Beynəlxalq Qızıl Xaç Komitəsi (BQXK) əməkdaşlarının Naxçıvanda saxlanılan Ermənistan vətəndaşı Henrik Aghekyan-a baş çəkdiyi bildirilir.
APA-nın xəbərinə görə, bu haqda BQXK-nın Azərbaycan nümayəndəliyinin ictimaiyyətlə əlaqələr şöbəsinin rəhbəri İlahə Hüseynova məlumat verib.
İ.Hüseynova deyib ki, saxlanılan şəxs ailəsinə məktub göndərib.
«Ailəsinə məktub göndərilməsinə imkan yaradılıb. Eyni zamanda ailəsindən ona məlumat çatdırılıb», - BQXK nümayəndəsi deyib.
Ermənistan vətəndaşı Henrik Aghekyan-ı avqustun 7-də Naxçıvan Muxtar Respublikası ərazisinə keçmək istəyərkən Azərbaycan hərbçilərinin saxladığı bildirilir.
Henrik Aghekyan-ın 62 yaşı olduğu deyilir. Onun Azərbaycana hansı məqsədlə keçmək istədiyi açıqlanmır.