«Rusiya bazarlarına bağlanan ümidlər puç olub. Son 3 ildə bu ölkə ilə ticarətdən itkilərimiz sürətlə böyüyüb».
Bunu iqtisadçı Nemət Əliyev bildirir.
Onun deməsinə görə, Azərbaycan Rusiya bazarlarına bu ilin yanvar-may aylarında cəmi 130 milyon dollarlıq mal sata bilib:
«Halbuki həmin dövrdə dəfələrlə kiçik olan Azərbaycan bazarlarına Rusiya 610 milyon dollarlıq malını sata bilib. Odur ki, Rusiya ilə 5 aylıq ticarətdən 480 milyon dollar həcmində valyuta itkimiz yaranıb. 2013, 2014 və 2015-cü illərin yanvar-mayında Rusiya bazarlarına uyğun olaraq 540 milyon, 240 milyon və 140 milyon dollarlıq mal satmışdıq»
Nemət Əliyev bildirir ki, son 3 ildə Rusiya bazarlarına mal satışının həcmi 4 dəfə azalıb. Nəticədə bu ölkə ilə ticarətdən Azərbaycanın valyuta itkiləri 6 dəfə artıb.
«Qarşılıqlı ticarət əlaqələrindən irəli düşən Rusiya olub»
«Bu il MDB ölkələri ilə 5 aylıq ticarətdən valyuta itkilərimiz 555 milyon dollar olub. Bunun da 86 faizindən çoxu Rusiya ilə ticarətin payına düşüb» - deyə iqtisadçı bildirir.
Ötən il Azərbaycanla Rusiya arasında ticarət dövriyyəsi 1,9 milyard dollar təşkil edib. Azərbaycanda 600-ə yaxın Rusiya kapitallı şirkət fəaliyyət göstərir.
