İranın əsasən Azərbaycanlıların yaşadığı Zəncan şəhərində yerli təhsil idarəsinin əməkdaşlığı ilə "altı illik ibtidai məktəblər" üçün "Ana dili" adlı azərbaycanca dərslik kitabının çapa hazırlandığı bildirilib. Bu haqda İran Azərbaycanının Urmiya şəhərində fəaliyyət göstərən "Yol Press" saytı xəbər yayıb. Saytın məlumatına görə "Ana dili" dərsliyinin müəllifi Məhəmməd Rza Kərimidir.
Buna da bax: '39 il qadağadan sonra İranda Azərbaycan dili tədris olunur'
"Ana Dili" kitabı təhsil idarəsinin əməkdaşlığı ilə hazırlansa da, dərsliyin məktəblərdə tədris olunacağına dair konkret məlumat verilməyib. Lakin keçən aylarda mətbuatda türk dilinin Zəncan vilayəti məktəblərində tədrisinin yolunun açıldığına dair xəbərlər dərc edilmişdi.
Kitabın içindəki açıqlamalara görə, dərslik hazırda şagirdlərin öz istifadəsi üçün nəzərdə tutulub.
