Zəlzələ də ola bilər
“2015-ci ildə Azərbaycanda baş verən 3 güclü zəlzələnin parametrləri öyrənilib. Apardığımız tədqiqatlar göstərir ki, Şamaxıdan başlamış Gürcüstan sərhədinə qədər böyük proseslər gedir, gərginlik toplanır. Proses belə getsə, bu, güclü zəlzələlərin baş verməsinə yol aça bilər”.
APA xəbər verir ki, Milli Elmlər Akademiyasının (AMEA) Yer Elmləri Bölməsinin katibi, akademik Fəxrəddin Qədirov belə deyir.
Hicablı Amerika idmançısı. İlk dəfə.
CNN.com yazır ki, Amerikalı qılıncoynadan Ibtihaj Muhammad hələ Olimpiya medalını qazanmayıb, amma artıq tarix yazmağa başlayıb.
30 yaşlı Ibtihaj Muhammad 2016-cı ildə Rio de Janeyroda keçiriləcək Olimpiya oyunlarında hicabla iştirak edəcək ilk Amerika idmançısı olacaq.
Köçkün 30 min manata ev ala bilərmi?
Fevralın 4-də saat 3 radələrində metronun Ulduz stansiyasının yaxınlığındakı pansionatdan məcburi köçkünlər çıxarılmağa başlayıb.
Bu haqda AzadlıqRadiosuna həmin ponsionatda yaşayan Qarabağ müharibəsi veteranı Vahid Əliyev məlumat verib:
“Bizi evlərimizdən polis zorakılığı ilə çıxarırlar. Qadınları belə vururlar, qapı-pəncərəmizi sındırırlar”.
Keşlə Maşınqayırma Zavodunun pansionatında 50 məcburi köçkün ailəsi 1992-ci ildən yaşayır. Pansionatın sökülməsi ərazidəki yolun genişləndirilməsi ilə bağlıdır. Yolu dövlət sifarişi əsasında “Azəryolservis” Açıq Səhmdar Cəmiyyəti salır.
“Azəryolservis” Açıq Səhmdar Cəmiyyətinin mətbuat xidmətinin rəhbəri Anar Nəcəfli AzadlıqRadiosuna bildirib ki, köçkün ailələrinə 30 min manat kompensasiya ödənilir. Kompensasiya qanunvericiliə görə təyin olunub, bunun artırılması onlardan asılı deyil.
Qaçqınlarla iş üzrə Dövlət Komitəsinin mətbuat xidməti məsələyə münasibət açıqlayacağını bildirib.
Gürcüstan qazı kimdən alacaq? - Kaladze Bakıya gəlib
Gürcüstanın energetika naziri Kakha Kaladze fevralın 4-də Bakıya gəlib. O, Azərbaycan Dövlət Neft Şirkətinin rəhbərliyi ilə danışıqlar aparacaq. Danışıqların mövzusu Azərbaycandan qaz nəqlidir. Son vaxtlar qaz məsləsinə görə Azərbaycanla Gürcüstanın münasibətləri soyuqlaşıb, Gürcüstanın qazı Rusiyadan almaq istəməsi xəbərlərindən sonra.