Yanvarın 30-da Təhsil Nazirliyində növbədənkənar kollegiya iclası keçirilib. Təhsil Nazirliyinin mətbuat xidmətinin yaydığı məlumata görə, kollegiyada Qafqaz Universitetinin ləğvetmə komissiyasının təqdim etdiyi təkliflər əsasında tələbə kontingentinin digər universitetlərdə yerləşdirilməsi məsələsi müzakirə olunub.
Müzakirələr nəticəsində irəli sürülmüş bir neçə təklif arasında qış imtahan sessiyasından sonra bütün tələbələrin bir universitetdə yerləşdirilməsi qərara alınıb. Söhbət onların prezidentinin 2016-cı ilnoyabrın 8-də verdiyi fərmanla yaradılanBakı Mühəndislik Universitetində öz ixtisasları üzrə yerləşdirilməsindən gedir. Qərarda həmçinin, tələbələrin təhsil aldıqları tədris dilinin saxlanılması da vurğulanır.
«Sözügedən təklifin qəbul olunması zamanı Qafqaz Universitetinin təsisçisi - Azərbaycan Beynəlxalq Təhsil Kompleksinin müraciəti nəzərə alınıb»,-deyə məlumatda vurğulanır.
Buna da bax-Qafqaz Universitetinin tələbələri fikirlərinin təhrif olunduğunu deyir
Təhsil Nazirliyinin Kollegiyasının qəbul etdiyi qərarda digər ali təhsil müəssisələrində təhsillərini davam etdirmək istəyən tələbələrin müraciətlərinə yay tətili zamanı baxılacağı da qeyd olunur.
Tələbələr isə ölkə başçısına və təhsil nazirinə ünvanladıqları müraciətdə keçmiş Qafqaz Universitetinin şəhərciyində yeni ali təhsil müəssisəsinin yaradılmasını xahiş edirdilər. Bundan ötrü onlar imzatoplama kampaniyasına da başlamışdılar.
XATIRLATMA
1993-cü ildə fəaliyyətə başlayan Qafqaz Universitetinin ötən il iyulun 20-də təsisçilərinin qərarı ilə Bakı Ali Neft Məktəbinin nəzarətinə verildiyi açıqlanmışdı. Az sonra isə universitetin rektoru dəyişdirilmişdi.
Avqustun 31-də Türkiyədə səfərdə olan daxili işlər naziri Ramil Usubov keçirdiyi mətbuat konfransında Fethullah Gülen hərəkatı ilə mübarizə tədbirləri çərçivəsində Qafqaz Universitetinin qapadıldığını xüsusi qeyd etmişdi. Ancaq bu sonradan təsdiqlənməmişdi.
Bu il yanvarın 18-də isə Qafqaz Universiteti ləğv olunduğunu elan edib.
Hazırda ABŞ-da yaşayan ilahiyyatçı Fethullah Gülen ötən il Türkiyədə baş verən dövlət çevrilişi cəhdini himayə etməkdə günahlandırılır. F.Gülen-in özü isə Türkiyə rəsmilərinin bu iddialarını yalanlayıb.