Keçid linkləri

2024, 28 Mart, Cümə axşamı, Bakı vaxtı 21:38

Avropa Məhkəməsi hökuməti 91 min avro cərimələdi


Avropa Məhkəməsi
Avropa Məhkəməsi

Avropa İnsan Hüquqları Məhkəməsi (AİHM) noyabrın 24-də Azərbaycanla bağlı iki qərarını açıqlayıb. Məhkəmə hökuməti üst-üstə 91 min avro cərimələyib.

Qərarlar məhkəmənin saytında yayımlanıb.

MUSTAFA HACIBƏYLİNİN İŞİ

Açıqlanmış qərarlardan biri Müsavat Partiyası fəalı, «Demokrat» qəzetinin redaktoru Mustafa Hacıbəylinin şikayəti ilə bağlıdır.

Qərarda göstərilir ki, M.Hacıbəylini 2011-ci ilin aprelində Fəvvarələr meydanında etiraz aksiyasına qatılmaq istəyərkən polis saxlayıb. Onu Nəsimi Rayon Polis İdarəsinin bölmələrindən birinə aparıblar.

Qərarda polis bölməsində M.Hacıbəylinin döyüldüyü, qeyri-insani rəftara məruz qaldığı qeyd edilir.

M.Hacıbəyli sonradan bununla bağlı yerli hüquq-mühafizə qurumlarına müraciət edib. Ancaq qərara görə, onun şikayətinə nə polis və prokurorluqda, nə də məhkəmələrdə ədalətli baxılıb.

AİHM M.Hacıbəyliyə münasibətdə Avropa Konvensiyasının 3-cü maddəsi ilə təminat verilən qeyri-insani və ya ləyaqəti alçaldan rəftara məruz qalmamaq hüququnun pozulduğu qənaətinə gəlib.

Məhkəmə qərarına əsasən, hökumət jurnalistə mənəvi zərərə və hüquq məsrəflərinə görə birlikdə 13 min avro ödəməlidir.

MİTİNQDƏ SAXLANAN CƏBHƏÇİLƏRİN İŞİ

AİHM-nin açıqladığı digər qərar Azərbaycan Xalq Cəbhəsi Partiyasının (AXCP) 6 üzvünün şikayəti ilə bağlıdır.

Şikayətçilər İlham Hüseyn, Bəhruz Həsənov, Türkel Əlisoy, Ağaverdi Rushanov, Təzəxan Mirələmli və Tofiq Dadaşov olub.

Şikayətçilər 2011-2014-cü illərdə müxalif partiyaların etiraz aksiyalarında saxlanıblar. Yerli məhkəmələr İlham Hüseynova, Bəhruz Həsənova, Türkel Əlisoya, Ağaverdi Rushanova 20, Təzəxan Mirələmliyə 15, Tofiq Dadaşova 10 sutka inzibati həbs cəzası verib. Şikayətçilər həbs edilmələrinin qanunsuz olduğunu yerli məhkəmələrə çıxarıblar. Ancaq məhkəmələr onların heç birinin şikayətini təmin etməyib.

AİHM iddia olunan pozuntular oxşar olduğundan şikayətlərə birgə baxıb.

AİHM şikayətçilərin Konvensiyanın 11-ci (birləşmək hüququ), 6-cı (ədalətli məhkəmə araşdırması hüququ) və 5-ci (azadlıq və toxunulmazlıq hüququ) maddələri ilə təminat verilən hüquqlarının pozuntusuna yol verildiyi qənaətinə gəlib.

Qərar görə. hökumət ərizəçilərin hər birinə 12 min avro ödəməlidir. Hüquq xidmətlərinə görə isə, birlikdə 6 min avro ödənilməlidir.

Şikayətçiləri AİHM-də Ruslan Mustafazadə və Əsabəli Mustafayev təmsil edib.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG