Məsələyə, hələlik, Azərbaycanın cavabdeh rəsmi qurumlarından münasibət öyrənmək mümkün olmayıb.

Elçin Namazov 2011, Aslan İsmayilov 2013, Xalid Bağırov isə 2015-ci ildə kollegiyadan xaric edilib.

Xatırlatma

Son illər Azərbaycan Vəkillər Kollegiyasında bir çox vəkil xaric edilib. Onlardan bir çoxunun müxalifətçilərin, araşdırmaçı jurnalistlərin vəkili olduğu qeyd edilir və bu qərar siyasi sifariş kimi yozulur.

Amma Azərbaycan Vəkillər Kollegiyası onların xaric edilməsini qanunvericiliyin tələblərini pozmaları ilə izah edib.

40 min tələbəyə kredit veriləcəyi deyilir

Bu ildən təhsil kreditləri verilə bilər: Kimlər ala biləcək?
Gözlə

No media source currently available

0:00 0:03:53 0:00

Bu ilin oktyabrından 40 minə yaxın tələbəyə təhsil kreditinin verilməsinə başlanacağı gözlənir.

Bu barədə bu gün, sentyabrın 17-də "Media və təhsil dialoqu" maarifləndirici təlimdə çıxış edən Təhsil Nazirliyinin Elm, ali və orta ixtisas təhsili şöbəsinin müdiri Nicat Məmmədli danışıb. O bildirib ki, bu kredit həm bakalavr, həm də magistr təhsili alan tələbələrə veriləcək.

Şöbə müdirinin vurğulamasına görə, bura həm sosial təhsil tələbə krediti, həm də standart təhsil tələbə krediti aiddir. Onun qeyd etməsinə görə, sistemin hazırlanması, banklarla müqavilə, sığorta məsələləri artıq həll edilib, artıq kreditin verilmə qaydası da hazırlanıb.

Avropada pulsuz, Azərbaycanda 6 minə. Kasıbın balası necə oxusun?
Gözlə

No media source currently available

0:00 0:03:59 0:00

Qaydalar...

Təhsil Nazirliyinin açıqlamasına görə, Təhsil Tələbə Krediti Fondunun nizamnamə kapitalı 80 milyon manat nəzərdə tutulub.

Bildirilir ki, kredit öz hesabına təhsil alan tələbələrə şamil olunacaq.

Fondun verdiyi kreditlər birdəfəlik yox, hər tədris ili üzrə ödənilməlidir.

Açıqlamaya görə, kreditlər iki qrupa bölünəcək. Birinci qrupa sosial həssas tələbələr daxildir. İkinci qrup isə standart kredit olmalıdır: "Tələbə təhsil kreditini 20 il müddətinə qaytara biləcək".

Eyni zamanda, üzrlü səbəb olarsa, möhlət hüququ da veriləcək. Üstəlik, yaxşı oxuyan tələbəyə güzəştlər olunacağı da bildirilir.

Vurğulandığına görə, kreditin məbləğinin yuxarı həddi illik təhsil haqqından çox olmayacaq.

Sosial təhsil tələbə kreditindən isə yalnız sosial həssas təbəqəyə aid ailələrin üzvü olan tələbələr istifadə edə biləcəklər.

Hərbi qulluqçulardan 1750 nəfərə əlillik verilib

Keçmiş döyüşçülər etiraz edir
Gözlə

No media source currently available

0:00 0:01:43 0:00

2020-ci ildə 44 günlük İkinci Qarabağ müharibəsində yaralanan hərbi qulluqçulardan 1750 nəfərə əlillik təyinatı aparılıb.

AZƏRTAC-ın xəbərinə görə, bunu bu gün, sentyabrın 16-da Əmək və Əhalinin Sosial Müdafiəsi Nazirliyinin tabeliyindəki Dövlət Tibbi-Sosial Ekspertiza və Reabilitasiya Agentliyinin sədri Anar Bayramov keçirdiyi mətbuat konfransında deyib.

Müdafiə Nazirliyi isə həmin müharibədə Azərbaycanın 2 min 907 hərbi qulluqçu itirdiyini, 7 hərbçinin isə itkin sayıldığını açıqlayıb. Amma onda dəqiq neçə hərbçinin yaralandığı vurğulanmamışdı.

Buna qədər bəzi hərbi qulluqçular əlillik təyinatı ala bilmədiklərindən şikayətlər də dilə gətirmişdilər. Rəsmi qurumlar isə belə şikayətlərin araşdırılacağı barədə vəd vermişdilər.

Bir sıra ekspertlər isə vurğulayır ki, qanunvericiliyə son dəyişiklikdən sonra Azərbaycanda əllik təyinatı almağın şərtləri ağırlaşdırılıb.

Xatırlatma

İkinci Qarabağ müharibəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin il 10 noyabr razılaşmasına (Azərbaycan, Ermənistan və Rusiya rəhbərləri arasında) əsasən, döyüşlər dayandırılıb, Laçın dəhlizində və qoşunların təmas xəttində Rusiya sülhməramlıları yerləşdirilib. Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.

Qarabağ münaqişəsi Ermənistanın Azərbaycana ərazi iddiaları ilə 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Azərbaycanda birinci sinif şagirdlərinin sayı azalır

Bu uşaqlar heç vaxt məktəbə getməyiblər. Zibillikdən dəmir yığırlar
Gözlə

No media source currently available

0:00 0:02:36 0:00

2021-2022-ci tədris ilində Azərbaycanın ümumi təhsil müəssisələrində 1 milyon 589 min 829 şagirdin oxuyacağı proqnozlaşdırılır.

Bununla bağlı Təhsil Nazirliyi məlumat yayıb.

Məlumatda qeyd edilir ki, ümumtəhsil məktəblərinin I sinfində 158 min 608, IX sinfində 132 min 881, XI sinfində isə 91 min 538 şagird təhsil alacaq.

Nazirliyin bildirməsinə görə, hazırda ölkədə 309 ibtidai, 3 min 333 tam orta, 775 ümumi orta, 13 xüsusi tipli ümumi orta və 5 əyani-qiyabi (axşam) tam orta məktəb var: "O cümlədən 64 məktəb-lisey, 54 lisey, 15 gimnaziya və 16 inteqrasiya təlimli internat tipli gimnaziya, 1 inteqrasiya təlimli internat məktəbi olmaqla, ümumilikdə 4 min 435 məktəb fəaliyyət göstərir".

Bir il əvvəl isə ölkənin ümumi təhsil müəssisələrində ümumilikdə 1 milyon 574 min 206 şagirdin təhsil alacağının gözləndiyi açıqlanmışdı.

Rəsmi açıqlamaya görə, ümumtəhsil məktəblərinin I sinfində 165 min 511, IX sinfində 132 min 734, XI-XII-ci sinfində isə 85 min 44 şagirdin təhsil alacağı proqnozlaşdırılırdı.

Mövlam Şixəliyevin istintaqı başa çatıb

MTN

Azərbaycanın ləğv edilmiş Milli Təhlükəsizlik Nazirliyinin (MTN) İstintaq Baş İdarəsinin sabiq rəisi Mövlam Şixəliyev və digər vəzifəli şəxsləri ilə bağlı cinayət işi üzrə istintaq yekunlaşıb.

Bu barədə bu gün, sentyabrın 15-də Baş Prokurorluq məlumat yayıb.

Söhbət habelə, həmin qurumda sabiq şöbə rəisi Vüsal Ələkbərov, İbtidai istintaq idarəsinin sabiq rəis müavini Yasin Məmmədov və şöbə rəisinin sabiq müavini Sahib Ələkbərovdan gedir.

İddiaya görə, M.Şixəliyevin mütəşəkkil dəstə halında 14 milyon 292 min manat, 5 milyon 77 min manat məbləğində isə özgə əmlakını hədə-qorxu ilə almasına əsaslı şübhələr yaranıb.

M.Şixəliyevə Cinayət Məcəlləsinin 182.3.1, 182.3.2 (külli miqdarda əmlak əldə etmək məqsədi ilə mütəşəkkil dəstə tərəfindən hədə qorxu ilə tələb etmə), 294.3 (sübutları saxtalaşdırma), 311.3.1 (qabaqcadan əlbir olan bir qrup şəxs… tərəfindən rüşvət alma) və digər maddələri ilə ittiham verilib, barəsində məhkəmənin qərarı ilə həbs-qətimkan tədbiri seçilib: "Vüsal Ələkbərov, Yasin Məmmədov və Sahib Ələkbərov həmin Məcəllənin 311.3.1, 341.2.1, 341.2.3-cü (vəzifə səlahiyyətlərindən sui-istifadə və ya vəzifə səlahiyyətlərini aşma) və digər maddələri ilə təqsirləndirilən şəxs qismində cəlb edilməklə barələrində müvafiq qətimkan tədbirləri seçilib".

Cinayət işi üzrə ittiham aktı təsdiq edilərək baxılması üçün aidiyyəti üzrə Bakı Hərbi Məhkəməsinə göndərilib.

Hələlik, ittihama sözügedən şəxslər və onların vəkillərindən münasibət almaq mümkün olmayıb.

2015-ci ilin oktyabrında MTN ləğv edilib. Onun bazasında Dövlət Təhlükəsizliyi Xidməti (DTX) və Xarici Kəşfiyyat Xidməti (XKX) yaradılıb

Xatırlatma

Bundan əvvəl, 2015-ci ilin oktyabrında bu nazirliyin 21 vəzifəlisi cinayət məsuliyyətinə cəlb olunmuşdu. Onların arasında beş general da vardı. Onların işi bir neçə qrupa bölünüb və ayrılıqda məhkəməyə göndərilib. Sabiq MTN-çilərə 3 ildən 14 ilə qədər həbs, üç nəfərə isə şərti cəza verilib. Həmin generallardan hazırda yalnız ikisi - Elçin Quliyev və Teymur Quliyev həbsdədir. Akif Çovdarov və Sübahir Qurbanov 2020-ci ilin aprelində əfv sərəncamı ilə azadlığa buraxılıb. Natəvan Mürvətovaya isə şərti cəza təyin edilib. Onlar qanunsuz dinləmələrdə, iş adamlarının əmlaklarını hədə-qorxu ilə əllərindən almaqda, onları qanunsuz şəkildə günlərlə MTN-də saxlamaqda və başqa əməllərdə ittiham olunurdular. Onlar ittihamları, əsasən, qəbul etməyiblər.

Bakının işğalına 103 il öncə son qoyuldu

Qafqaz İslam Ordusu Bakıda, 1918-ci il

Bu gün, sentyabrın 15-də Bakının işğaldan azad olunmasından 103 il ötür.

1918-ci il sentyabrın 15-də Nuru Paşanın komandanı olduğu Qafqaz İslam Ordusu və Azərbaycan Cümhuriyyətinin korpusu Bakını işğaldan azad edib. Həmin vaxt Bakıda Sentrokaspi Diktaturası mövcud olub. Cəmi 45 gün sürən bu hakimiyyətin, əsasən, daşnak və menşeviklərdən ibarət olduğu bildirilir.

Sentyabrın 15-də azad olmaqla Bakı Azərbaycan Cümhuriyyətinin paytaxtına çevrilib. Buna qədər 1918-ci il mayın 28-də elan edilən Xalq Cümhuriyyətinin paytaxtı Gəncə idi. O, azad edildikdən cəmi iki gün sonra -sentyabrın 17-də Cümhuriyyət hökuməti Gəncədən Bakıya köçüb.

Azərbaycan tarixçilərinin fikrincə, əsası Osmanlı torpaqlarında qoyulan Qafqaz İslam Ordusu tək Bakının işğaldan azad edilməsində iştirak etməyib. "Bu ordu Şamaxı, Göyçay və bir çox yerlərdə azərbaycanlıların kütləvi şəkildə qırılmasının qarşısını alıb", –tarixçilər bildirirlər.

Xalq Cümhuriyyəti 1918-ci il mayın 28-də qurulub. 1920-ci ildə Rusiyanın silahlı müdaxiləsi ilə devrilib. Azərbaycan müstəqilliyinə bir də 1991-ci il oktyabrın 18-də qovuşub.

Yaqub Zurufçu  vəfat edib 

Yaqub Zurufçu

Koronavirusa yoluxduğu deyilən müğənninin bir müddət əvvəl "Yeni Klinika"nın reanimasiya şöbəsinə yerləşdirildiyi açıqlanmışdı

Müğənni Yaqub Zurufçu bu gün, sentyabrın 14-də vəfat edib.

Bu barədə “Turan” İnformasiya Agentliyinə "Yeni Klinika" tibb müəssisəsindən bildiriblər.

Koronavirusa yoluxduğu deyilən müğənninin bir müddət əvvəl "Yeni Klinika"nın reanimasiya şöbəsinə yerləşdirildiyi açıqlanmışdı.

Yaqub Zurufçu 1956-cı ildə aprelin 8-də Təbriz şəhərində doğulub . 1979-cu ildə İranda baş verən inqlabdan bir il sonra Almaniyaya köçüb. Orada musiqi təhsili alıb.
1989-cu ildə müğənni Gülağa Məmmədovun təqdimatında “Ayrılıq” mahnısı ilə Azərbaycanda tanınan Yaqub Zurufçu son illər Bakıda yaşayırdı.

Davamı

XS
SM
MD
LG