Keçid linkləri

2024, 28 Mart, Cümə axşamı, Bakı vaxtı 12:54

Baş nazirin ögey oğlu və “Hollivudda yuyulan” çirkli pullar


Malayziyanın baş naziri Najib Razak
Malayziyanın baş naziri Najib Razak

ABŞ-ın Ədliyyə Nazirliyi Malayziya rəsmilərinin Hollivud studiyalarına gedib çıxan korrupsiyasını araşdırır

Bloomberg saytının yazdığına görə, Birləşmiş Ştatların Ədliyyə Nazirliyi Malayziyanın 1MDB kimi tanınan ictimai fondundan mənimsənmiş 1 milyard dollar dəyərində aktivləri müsadirə etməyə hazırlaşır.

Sözü gedən aktivlərə daşınmaz mülkiyyət, sənət əsərləri və “Wall Street Canavarı” filminin qonorar pulları daxildir.

Ədliyyə Nazirliyinin məhkəmə üçün hazırladığı sənədlərdə deyilir ki, 1MDB fondundan mənimsənmiş pullardan Malayziya hökuməti rəsmilərinin və onların qohumlarının ABŞ-da daşınmaz mülkiyyət alması, onların Las Veqas kazinolarındakı xərclərinin ödənməsi və 200 milyon dollar dəyərində sənət əsərlərinin əldə olunması üçün istifadə edilib.

Nazirlik iddia edir ki, bu yolla mənimsənmiş 3, 5 milyard dolların 1 milyardı ABŞ-ın bank sistemindən keçib.

Dövlət vəsaiti ata malı kimi

ABŞ-ın baş prokuroru Loretta Lynch Vaşinqtonda keçirilmiş mətbuat konfransında deyib ki, korrupsiyaya uğramış məmurlar “ictimai fonddan şəxsi bank hesabları kimi istifadə ediblər”.

ABŞ mətbuatı bildirir ki, hazırda rəsmən 1Malayziya İnkişaf Berhad (1Malaysia Development Berhad) adı ilə tanınan Malayziya ictimai fondu ətrafında rəsmi şəxslər tərəfindən həyata keçirildiyi iddia edilən korrupsiya və çirlkli pulların yuyulması ilə bağlı bir neçə beynəlxalq cinayət təhqiqatı aparılır.

Azı dörd ölkədən – Sinqapur, İsveçrə, Lüksemburq və ABŞ-dan olan prokurorlar Malayziyanın milli inkişafı üçün yaradılmış investisiya fondundan vəsait axınlarını araşdırırlar.

Beynəlxalq təhqiqat rəsmiləri diqqəti belə bir məqama çəkirlər ki, bu fonda Malayziyanın baş naziri Najib Razak rəhbərlik edib. İstər baş nazir, istərsə də 1MDB heç bir qanunsuz əmələ yol verilmədiyində israr edirlər.

Baş nazirin ögey oğlu

Bloomberg yazır ki, Najib ailəsinin 1MDB-nin vəsaitləri ilə əlaqəsi iddia olunur. Bu əlaqələrdən biri Malayziyada tam bir il ərzində böyük siyasi qalmaqala səbəb olub.

Malayziya baş nazirinin istefasını tələb edən aksiya. 2015-ci il, avqust
Malayziya baş nazirinin istefasını tələb edən aksiya. 2015-ci il, avqust

Məqalədə deyilir ki, söhbət 2013-cü il seçkisinin ərəfəsində baş nazirin şəxsi bank hesabında “peyda olmuş” 681 milyon dollarlıq ianədən gedir.

Malayziyanın baş prokuroru Najib barədə araşdırmaya xitam vermiş, rəsmilər isə Səudiyyənin kral ailəsindən verilən bu ianənin əksər hissəsinin qaytarıldığını söyləmişdilər.

Məhkəməyə verilmiş şikayət ərizəsində Najib-in ögey oğlu Riza Aziz və Malayziya maliyyəçisi Low Taek Jho-nun adı çəkilir. Bu da əlavə edilir ki, Riza Red Granite Pictures adlı Hollivud kinostudiyalarından birinin şərikli sahibidir.

Məşhur “Wall Street Canavarı” filmi məhz bu kinostuiyada çəkilib.

Kleptokratiya aktivləri

Baş prokuror Lynch deyib ki, hazırda Ədliyyə Nazirliyi bu filmdən əldə olunmuş qonorara əl qoymağa çalışır.

"Wall Street Canavarı" filmindən kadr.
"Wall Street Canavarı" filmindən kadr.

1MDB sözçüsü hələ ötən aprel ayında bəyan etmişdi ki, fond “nə dolayısı ilə, nə də vasitəçilərin kanalları ilə Red Granite Pictures kinostudiyasına vəsait köçürməyib və ya investisiya yatırmayıb”.

Xanım Lynch bunu da deyib ki, sözü gedən iş Ədliyyə Nazirliyinin Kleptokratiya Aktivləri Təşəbbüsünün indiyədək apardığı ən böyük müsadirə aktı ola bilər.

Bu təşkilat ABŞ banklarından beynəlxalq çirkli pulların yuyulması üçün istifadə hallarını araşdırır.

ABŞ hökumətinin müsadirə etməyə çalışdığı aktivlərə “Wall Street Canavarı” filmindən alınan qonorarlar, Kaliforniyadakı Beverli Hilzdə evlər, Manhattandakı Time Warner binasında penthauz vəVincent van Gogh-a aid tablo daxildir.

İsveçrə hüquq-mühafizə orqanlarının təxmininə görə Malayziyanın dövlət şirkətlərindən 4 milyard dollaradək vəsait yayındırıla bilərdi.

Malayziya parlamentinin müvafiq komitəsi fond tərəfindən 4, 2 milyard dollarlıq nizamsız köçürmələr edildiyini bildirmişdi.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG