Keçid linkləri

Təcili xəbərlər
2021, 19 May, çərşənbə, Bakı vaxtı 02:38

'Xəzərdə potensial gücə malik zəlzələ ocaqları var'


Qurban Yetirmişli

«Neft-qaz yataqları ilə zəngin olan Xəzərdə potensial gücə malik zəlzələ ocaqları da var».

APA-nın xəbərinə görə, bunu Azərbaycan Milli Elmlər Akademiyasının (AMEA) Respublika Seysmoloji Xidmət Mərkəzinin baş direktoru Qurban Yetirmişli fevralın 9-da keçirdiyi mətbuat konfransında deyib.

O bildirib ki, Abşeron və Bakıda hiss olunan yeraltı təkanlar da Xəzərdə olan zəlzələ ocaqları ilə bağlıdır.

Q.Yetirmişlinin deməsinə görə, Xəzər həm palçıq vulkanları, həm də zəlzələ ocaqları ilə çox zəngindir: «Cənubdan şimala qədər Xəzərdə zəlzələ ocaqları var. Bu da dərinlik qırılmaları ilə əlaqədardır. Xəzərdə dəniz dibi seysmik stansiyalar yoxdur. İlkin olaraq üç belə dəniz dibi stansiya alınsa da, bu günə qədər onları quraşdırmaq mümkün olmayıb. Ümid edirik ki, yaxın vaxtlarda bu məsələ öz həllini tapacaq. Xarici mütəxəssislərlə bu istiqamətdə danışıqlar aparılır. Hansısa böyük qrant layihəsi çərçivəsində bu işləri başa çatdırmaq olar. Bu, bizim üçün çox vacibdir. Çünki dəniz dibinin dərinlik quruluşunun öyrənilməsi, potensialının müəyyənləşdirilməsi, tomoqrafiyası, kommunikasiya xətlərinin qurulmasında riskin qiymətləndirilməsi və seysmik mikro-rayonlaşdırılması çox vacibdir».

Q.Yetirmişli əlavə edib ki, hər bir ocaqda baş verən zəlzələ istər-istəməz dənizdəki «Günəşli», «Azəri», «Çıraq» neft-qaz yataqlarına təsir edir.

Onun fikrincə, Xəzərdəki zəlzələ ocaqlarında gedən proseslər nəticəsində neft-qaz yataqlarında müəyyən çatlar əmələ gəlir, parçalanma gedir: «Neft yatağı daxilində çatlar əmələ gəlirsə, yataqdakı neftin hər hansı bir istiqamətə axını olacaq».

Son bir həftədə Xəzərdə, Şamaxı və Cəlilabad rayonlarında bir neçə kiçik zəlzələlər baş verib. Bu zəlzələlərin hiss olunmadığı bildirilir.

XS
SM
MD
LG